ಜಿ.ನಾಗರಾಜ್ ಬೂದಿಕೋಟೆ
ಟೊಮ್ಯಾಟೊ, ಆಲೂಗಡ್ಡೆ ಸೇರಿ ಇತರ ವಾಣಿಜ್ಯ ಬೆ ಬೆಳೆದು ಹೆಸರಾಗಿದ್ದ ಕೋಲಾರ ಜಿಲ್ಲೆ ರೈತ ಈಗ ಡ್ರ್ಯಾಗನ್ ಫ್ರೂಟ್ ಬೆಳೆಯುವ ಮೂಲಕ ಇತರ ರೈತರಿಗೆ ಮಾದರಿಯಾಗುತ್ತಿದ್ದಾರೆ.
ವಿವಿಧ ದೇಶಗಳಿಗೆ ಟೊಮ್ಯಾಟೊ ಹಾಗೂ ಇನ್ನಿತರ ತರಕಾರಿ ಪೂರೈಸಿದ್ದ ಜಿಲ್ಲೆಯಲ್ಲೀಗ ಕೆಂಪುರಾಣಿಯೆಂದೇ ಗುರುತಿಸಿಕೊಂಡಿರುವ ಆರೋಗ್ಯಕ್ಕೆ ರಾಮ ಬಾಣವಾದ ಡ್ರ್ಯಾಗನ್ ಫ್ರೂಟ್ ಬೆಳೆಯುವ ಮೂಲಕ ಇಲ್ಲಿನ ರೈತ ಇತರರಿಗೆ ಸ್ಫೂರ್ತಿಯಾಗಿದ್ದಾರೆ.
ಜಿಲ್ಲೆಯಲ್ಲಿ ಪ್ರತಿ ಬಾರಿಯೂ ಒಂದೇ ತೆರನಾದ ಬೆಳೆ ಬೆಳೆದು ಹಲವರು ಕೈ ಸುಟ್ಟುಕೊಂಡ ಅನೇಕ ನಿದರ್ಶನಗಳಿವೆ. ಅಂತೆಯೇ, ತರಕಾರಿ ಬೆಳೆ ಬೆಳೆದು ನಷ್ಟ ಅನುಭವಿಸಿದ್ದ ತಾಲೂಕಿನ ನತ್ತಿಬೆಲೆ ಗ್ರಾಮದ ರೈತ ನಾಗೇಶ್ ಡ್ರ್ಯಾಗನ್ ಫ್ರೂಟ್ ಬೆಳೆಯುವ ಮೂಲಕ ಆರ್ಥಿಕ ಪ್ರಗತಿ ಕಂಡಿದ್ದಾರೆ.
10ನೇ ತರಗತಿವರೆಗೂ ವಿದ್ಯಾಭ್ಯಾಸ ಮಾಡಿರುವ ರೈತ ನಾಗೇಶ್, ಸಾಮಾಜಿಕ ಜಾಲತಾಣದಲ್ಲಿ ಡ್ರ್ಯಾಗನ್ ಫ್ರೂಟ್ ಬೆಳೆಯ ಬಗ್ಗೆ ಮಾಹಿತಿ ಪಡೆದು, ನಂತರ ಬೆಂಗಳೂರಿನ ಯಲಹಂಕದಿಂದ ಪಿಂಕ್ ತಳಿಯ ಡ್ರ್ಯಾಗನ್ ಫ್ರೂಟ್ ಸಸಿಗಳನ್ನು ತಂದು 3 ಎಕರೆಯಲ್ಲಿ ನಾಟಿ ಮಾಡಿ ಪೋಷಣೆ ಮಾಡಿದ್ದಾರೆ. ಆರಂಭದಲ್ಲಿ ಬೆಳೆಗೆ ಸುಮಾರು 15 ಲಕ್ಷ ಬಂಡವಾಳ ಹಾಕಿದ್ದ ರೈತ ಇಂದು ಒಂದು ಕೊಯ್ಲಿಗೆ ಸುಮಾರು ₹5 ಲಕ್ಷದವರೆಗೂ ಆದಾಯ ಪಡೆಯುತ್ತಿದ್ದಾರೆ. ಬೆಳೆಯಲ್ಲಿ ಒಮ್ಮೆ ಇಳುವರಿ ಕಂಡರೆ 6 ತಿಂಗಳ ಕಾಲ ತಿಂಗಳಿಗೆ 4 ಬಾರಿ ಕೊಯ್ಲು ಬರುತ್ತದೆ. ಒಂದು ಎಕರೆಗೆ 1 ಟನ್ನಷ್ಟು ಇಳುವರಿ ಬರುತ್ತಿದ್ದು, ಪ್ರತಿ ಕೆಜಿ 150 ರೂ.ನಂತೆ ಬೆಂಗಳೂರು ಸೇರಿ ಇತರ ನಗರ ಪ್ರದೇಶಗಳಿಗೆ ನೇರವಾಗಿ ತೋಟದಿಂದಲೇ ವಾರಕ್ಕೊಮ್ಮೆ ಮಾರಾಟ ಮಾಡುವ ಮೂಲಕ ನಾಗೇಶ್ ಕೈತುಂಬ ಹಣ ಸಂಪಾದಿಸುತ್ತಿದ್ದಾರೆ.
