ಉಡುಪಿ: ಶಿರಿಬೀಡು ವಾರ್ಡ್ನ ಹೋಟೆಲ್ ಶಾಂಭವಿ ಸಮೀಪದ ನಾಲ್ಕು ಮನೆಗಳಿಗೆ ಗುರುವಾರ ಬೆಳಗ್ಗೆ ಚರಂಡಿ ನೀರು ನುಗ್ಗಿದೆ. ನಗರಸಭಾ ಸ್ವಚ್ಛತಾ ಸಿಬ್ಬಂದಿ ದುರಸ್ತಿಪಡಿಸಿದ ಬಳಿಕ ಮನೆ ಮಂದಿ ನೆಮ್ಮದಿಯ ನಿಟ್ಟುಸಿರು ಬಿಡುವಂತಾಗಿದೆ.
ಶಿರಿಬೀಡು ವಾರ್ಡ್ ತಗ್ಗು ಪ್ರದೇಶವಾಗಿದ್ದು, ಒಂಬತ್ತು ವರ್ಷಗಳಿಂದ ಇಲ್ಲಿ ಒಳಚರಂಡಿ ಸಮಸ್ಯೆಯಿಂದಾಗಿ ವಾರದಲ್ಲಿ ಎರಡು ಸಲ ಹೀಗೆ ಕೊಳಚೆ ನೀರು ಮನೆ ಬಾಗಿಲಿಗೆ ಬರುತ್ತಿವೆ. ಸರ್ವೀಸ್ ಬಸ್ ನಿಲ್ದಾಣ ಸುತ್ತಮುತ್ತಲಿನ ಹೋಟೆಲ್ಗಳು, ಆಸ್ಪತ್ರೆಗಳು, ಬಹುಮಹಡಿ ಕಟ್ಟಡಗಳಿಂದ ಶೌಚಗೃಹದ ನೀರು ನೇರವಾಗಿ ಒಳಚರಂಡಿಗೆ ಸೇರುತ್ತಿದೆ. ಇದರಿಂದ ಶಿರಿಬೀಡುವಿನಿಂದ ಬನ್ನಂಜೆ ತನಕ ಚರಂಡಿ ಸದಾಕಾಲ ತುಂಬಿಕೊಂಡಿರುತ್ತದೆ. ಕೆಲವೊಮ್ಮೆ ಕಸಕಡ್ಡಿಗಳು ಸೇರಿ ನೀರಿನ ಸರಾಗ ಹರಿವಿಗೆ ತೊಂದರೆಯಾಗಿ ತ್ಯಾಜ್ಯ ನೀರು ರಸ್ತೆಯಲ್ಲೇ ನಿಲ್ಲುತ್ತದೆ ಎನ್ನುತ್ತಾರೆ ಸ್ಥಳೀಯರು.
ವೆಟ್ವೆಲ್ ಕಾಮಗಾರಿಯ ಸಮಸ್ಯೆ: ನಗರದಲ್ಲಿ ಅನೇಕ ವರ್ಷದ ಹಿಂದೆ ಅಳವಡಿಸಿದ್ದ ಇಟ್ಟಿಗೆ ಚೇಂಬರ್ಗಳು ಸರಿಯಲ್ಲದೆ ಸಮಸ್ಯೆಯಾಗುತ್ತಿದ್ದು, ಒಂದು ಅಡಿ ಪೈಪ್ಗಳನ್ನು ಹಾಕಿ ಹೊಸ ಲೈನ್ ಕಾಮಗಾರಿ ನಡೆಯುತ್ತಿದೆ. ಆದರೆ ಕರಾವಳಿ ಬೈಪಾಸ್ ಬಳಿ ರಾಷ್ಟ್ರೀಯ ಹೆದ್ದಾರಿ ಸಮೀಪದ ಶಾರದಾ ವೆಟ್ವೆಲ್ ಕಾಮಗಾರಿಯನ್ನು ನವಯುಗ ಸಂಸ್ಥೆ ಪೂರ್ಣಗೊಳಿಸದ ಕಾರಣ ಚರಂಡಿ ನೀರು ಸಮರ್ಪಕವಾಗಿ ನಿಟ್ಟೂರು ಎಸ್ಟಿಪಿ ಘಟಕಕ್ಕೆ ತಲುಪುತ್ತಿಲ್ಲ. ಇದರಿಂದ ಒಳಚರಂಡಿ ಸ್ವಲ್ಪ ಬ್ಲಾಕ್ ಆದರೂ ನೀರು ಉಕ್ಕಿ ಹರಿಯುತ್ತಿದೆ.
