ಹಿರೇಕೆರೂರ ತಾಲೂಕಿನ ರಸ್ತೆ ಪಕ್ಕ ಒಣ ಮರ- ಸವಾರರಿಗೆ ಜೀವಭಯ!

ಹಿರೇಕೆರೂರ: ಪಟ್ಟಣದಿಂದ ತಾವರಗಿ ಮಾರ್ಗವಾಗಿ ರಾಣೆಬೆನ್ನೂರು, ಶಿರಾಳಕೊಪ್ಪ, ಶ್ರೀರಾಮನಕೊಪ್ಪ, ಹಂಸಭಾವಿ, ಮಾಸೂರು ರಸ್ತೆ ಹೀಗೆ ರಾಜ್ಯ ಮತ್ತು ಜಿಲ್ಲಾ ಹೆದ್ದಾರಿಯ ಅಕ್ಕಪಕ್ಕದಲ್ಲಿ ಪುರಾತನ ಮರಗಳಿದ್ದು, ಅವು ಒಣಗಿ ಧರೆಗೆ ಉರುಳುವ ಸ್ಥಿತಿಯಲ್ಲಿದ್ದು, ಅಪಾಯಕ್ಕೆ ಆಹ್ವಾನಿಸುತ್ತಿವೆ.

ಲೋಕೋಪಯೋಗಿ ಮತ್ತು ಕೆಆರ್​ಡಿಸಿಎಲ್ ಅವರಿಗೆ ಸೇರಿದ ಜಿಲ್ಲಾ ಮತ್ತು ರಾಜ್ಯ ಹೆದ್ದಾರಿ ಇಕ್ಕೆಲದಲ್ಲಿ ಹಳೆಯ ಗಿಡ- ಮರಗಳಿದ್ದು, ಅವುಗಳಲ್ಲಿ ಕೆಲವು ಮರಗಳ ಆಯುಷ್ಯ ಬಹುತೇಕ ಮುಗಿದು ಒಣಗಿ ನಿಂತಿವೆ. ಈಗಲೋ ಆಗಲೋ ಬೀಳುವ ಸ್ಥಿತಿಯಲ್ಲಿವೆ. ಈ ಮಾರ್ಗಗಳಲ್ಲಿ ನಿತ್ಯ ಸಾವಿರಾರು ವಾಹನಗಳು, ದ್ವಿಚಕ್ರ ವಾಹನ ಸವಾರರು, ಶಾಲೆ-ಕಾಲೇಜ್​ಗಳ ವಿದ್ಯಾರ್ಥಿಗಳು ಸೇರಿ ಸಹಸ್ರಾರು ಸಂಖ್ಯೆಯಲ್ಲಿ ಸಾರ್ವಜನಿಕರು ಸಂಚರಿಸುತ್ತಿದ್ದಾರೆ. ಹೀಗಾಗಿ ಒಣಗಿದ ಮರಗಳಿಂದ ಅಪಾಯ ಕಟ್ಟಿಟ್ಟ ಬುತ್ತಿಯಾಗಿದೆ. ಹೀಗೆ ಸಾಗುವಾಗ ಅಕಸ್ಮಾತ್ ಮರಗಳು ಉರುಳಿ ಬಿದ್ದರೆ ಯಾರು ಗತಿ? ಎಂಬಂತಾಗಿದೆ.

ಕೆಲ ತಿಂಗಳುಗಳ ಹಿಂದೆ ಹೆಸ್ಕಾಂ ಕಚೇರಿಯ ಬಳಿ ಒಣಗಿದ ಮರವೊಂದು ಬೈಕ್ ಮೇಲೆ ಏಕಾಏಕಿ ಬಿದ್ದಿದ್ದರಿಂದ ಹೆಸ್ಕಾಂನ ಇಬ್ಬರು ನೌಕರರು ಸಾವನ್ನಪ್ಪಿದ್ದು, ಒಬ್ಬ ಗಂಭೀರವಾಗಿ ಗಾಯಗೊಂಡಿದ್ದು, ಈಗಲೂ ಎದ್ದು ಓಡಾಡದ ಸ್ಥಿತಿಯಲ್ಲಿದ್ದಾರೆ. ಆ ಸಮಯದಲ್ಲಿ ಎಚ್ಚೆತ್ತುಕೊಂಡ ಅರಣ್ಯ ಮತ್ತು ಲೋಕೋಪಯೋಗಿ ಇಲಾಖೆಯವರು, ಸ್ವಲ್ಪಮಟ್ಟಿಗೆ ಮಾಸೂರು ರಸ್ತೆಯಲ್ಲಿ ಮರಗಳನ್ನು ತೆರವುಗೊಳಿಸಿದ್ದರು. ಆದರೂ ಇನ್ನು ಬಹಳಷ್ಟು ಮರಗಳು ಬಾಕಿಯಿದ್ದು, ಆ ಮರಗಳನ್ನು ತೆರವುಗೊಳಿಸುವ ಗೋಜಿಗೆ ಹೋಗುತ್ತಿಲ್ಲ. ಈ ಬಗ್ಗೆ ಲೋಕೋಪಯೋಗಿ ಇಲಾಖೆಯವರು ಹಲವು ಬಾರಿ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದಾರೆ. ಆದರೆ, ಯಾವ ಕಾರಣಕ್ಕೆ ಕಾಲಹರಣ ಮಾಡುತ್ತಿದ್ದಾರೆ ಎಂಬುದು ತಿಳಿಯದಂತಾಗಿದೆ. ಮತ್ತಷ್ಟು ಪ್ರಾಣ ಹಾನಿಯಾಗುವ ಮುನ್ನವೇ ಒಣಗಿದ ಮತ್ತು ರಸ್ತೆ ಮೇಲೆ ಬಾಗಿರುವ ಮರಗಳನ್ನು ತೆರವುಗೊಳಿಸಲು ಮುಂದಾಗಬೇಕು ಎಂಬುದು ವಾಹನ ಸವಾರರು ಹಾಗೂ ವಾಯುವಿಹಾರಿಗಳ ಆಗ್ರಹವಾಗಿದೆ.