ಹೃದಯಾಘಾತ.. ಬೇಡ ಅನಗತ್ಯ ಆತಂಕ

ಉಡುಪಿ ಜಿಲ್ಲಾ ಸರ್ಜನ್​ ಡಾ. ಎಚ್​. ಅಶೋಕ ಸಲಹೆ

ಜನರಿಗೆ ಶ್ರಮದಾಯಕ ಕೆಲಸಕ್ಕೆ ಕರೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಇತ್ತೀಚೆಗಿನ ದಿನಗಳಲ್ಲಿ ದಿಢೀರ್​ ಹೃದಯಾಘಾತ ಪ್ರಕರಣ ಹೆಚ್ಚುತ್ತಿರುವ ಕುರಿತು ಜನತೆಯಲ್ಲಿ ಆತಂಕ ಸೃಷ್ಟಿಯಾಗಿದೆ. ಆದರೆ, ಉಡುಪಿ ಜಿಲ್ಲೆಯಲ್ಲಿ ಹಠಾತ್​ ಹೃದಯಾಘಾತದಿಂದ ಸಾವಿನ ಪ್ರಕರಣ ಉಂಟಾಗಿಲ್ಲ. ಹೀಗಾಗಿ ಅನಗತ್ಯ ಆತಂಕಕ್ಕೆ ಒಳಗಾಗಬಾರದು ಎಂದು ಉಡುಪಿ ಜಿಲ್ಲಾ ಆಸ್ಪತ್ರೆಯ ಸರ್ಜನ್​ ಡಾ. ಎಚ್​. ಅಶೋಕ ಸಲಹೆ ನೀಡಿದ್ದಾರೆ.

ಉಡುಪಿ ಜಿಲ್ಲೆಯಲ್ಲಿ ಪ್ರತಿ ತಿಂಗಳೂ ತುರ್ತು ಚಿಕಿತ್ಸಾ ವಿಭಾಗ ಅಥವಾ ವೈದ್ಯಕೀಯ ವಿಭಾಗದಲ್ಲಿ ಅಂದಾಜು 1,500 ಜನರು ಇಸಿಜಿ ಮಾಡಿಸಿಕೊಳ್ಳುತ್ತಾರೆ. ಈ ಸಂಖ್ಯೆ ಇತ್ತೀಚೆಗಿನ ದಿನಗಳಲ್ಲಿ ಏರಿಕೆಯೂ ಆಗಿಲ್ಲ. ಹಿಂದಿನ ಅಂಕಿ-ಅಂಶ ನೋಡಿದಾಗ ಇಸಿಜಿ ಮಾಡಿಸಿಕೊಳ್ಳುವವರ ಸಂಖ್ಯೆ ಯಥಾಸ್ಥಿತಿಯಲ್ಲಿಯೇ ಇದೆ ಎಂದು ವಿಜಯವಾಣಿಗೆ ತಿಳಿಸಿದ್ದಾರೆ.

ಐವರು ಸಾವು

ಬದಲಾದ ಆಹಾರ ಪದ್ಧತಿ

ದಶಕದಿಂದ ಈಚೆಗೆ ಜನರ ಜೀವನ ಶೈಲಿ ಹಾಗೂ ಆಹಾರ ವ್ಯವಸ್ಥೆ ಸಂಪೂರ್ಣ ಬದಲಾಗಿದೆ. ಕೋವಿಡ್​ ಸಂದರ್ಭದಲ್ಲಿ ಹಾಗೂ ಅದರ ಬಳಿಕ ನೌಕರಸ್ಥರು ದೈಹಿಕ ಶ್ರಮ ಪಡುತ್ತಿಲ್ಲ. ವ್ಯಾಯಾಮ ಮಾಡುತ್ತಿಲ್ಲ. ಸಾಫ್ಟ್ ವೇರ್​ ಕಂಪನಿಯ ಉದ್ಯೋಗಿಗಳಂತೂ ಕುಳಿತಲ್ಲೇ ಕೆಲಸ ಅಥವಾ ವರ್ಕ್​ ಫ್ರಂ​ ಹೋಮ್​ ಕೆಲಸಕ್ಕೆ ಸೀಮಿತರಾಗಿದ್ದಾರೆ. ಮುಖ್ಯವಾಗಿ ಯುವ ಸಮುದಾಯ ಸರಿಯಾಗಿ ನಿದ್ದೆಯನ್ನೂ ಮಾಡುತ್ತಿಲ್ಲ. ಜಂಕ್​ ಫುಡ್​ಗಳನ್ನೇ ಹೆಚ್ಚು ಸೇವಿಸುತ್ತಿದ್ದಾರೆ. ಬದಲಾದ ಈ ಪದ್ಧತಿಯಿಂದ ಹೃದಯಾಘಾತಕ್ಕೆ ಕಾರಣ ಆಗುತ್ತಿರಬಹುದು ಎಂದರು.

ಜಾಗೃತಿಗೆ ಎನ್​ಸಿಡಿ ಕಾರ್ಯಕ್ರಮ

ಜನರಲ್ಲಿ ಆರೋಗ್ಯ ಜಾಗೃತಿ ಮಾಡುವ ನಿಟ್ಟಿನಲ್ಲಿ ಉಡುಪಿ ಜಿಲ್ಲೆಯಲ್ಲಿ ಎನ್​ಸಿಡಿ (ನಾನ್​ ಕಮ್ಯುನಿಕೇಬಲ್​ ಡಿಸೀಸ್​) ಕಾರ್ಯಕ್ರಮ ಆಯೋಜಿಸಿದ್ದೇವೆ. ಅದಕ್ಕೆಂದೇ ತಜ್ಞರ ತಂಡ ರಚಿಸಲಾಗಿದೆ. ಇದು ಕೇವಲ ಜಿಲ್ಲಾ ಆಸ್ಪತ್ರೆಯಲ್ಲಷ್ಟೇ ಅಲ್ಲದೆ, ಬ್ಯಾಂಕ್​, ಫಿಶಿಂಗ್​ ಫ್ಯಾಕ್ಟರಿ, ಹೆಚ್ಚು ಕಾರ್ಮಿಕರಿರುವ ಪ್ರದೇಶ, ಗ್ರಾಮೀಣ ಪ್ರದೇಶ ಮುಂತಾದೆಡೆ ಎನ್​ಜಿಒ ಅಥವಾ ಸಂಘ-ಸಂಸ್ಥೆಗಳ ಮೂಲಕ ಆರೋಗ್ಯದ ಕುರಿತಾಗಿ ತಿಳಿವಳಿಕೆ ನೀಡಲಾಗುತ್ತಿದೆ ಎಂದು​ ಡಾ. ಎಚ್​. ಅಶೋಕ ತಿಳಿಸಿದ್ದಾರೆ.