ವಿಜಯವಾಣಿ ಸುದ್ದಿಜಾಲ ದೊಡ್ಡಬಳ್ಳಾಪುರ
ಕಾನೂನು ಬಾಹಿರ ಕೃತ್ಯಗಳಲ್ಲಿ ಸೈಬರ್ ಅಪರಾಧವು ಸೇರಿಕೊಂಡಿದ್ದು, ಎಚ್ಚರಿಕೆಯಿಂದ ಹೆಜ್ಜೆಯನ್ನಿರಿಸಬೇಕು ಎಂದು ಭಾರತೀಯ ನೌಕಾದಳದ ನಿವೃತ್ತ ಅಧಿಕಾರಿ ವಿ.ಮಹೇಶ್ ಹೇಳಿದರು.
ನಗರದ ಆರ್.ಎಲ್.ಜಾಲಪ್ಪ ಇನ್ಸ್ಟಿಟ್ಯೂಷನ್ಸ್ ಕಾಲೇಜಿನ ಆವರಣದಲ್ಲಿ ಲಯನ್ಸ್ ಕ್ಲಬ್ ಆಫ್ ದೊಡ್ಡಬಳ್ಳಾಪುರ, ಆರ್.ಎಲ್.ಜಾಲಪ್ಪ ಇನ್ಸ್ಟಿಟ್ಯೂಷನ್ಸ್ ಹಾಗೂ ಲಯನ್ಸ್ ಕ್ಲಬ್ ಆಫ್ ಬೆಂಗಳೂರು, ಸೋಮೇಶ್ವರಪುರ ಸಹಯೋಗದೊಂದಿಗೆ ಆರ್.ಎಲ್.ಜಾಲಪ್ಪ ತಾಂತ್ರಿಕ ಮಹಾವಿದ್ಯಾಲಯ ಹಾಗೂ ದೇವರಾಜ ಅರಸ್ ಪಿಯು ಕಾಲೇಜು ವಿದ್ಯಾರ್ಥಿಗಳಿಗೆ ಸೈಬರ್ ಅಪರಾಧಗಳಿಂದ ಶಿಕ್ಷಣ ಸಂಸ್ಥೆಯಲ್ಲಿ ಆಗುತ್ತಿರುವ ತೊಂದರೆಗಳ ಕುರಿತು ಆಯೋಜಿಸಿದ ಜಾಗೃತಿ ಕಾರ್ಯಕ್ರಮದಲ್ಲಿ ಮಾತನಾಡಿದರು.
ಸೈಬರ್ ಅಪರಾಧಗಳು ಸಾಂಪ್ರದಾಯಿಕ ಸ್ವರೂಪದ ಕಳ್ಳತನ, ವಂಚನೆ, ಖೋಟಾ, ಮಾನಹಾನಿ ಮತ್ತು ಕಿಡಿಗೇಡಿತನದಂತಹ ಕ್ರಿಮಿನಲ್ ಚಟುವಟಿಕೆಗಳನ್ನು ಒಳಗೊಂಡಿರಬಹುದು. ಇವೆಲ್ಲವೂ ಭಾರತೀಯ ದಂಡ ಸಂಹಿತೆಗೆ ಒಳಪಟ್ಟಿರುತ್ತವೆ. ಕಂಪ್ಯೂಟರ್ಗಳ ದುರುಪಯೋಗವು ಮಾಹಿತಿ ತಂತ್ರಜ್ಞಾನ ಕಾಯ್ದೆ ಮೂಲಕ ಪರಿಹರಿಸಲ್ಪಟ್ಟ ಹೊಸ ಯುಗದ ಅಪರಾಧಗಳ ಹಾದಿಗೆ ಜನ್ಮ ನೀಡಿದೆ ಎಂದರು.
ಸಾಮಾಜಿಕ ಜಾಲತಣ ಬಳಕೆಗೆ ಎಚ್ಚರ: ಸೈಬರ್ ಅಪರಾಧಗಳನ್ನು ಎರಡು ರೀತಿಯಲ್ಲಿ ವರ್ಗೀಕರಿಸಬಹುದು. ವಿಷಯವು ನಿರ್ದಿಷ್ಟವಲ್ಲದ ರೀತಿಯಲ್ಲಿ ಆಕ್ರಮಣಕಾರಿಯಾಗಬಹುದು, ಕಿರುಕುಳವು ನಿರ್ದಿಷ್ಟ ವ್ಯಕ್ತಿಗಳಲ್ಲಿ ಅಶ್ಲೀಲ ಮತ್ತು ಅವಹೇಳನಕಾರಿ ಕಾಮೆಂಟ್ಗಳನ್ನು ನಿರ್ದೇಶಿಸುತ್ತದೆ. ಉದಾಹರಣೆಗೆ ಲಿಂಗ, ಜನಾಂಗ, ಧರ್ಮ, ರಾಷ್ಟ್ರೀಯತೆ, ಲೈಂಗಿಕ ದೃಷ್ಟಿಕೋನ, ಚಾಟ್ ರೂಮ್ಗಳಲ್ಲಿ, ನ್ಯೂಸ್ಗ್ರೂಪ್ಗಳ ಮೂಲಕ ಮತ್ತು ಆಸಕ್ತ ಪಕ್ಷಗಳಿಗೆ ದ್ವೇಷದ ಇ-ಮೇಲ್ ಕಳುಹಿಸುವ ಮೂಲಕ ಇದು ಸಂಭವಿಸುತ್ತದೆ. ಅವಹೇಳನಕಾರಿ ಅಥವಾ ಆಕ್ರಮಣಕಾರಿ ಎಂದು ಕಂಡುಬರುವ ಯಾವುದೇ ಕಾಮೆಂಟ್ ಅನ್ನು ಕಿರುಕುಳವೆಂದು ಪರಿಗಣಿಸಲಾಗುತ್ತದೆ. ಸಾಮಾಜಿಕ ಜಾಲತಾಣ ಬಳಕೆಯಲ್ಲಿ ಎಚ್ಚರಿಕೆಯಿಂದ ನಡೆದುಕೊಳ್ಳಬೇಕು ತಿಳಿಸಿದರು.
ಆರ್.ಎಲ್.ಜಾಲಪ್ಪ ಲಯನ್ಸ್ ಸಂಸ್ಥೆ ಅಧ್ಯಕ್ಷ ಡಾ.ಎಂ.ಶ್ರೀನಿವಾಸರೆಡ್ಡಿ, ಸೋಮೇಶ್ವರಪುರ ಲಯನ್ಸ್ ಸಂಸ್ಥೆ ಅಧ್ಯಕ್ಷ ಎ.ಜಗನ್ನಾಥ್, ಪ್ರಾಂಶುಪಾಲ ವಿಜಯ ಕಾರ್ತಿಕ್ ಇದ್ದರು.
