ಉಡುಪಿ: ಚರಂಡಿ ಅವ್ಯವಸ್ಥೆಯಿಂದ ನಗರದ ಡ್ರೈನೇಜ್ ನೀರು ರಾಷ್ಟ್ರೀಯ ಹೆದ್ದಾರಿ ಆ್ಯಬ್ಕೋ ಸ್ಟೀಲ್ ಸಮೀಪ ಕಪ್ಪೆಟ್ಟು ಪರಿಸರದಲ್ಲಿ ಹರಡಿ ಹಲವಾರು ಬಾವಿಗಳು ಕಲುಷಿತಗೊಂಡಿವೆ. ಈಗಾಗಲೆ ಶೇ.70ಕ್ಕೂ ಅಧಿಕ ಬಾವಿಗಳನ್ನು ಚರಂಡಿ ತ್ಯಾಜ್ಯ ನೀರು ಕಬಳಿಸಿದ್ದು, ಉಳಿದ ಶೇ.30ಕ್ಕೂ ಶುದ್ಧ ನೀರು ಚರಂಡಿ ನೀರಿಗೆ ಬಲಿಯಾಗುತ್ತಿರುವುದು ತೀವ್ರ ಆತಂಕಕ್ಕೆ ಕಾರಣವಾಗಿದೆ. ಪರಿಸರದ ಜನ ದಿನದ 24 ಗಂಟೆ ಮೂಗು ಬಾಯಿ ಮುಚ್ಚಿಕೊಂಡೇ ಬದುಕಬೇಕಾದ ಪರಿಸ್ಥಿತಿ, ಆರೋಗ್ಯ ಭೀತಿ ಬಗ್ಗೆ ವಿಜಯವಾಣಿ ಈ ಹಿಂದೆ ವಿಸ್ತೃತ ವರದಿ ಪ್ರಕಟಿಸಿತ್ತು. ಇಷ್ಟಾದರೂ ನಗರಸಭೆ ಎಚ್ಚೆತ್ತುಕೊಳ್ಳದೆ ಎರಡು ದಿನಗಳ ಹಿಂದಷ್ಟೆ ಕಿನ್ನಿಮೂಲ್ಕಿ ಆ್ಯಬ್ಕೋ ಸ್ಟೀಲ್ ಬಳಿ ಡ್ರೈನೈಜ್ ನಿರ್ವಹಣಾ ಘಟಕ(ವೆಟ್ವೆಲ್-2) ಸರಿಪಡಿಸಿದೆ. ಪಂಪ್ ಸರಿಪಡಿಸಿದ ಕಾರಣ ಪ್ರಸಕ್ತ ಉಕ್ಕೇರಿದ ಚರಂಡಿ ನೀರು ಖಾಲಿಯಾಗಿದ್ದರೂ, ಪರಿಸರದಲ್ಲಿ ದುರ್ವಾಸನೆ, ಅಂತರ್ಜಲ ಒಳಗೆ ಚರಂಡಿ ನೀರು ಸೇರಿ ಪರಿಸರದ ಬಾವಿಗಳೆಲ್ಲ ಕಲುಷಿತಗೊಂಡಿದೆ.
