ಹಾರಂಗಿ ಮತ್ತು ಹೇಮಾವತಿ ನಾಲೆ ನೀರು ಒಟ್ಟಿಗೆ ಸೇರುವ ಸಂಗಮ ಈ ಕೆರೆಯಾಗಿದೆ. ಕೆರೆ ಏರಿ ಮಾರ್ಗವಾಗಿ ಕೊಣನೂರಿನಿಂದ ಕೆರೆಕೋಡಿ, ಹಂಡ್ರಂಗಿ, ಬೆಮ್ಮತ್ತಿ, ಕೊಡಗು ಜಿಲ್ಲೆ, ಮಲ್ಲಿಪಟ್ಟಣ ಸೇರಿದಂತೆ ಹತ್ತಾರು ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸಲಿದೆ. ಅಲ್ಲದೆ, ರಾಜ್ಯ ಹೆದ್ದಾರಿ ಕೆರೆ ಏರಿ ಮೇಲೆ ನಿರ್ಮಾಣವಾಗಿದ್ದು, ಏರಿ ಮೇಲೆ ರಸ್ತೆ ನಿರ್ಮಾಣವಾಗಿದೆಯಾದರೂ ಗುಣಮಟ್ಟಕ್ಕೆ ಹೆಚ್ಚಿನ ಆದ್ಯತೆ ನೀಡಿಲ್ಲ. ಕೆರೆ ಏರಿ ಮೇಲಿನ ರಸ್ತೆ ಅಂದಾಜು ಒಂದು ಕಿಮೀ ದೂರವಿದ್ದು, ರಸ್ತೆ ವಿಸ್ತರಣೆ ಮಾಡುವಾಗ ಕಾಮಗಾರಿಯನ್ನು ವೈಜ್ಞಾನಿಕವಾಗಿ ಕೈಗೊಳ್ಳದ ಪರಿಣಾಮ ಕೆರೆಏರಿಯ ಮಧ್ಯಭಾಗದಲ್ಲಿನ ಸುಮಾರು 200 ಮೀಟರ್ ಡಾಂಬರ್ ರಸ್ತೆ ಈಗ ಮೂರು ಅಡಿಗೂ ಹೆಚ್ಚು ಕುಸಿತಕ್ಕೆ ಒಳಗಾಗಿದೆ.
