ದುರ್ಗಾಮಹೇಶ್ವರಿ ಅಂಬಾರಿ ಉತ್ಸವ

ವಿಜಯಪುರ : ನವರಾತ್ರಿ ಅಂಗವಾಗಿ ಗಡ್ಡದನಾಯಕನಹಳ್ಳಿಯ ದುರ್ಗಮಹೇಶ್ವರಿ ದೇವಾಲಯದಲ್ಲಿ ದುರ್ಗಾಮಾತೆಯನ್ನು ಮಂಗಳವಾರ ಅಂಬಾರಿಯಲ್ಲಿ ಮೆರವಣಿಗೆ ಮಾಡಲಾಯಿತು. ದೇವಾಲಯದಲ್ಲಿ ವಿಶೇಷ ಪೂಜಾ ಕಾರ್ಯಗಳು ನಡೆಯುತ್ತಿದ್ದು, ದೇವಾಲಯವನ್ನು ವಿವಿಧ ಪುಷ್ವಗಳಿಂದ ಅಂಲಕಾರ ಮಾಡುವುದರೊಂದಿಗೆ ದುರ್ಗಮಹೇಶ್ವರಿ ಅಮ್ಮನವರನ್ನು ಹೂ ಹಾಗೂ ವಜ್ರಾಭರಣಗಳಿಂದ ಅಲಂಕರಿಸಲಾಗಿತ್ತು.

ವಿವಿಧ ಧಾರ್ಮಿಕ ಕಾರ್ಯಕ್ರಮ: ವೇದಪಾರಾಯಣ, ಗಣಪತಿ ಪೂಜೆ, ಕಲಶಾರಾಧನೆ, ಸ್ವಸ್ತಿಪುಣ್ಯಾಹ ವಚನ, ದೇವನಂದಿ, ಪಂಚಗವ್ಯ ರಾ ಬಂಧನ, ಗಣಪತಿಹೋಮ, ನವಗ್ರಹಹೋಮ, ಚಂಡಿಕಾಹೋಮ, ಮಹಾಪೂರ್ಣಾಹುತಿ, ತೀರ್ಥಪ್ರಸಾದ ವಿನಿಯೋಗ ನಡೆಯಿತು. ದಿವ್ಯ ಅಲಂಕಾರ, ಮಹಾಮಂಗಳಾರತಿ ನಡೆಯಿತು.

ಕಲಾ ತಂಡಗಳ ನಡುವೆ ಅಂಬಾರಿ: ಅಮ್ಮನವರ ಉತ್ಸವ ಮೂರ್ತಿಯನ್ನು ಅಲಂಕರಿಸಿ ಅಂಬಾರಿಯಲ್ಲಿ ಕುಳ್ಳಿರಿಸಿ ವಿವಿಧ ಕಲಾ ತಂಡಗಳು, ಗ್ರಾಮ ದೇವತೆಗಳ ಪಲಕ್ಕಿಯೊಂದಿಗೆ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಮೆರವಣೆಗೆ ನಡೆಸಲಾಯಿತು. ಮೆರವಣಿಗೆ ವೇಳೆ ಸಾವಿರಾರು ಭಕ್ತರು ಇಷ್ಟಾರ್ಥ ಸಿದ್ದಿಗೆ ಪ್ರಾರ್ಥನೆ ಸಲ್ಲಿಸಿದರು.

ಕಲಾ ತಂಡಗಳ ಮೆರುಗು : ವಿವಿಧ ಕಲಾ ತಂಡಗಳ ಪ್ರದರ್ಶನ ಭಕ್ತರ ಮನಸೂರೆಗೊಳಿಸಿತು, ವೀರಗಾಸೆ, ಡೊಳ್ಳು ಕುಣಿತ, ಪೂಜಾ ಕುಣಿತ, ಕೇರಳ ವಾದ್ಯಗೋಷ್ಟಿ ಆಕರ್ಷಕವಾಗಿತ್ತು. ದುರ್ಗಾ ಮಹೇಶ್ವರಿ ಜಾತ್ರೋತ್ಸವದ ಪ್ರಯುಕ್ತ ಹರಿಕಥೆ ವಿದ್ವಾನ್​ ಶೀಲಾ ನಾಯ್ಡು ಅವರಿಂದ ಹರಿಕಥೆ ಏರ್ಪಡಿಸಲಾಗಿತ್ತು. ದೇವಾಲಯ ಸಮಿತಿಯಿಂದ ಸಾವಿರಾರು ಭಕ್ತರಿಗೆ ಅನ್ನಪ್ರಸಾದ ವ್ಯವಸ್ಥೆ ಮಾಡಲಾಗಿತ್ತು.