ಉಳ್ಳಾಲದಲ್ಲಿ ಕಡಲ್ಕೊರೆತ ಮುಗಿಯದ ಸಮಸ್ಯೆ. ಮೊಗವೀರಪಟ್ಣದಲ್ಲಿ 2014ರಲ್ಲಿ ಶಾಶ್ವತ ಪರಿಹಾರ ಕಾಮಗಾರಿ 249 ಕೋಟಿ ರೂ. ವೆಚ್ಚದಲ್ಲಿ ಆರಂಭಗೊಂಡು ಕೆಲವರ್ಷಗಳಲ್ಲಿ ಮುಗಿದು ಅಲ್ಲಿನ ಸಮಸ್ಯೆಗೆ ಒಂದು ಹಂತದ ಪರಿಹಾರ ದೊರಕಿತ್ತು. ಇದರಿಂದಾಗಿ ಮುಕ್ಕಚ್ಚೇರಿ, ಕಿಲೆರಿಯಾ ನಗರ, ಕೈಕೋ, ಸೋಮೇಶ್ವರದ ಬಟ್ಟಪ್ಪಾಡಿ, ಉಚ್ಚಿಲದಲ್ಲಿ ಸಮಸ್ಯೆ ಆರಂಭವಾಗಿದೆ. ಇಲ್ಲಿಯೂ ಶಾಶ್ವತ ಪರಿಹಾರ ಕಾಮಗಾರಿ ಆರಂಭಗೊಂಡಿದ್ದರೂ ನಿಗದಿತ ಗುರಿ ತಲುಪದ ಕಾರಣ ಪ್ರತಿವರ್ಷ ಮನೆ, ವಸತಿಗೃಹಗಳು ಸಮುದ್ರ ಪಾಲಾಗುವುದು ಸಾಮಾನ್ಯ ಎನಿಸಿದೆ. ತಾತ್ಕಾಲಿಕ ಕಾಮಗಾರಿಗೆ ಅನುದಾನ ಸಿಗದ ಕಾರಣ ಕೆಲವು ಮನೆಗಳು, ಉಚ್ಚಿಲದಲ್ಲಿ ರಸ್ತೆ ಸಮುದ್ರ ಪಾಲಾಗಿತ್ತು. ಕಳೆದ ವರ್ಷ ಮುಖ್ಯಮಂತ್ರಿ ಸಹಿತ ಸಚಿವರು ಸ್ಥಳಕ್ಕೆ ಭೇಟಿ ನೀಡಿದ್ದಾರೆ. ಬಟ್ಟಪ್ಪಾಡಿಯಲ್ಲಿ ಸೀ ವೇವ್ ಬ್ರೇಕರ್ ತಂತ್ರಜ್ಞಾನ ಬಳಸಿ ಶಾಶ್ವತ ಕಾಮಗಾರಿ ನಡೆಸಲಾಗುವುದು ಎಂದು ಭರವಸೆಯನ್ನೂ ನೀಡಲಾಗಿತ್ತು. ಪ್ರಸ್ತುತ ಕಾಂಗ್ರೆಸ್ ಸರ್ಕಾರ ಬಂದಿದ್ದು, ಶಾಶ್ವತ ಕಾಮಗಾರಿ ನಿರೀಕ್ಷೆ ಜನರಲ್ಲಿದೆ.
