ರೇಷ್ಮೆ ಬೆಳೆದು ರಾಜ್ಯಪ್ರಶಸ್ತಿ ಗಿಟ್ಟಿಸಿದ ರತ್ನಮ್ಮ ; 1 ಎಕರೆಯಲ್ಲಿ 3.83 ಲಕ್ಷ ರೂ. ಲಾಭ ಗಳಿಸಿದ ಹಿರಿಯ ಮಹಿಳೆ

ದೊಡ್ಡಬಳ್ಳಾಪುರ: ತೂಬಗೆರೆ ಹೋಬಳಿ ಸೀಗೇಹಳ್ಳಿಯ ರತ್ನಮ್ಮ ಎಂಬುವರು ಕಡಿಮೆ ಜಮೀನಿನಲ್ಲಿ ಹೆಚ್ಚು ಲಾಭ ಗಳಿಸಿ ರಾಜ್ಯಮಟ್ಟದ ಪ್ರಗತಿಪರ ಮಹಿಳಾ ರೇಷ್ಮೆ ಬೆಳಗಾರರ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

ಇದರೊಂದಿಗೆ ಕಸಬಾ ಹೋಬಳಿ ಮರಳೇನಹಳ್ಳಿ ಗ್ರಾಮದ ತಿಮ್ಮರಾಜು ಗಂಗಪ್ಪ ಅವರು ಪುರುಷ ವಿಭಾಗದಲ್ಲಿ ಬೆಂಗಳೂರು ಗ್ರಾಮಾಂತರ ಜಿಲ್ಲಾ ಮಟ್ಟದ ದ್ವಿತೀಯ ಸ್ಥಾನ ಪಡೆದುಕೊಂಡು ತಾಲೂಕಿಗೆ ಗೌರವ ತಂದುಕೊಟ್ಟಿದ್ದಾರೆ. ನಂದಿ ಬೆಟ್ಟ, ಚನ್ನರಾಯಸ್ವಾಮಿ ಬೆಟ್ಟದ ಸಾಲಿನಲ್ಲಿ ಬರುವ ಸೀಗೆಹಳ್ಳಿಯ ರತ್ಮಮ್ಮ ರಾಮಯ್ಯ ಅವರು 2020-21ನೇ ಸಾಲಿನಲ್ಲಿ ಒಂದು ಎಕರೆಯಲ್ಲಿ ವೆಚ್ಚ ಹೊರತುಪಡಿಸಿ 3.83 ಲಕ್ಷ ರೂಪಾಯಿ ಲಾಭ ಪಡೆದು, ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದಾರೆ.

ರೈತರು ಸಾಲ ಬಾಧೆಯಿಂದ ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವ ಸಂದರ್ಭದಲ್ಲಿ ರತ್ನಮ್ಮ ಅವರು ಸರ್ಕಾರದ ಯೋಜನೆಗಳನ್ನು ಸಮರ್ಪಕವಾಗಿ ಬಳಸಿಕೊಂಡು, ರೇಷ್ಮೆ ಇಲಾಖೆ ಅಧಿಕಾರಿಗಳ ಸಲಹೆ ಸೂಚನೆ ಪಾಲಿಸಿ ಆರ್ಥಿಕವಾಗಿ ಸಾಧನೆ ಮಾಡಿದ್ದಾರೆ. ಪ್ರಶಸ್ತಿ ಬಂದ ಬಗ್ಗೆ ಹರ್ಷ ವ್ಯಕ್ತಪಡಿಸಿರುವ ರತ್ನಮ್ಮ, 25 ವರ್ಷಗಳಿಂದ ರೇಷ್ಮೆ ಕೃಷಿಯಲ್ಲಿ ತೊಡಗಿಕೊಂಡಿದ್ದೇನೆ. ಇಲಾಖೆ ಸಹಯೋಗದಲ್ಲಿ ಶೇ.100ಕ್ಕೂ ಹೆಚ್ಚು ಇಳುವರಿ ಪಡೆಯುತ್ತಿದ್ದೇವೆ. 10 ವರ್ಷಗಳ ಹಿಂದೆ ಪ್ರತಿ ಕೆಜಿ ಗೂಡಿಗೆ 150ರಿಂದ 300 ರೂ. ದರ ಇತ್ತು. ಪ್ರಸ್ತುತ 900 ರೂ. ಇರುವುದರಿಂದ ಹೆಚ್ಚಿನ ಲಾಭ ಬಂದಿದೆ ಎಂದರು.

5 ಬೆಳೆ ಬೆಳೆಯುವ ತಿಮ್ಮರಾಜು:ತಿಮ್ಮರಾಜು ಗಂಗಪ್ಪ 1 ಎಕರೆಯಲ್ಲಿ ರೇಷ್ಮೆ ಕೃಷಿ ಮಾಡಿಕೊಂಡು, ವಾರ್ಷಿಕವಾಗಿ 5 ಬೆಳೆಗಳನ್ನು ಬೆಳೆಯುತ್ತಾ 3.5 ಲಕ್ಷ ರೂಪಾಯಿ ಲಾಭ ಗಳಿಸಿದ್ದಾರೆ. ತಾಲೂಕಿನಲ್ಲಿ ರೇಷ್ಮೆ ಬೆಳೆಗಾರರು ಕಡಿಮೆ ಸಂಖ್ಯೆಯಲ್ಲಿದ್ದರು. 2020-21ನೇ ಸಾಲಿನಿಂದ ಬೆಳೆಗಾರರ ಸಂಖ್ಯೆ ಹೆಚ್ಚಾಗುತ್ತಿದೆ. ಪ್ರಸ್ತುತ ದೊಡ್ಡಬಳ್ಳಾಪುರ ತಾಲೂಕಿನ 35 ಹೆಕ್ಟೇರ್‌ನಲ್ಲಿ ರೇಷ್ಮೆ ಕೃಷಿ ಮಾಡಲಾಗುತ್ತಿದೆ ಎಂದು ತಾಲೂಕು ರೇಷ್ಮೆ ಸಹಾಯಕ ನಿರ್ದೇಶಕ ಉದಯ ಹೇಳಿದರು.