ಮಳೆ ಆರ್ಭಟ ಜತೆಗೆ ಭೂಕಂಪನ ಭೀತಿ

ಬೆಂಗಳೂರು: ರಾಜ್ಯದ ವಿವಿಧೆಡೆ ಮಳೆ ಆರ್ಭಟ ಮುಂದುವರಿದಿದ್ದು, ಕಲಬುರಗಿ ಜಿಲ್ಲೆ ಚಿಂಚೋಳಿ ತಾಲೂಕಿನ ವಿವಿಧೆಡೆ ಮಳೆ ಜತೆಗೆ ಭೂ ಕಂಪನದ ಅನುಭವ ಆಗಿದೆ. ಇದು ಜನರಲ್ಲಿ ಇನ್ನಷ್ಟು ಆತಂಕ ಮೂಡಿಸಿದೆ. ಇಂದ್ರಪಾಡ ಹೊಸಳ್ಳಿಯಲ್ಲಿ ಬೆಳಗ್ಗೆ 6.50, 10.10ಕ್ಕೆ ವಿಚಿತ್ರ ಶಬ್ದದೊಂದಿಗೆ ಭೂಮಿ ಕಂಪಿಸಿದ್ದು, ಕೆಲ ಮನೆಗಳು ಕುಸಿದಿವೆ. ಅದೃಷ್ಟವಶಾತ್ ಯಾವುದೇ ಪ್ರಾಣ ಹಾನಿ ಸಂಭವಿಸಿಲ್ಲ. 2-3 ದಿನಗಳಿಂದ ಭಾರಿ ಮಳೆ ಆಗುತ್ತಿರುವುದರಿಂದ ಇಂತಹ ಶಬ್ದ ಕೇಳಿ ಬರುತ್ತದೆ. 6 ವರ್ಷದ ಹಿಂದೆಯೂ ಇದೇ ರೀತಿ ಶಬ್ದ ಕೇಳಿಸಿತ್ತು. ಹೀಗಾಗಿ 2 ದಿನ ನಿಗಾ ವಹಿಸಲಾಗುವುದು. ಬಳಿಕ ಕ್ರಮ ಕೈಗೊಳ್ಳಲಾಗುವುದು ಎಂದು ತಹಸೀಲ್ದಾರ್ ಅರುಣಕುಮಾರ ಕುಲಕರ್ಣಿ ತಿಳಿಸಿದ್ದಾರೆ.

ರಣಭೀಕರ ಮಳೆ: ಎರಡು ದಿನ ಬೀದರ್ ಜಿಲ್ಲಾದ್ಯಂತ ಆರ್ಭಟಿಸಿದ್ದ ಮಳೆರಾಯ ಗುರುವಾರ ಸ್ವಲ್ಪ ಮೆತ್ತಗಾಗಿದ್ದರೂ ನಗರದಲ್ಲಿ ರಣಭೀಕರ ರೂಪದಲ್ಲಿ ಸುರಿಯುವ ಮೂಲಕ ಅಲ್ಲೋಲ-ಕಲ್ಲೋಲ ಸೃಷ್ಟಿಸಿದೆ. ಹುಲಸೂರು ಹತ್ತಿರದ ಕೆರೆ ಒಡೆದು 400 ಎಕರೆಗೂ ಅಧಿಕ ಎಕರೆ ಜಮೀನಿನಲ್ಲಿ ಬೆಳೆದಿದ್ದ ಬೆಳೆಗಳು ಹಾನಿಗೀಡಾಗಿವೆ.

ಸಾರಿಗೆ ಸಂಪರ್ಕ ಕಡಿತ

ಕಲಬುರಗಿ ಜಿಲ್ಲೆಯಲ್ಲಿ ವರುಣದೇವನ ಆರ್ಭಟ ಮುಂದುವರಿದಿದೆ. ಜಿಲ್ಲೆಯ ಎಲ್ಲ ನದಿಗಳು, ಹಳ್ಳ-ಕೊಳ್ಳಗಳು, ಕೆರೆಗಳು ತುಂಬಿ ಹರಿಯುತ್ತಿವೆ. ಲಕ್ಷಾಂತರ ಎಕರೆ ಕೃಷಿ ಭೂಮಿ ನೀರಲ್ಲಿದ್ದು, ಕೈಗೆ ಬರಬೇಕಾದ ಬೆಳೆ ಕೊಳೆಯುವ ಸ್ಥಿತಿಯಲ್ಲಿದೆ. ಜಿಲ್ಲೆ ಅಕ್ಷರಶಃ ಅತಿವೃಷ್ಟಿ ಎದುರಿಸುವಂತಾಗಿದೆ.

5 ದಿನ ಮಳೆ

ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಮುಂದಿನ 5 ದಿನ ಮಳೆ ಮುಂದುವರಿ ಯಲಿದೆ. ದಕ್ಷಿಣ ಕನ್ನಡ, ಉತ್ತರ ಕನ್ನಡ, ಉಡುಪಿಯಲ್ಲಿ ಮುಂದಿನ 48 ಗಂಟೆ ಯೆಲ್ಲೋ ಅಲರ್ಟ್ ಇದ್ದರೆ, ಸೆ.20ರಿಂದ ಗುಡುಗು ಸಹಿತ ವ್ಯಾಪಕ ಮಳೆಯಾಗಲಿರುವ ಹಿನ್ನೆಲೆಯಲ್ಲಿ ಆರೆಂಜ್ ಅಲರ್ಟ್ ಘೋಷಿಸಲಾಗಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ರಾಜ್ಯದಲ್ಲಿ ವಾಡಿಕೆಗಿಂತ ಹೆಚ್ಚು ಮಳೆ

ಈ ಬಾರಿ ರಾಜ್ಯದಲ್ಲಿ ಮುಂಗಾರು ಮಳೆ ಉತ್ತಮವಾಗಿದ್ದು, ವಾಡಿಕೆಗಿಂತ ಅಧಿಕ ಮಳೆಯಾಗಿದೆ. ಆಗಸ್ಟ್​ನಲ್ಲಿ ವಾಡಿಕೆಯಂತೆ 220 ಮಿಮೀ ಮಳೆಯಾಗಬೇಕಿತ್ತು. ಆದರೆ ಇದೀಗ 285 ಮಿಮೀ ಮಳೆಯಾಗಿದ್ದು, ಶೇ.29 ವಾಡಿಕೆಕ್ಕಿಂತ ಹೆಚ್ಚು ಮಳೆಯಾಗಿದೆ. ಸೆ.1ರಿಂದ ಸೆ.17ರವರೆಗೆ 82 ಮಿಮೀ ಮಳೆಯಾಗಬೇಕಿತ್ತು. 147 ಮಿಮೀ ಮಳೆಯಾಗಿದೆ. ಶೇ.79 ಹೆಚ್ಚು ಮಳೆ ಬಿದ್ದಿದೆ ಎಂದು ರಾಜ್ಯ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರ ಮಾಹಿತಿ ನೀಡಿದೆ.