ಪ್ರಶಾಂತ ರಿಪ್ಪನ್ಪೇಟೆ ಬೆಂಗಳೂರು : ಒಂದೆಡೆ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯನ್ನು 8 ವಿಭಾಗಗಳಾಗಿ ಗ್ರೇಟರ್ ಬೆಂಗಳೂರು ಯೋಜನೆಯ ಅನುಷ್ಠಾನದ ಧಾವಂತದಲ್ಲಿ ಸರ್ಕಾರ ಇದೆ. ಇನ್ನೊಂದೆಡೆ ನಗರದ ಗುಂಡಿಬಿದ್ದ ರೆಸ್ತೆಗಳು, ಬೆಸ್ಕಾಂ ಕೇಬಲ್ ಅಳವಡಿಕೆ ಕಾಮಗಾರಿಯಿಂದ ಉಂಟಾಗಿರುವ ಅಡಚಣೆಗಳು ಪ್ರಯಾಣಿಕರನ್ನು, ರಸ್ತೆ ಬದಿಯ ವ್ಯಾಪಾರಿಗಳನ್ನು ಹಿಂಡಿ ಹಿಪ್ಪೆ ಮಾಡುತ್ತಿವೆ. ಪೀಣ್ಯಕ್ಕೆ ಹೋಗುವ ಕಂಠೀರವ ಸ್ಟುಡಿಯೋ ಮುಖ್ಯರಸ್ತೆಯಲ್ಲಿ ಕಳೆದ 6 ತಿಂಗಳಿಂದ ಎಲ್ಲಿ ನೋಡಿದರೂ, ಧೂಳು, ಧೂಳು, ಧೂಳು.
ಡಾ.ರಾಜಕುಮಾರ್ ಸಮಾದಿ ಬಳಿ ಇರುವ ಕಂಠೀರವ ಸ್ಟುಡಿಯೋ ರಸ್ತೆಯ ಮೂಲಕ ಪೀಣ್ಯ ಕೈಗಾರಿಕಾ ಪ್ರದೇಶದ ಕಡೆಗೆ ಹೋಗುವ ರಸ್ತೆಯಲ್ಲಿ ಕಳೆದ ಆರು ತಿಂಗಳಿಗೂ ಹೆಚ್ಚು ಸಮಯದಿಂದ ರಸ್ತೆಯಲ್ಲಿ ಬಿದ್ದಿರು ಗುಂಡಿಗಳಿಂದ ಸಾರ್ವಜನಿಕರಿಗೆ ಬಹಳ ತೊಂದರೆಯಾಗಿದೆ. ವಾಹನ ಸಂಚಾರ, ಪಾದಚಾರಿಗಳು, ರಸ್ತೆಬದಿ ಇರುವ ಅಂಗಡಿ, ಬೇಕರಿ ಮತ್ತಿತರ ವ್ಯಾಪಾರಿಗಳು ಮಿತಿಮೀರಿದ ಧೂಳಿನಿಂದಾಗಿ ಹಲವು ಆರೋಗ್ಯ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ.
ಬೆಸ್ಕಾಂನವರು ಎಲೆಕ್ಟ್ರಿಕ್ ಕೇಬಲ್ ಅಳವಡಿಸುವುದಕ್ಕಾಗಿ ತೆಗೆದ ಟ್ರೆಂಚ್ ತಿಂಗಳುಗಟ್ಟಲೆ ಮುಚ್ಚದೆ ಹಾಗೇ ಬಿಟ್ಟಿದ್ದರು. ಇತ್ತೀಚೆಗೆ ಟ್ರೆಂಚ್ ಮುಚ್ಚಿದಾರಾದರೂ ರಸ್ತೆಯಲ್ಲಿದ್ದ ಟಾರ್ ಸಂಪೂರ್ಣವಾಗಿ ಕಿತ್ತು ಹೋಗಿರುವುದರಿಂದ ವಾಹನಗಳು ಸಂಚರಿಸುವಾಗ ಇಡೀ ಪ್ರದೇಶ ಧೂಳಿನಿಂದ ಮುಚ್ಚಿಹೋಗುತ್ತಿದೆ. ಈ ಬಗ್ಗೆ ಸ್ಥಳೀಯರು ಎಷ್ಟೇ ಬಾರಿ ಬಿಬಿಎಂಪಿ, ಬೆಸ್ಕಾಂ ಇತರೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ಹೇಳಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಇದು ಹೀಗೆಯೇ ಮುಂದುವರೆದರೆ ಇಲ್ಲಿ ಜೀವನ ಮಾಡುವುದು ಬಹಳ ಕಷ್ಟವಾಗುತ್ತದೆ ಎಂಬುದು ಸ್ಥಳೀಯರ ಅಳಲು. ಅನಿವಾರ್ಯವಾಗಿ ಜೀವನೋಪಾಯಕ್ಕಾಗಿ ದಿನಪೂರ್ತಿ ಧೂಳಿನಲ್ಲಿ ಕೆಲಸ ಮಾಡುವ ಸಣ್ಣಪುಟ್ಟ ಅಂಗಡಿ, ಚರ್ಮ ಕುಟೀರದ ಕಾರ್ಮಿಕರು, ಸದಾ ಕೆಮ್ಮು, ಗಂಟಲು ನೋವು, ಕಣ್ಣು ನೋವು ಇತ್ಯಾದಿ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಇದೇ ರೀತಿ ನಿರ್ಲಕ್ಷ್ಯ ಮುಂದುವರೆದರೆ ಪ್ರಾಣಹಾನಿಯೂ ಸಂಭವಿಸಬಹುದು ಎಂಬುದು ಸ್ಥಳೀಯರ ಆತಂಕ.
