ಚಿಕ್ಕಬಳ್ಳಾಪುರ: ರೈತ, ಕಾರ್ಮಿಕರು, ಮಹಿಳೆಯರಿಗೆ ನ್ಯಾಯ ಕೊಡಿಸುವಲ್ಲಿ ಸರ್ಕಾರಗಳ ಜತೆಗೆ ನ್ಯಾಯಾಂಗವು ಸಹ ವಿಫಲವಾಗಿದೆ ಎಂದು ಸವೋಚ್ಚ ನ್ಯಾಯಾಲಯದ ವಿಶ್ರಾಂತ ನ್ಯಾಯಮೂರ್ತಿ ಆಕ್ರೋಶ ವ್ಯಕ್ತಪಡಿಸಿದರು.
ಚಿಕ್ಕಬಳ್ಳಾಪುರದಲ್ಲಿನ ಕೆಇಬಿ ಸಮುದಾಯ ಭವನದಲ್ಲಿ ಶಾಶ್ವತ ನೀರಾವರಿ ಹೋರಾಟ ಸಮಿತಿಯು ಕೈಗೊಂಡಿದ್ದ ಜಲಾಗ್ರಹ ಜಂಟಿ ಕ್ರಿಯಾ ಸಮಿತಿ ಸಭೆಯನ್ನುದ್ದೇಶಿಸಿ ಮಾತನಾಡಿದರು.
ಚೈನಾದಲ್ಲಿ ಭ್ರಷ್ಟಾಚಾರ ದೃಢಪಡುತ್ತಿದ್ದಂತೆ ತಪ್ಪಿತಸ್ಥರಿಗೆ ೬ ತಿಂಗಳೊಳಗೆ ಶಿಕ್ಷೆ ನೀಡಲಾಗುತ್ತದೆ. ಆದರೆ, ಇಲ್ಲಿ ೧೦ ವರ್ಷಗಳಾದರೂ ವಿಚಾರಣೆ ಮುಗಿಯುವುದಿಲ್ಲ. ಮುಖ್ಯಮಂತ್ರಿ, ಉಪ ಮುಖ್ಯಮಂತ್ರಿ, ಮಾಜಿ ಮಂತ್ರಿ ಸೇರಿದಂತೆ ಪ್ರಭಾವಿಗಳ ವಿರುದ್ಧದ ಬಹಳಷ್ಟು ಪ್ರಕರಣಗಳು ಬೇಗ ಕೈಗೆತ್ತಿಕೊಳ್ಳುತ್ತಿಲ್ಲ. ನೀರಾವರಿ ವಿಚಾರವಾಗಿ ಸಲ್ಲಿಕೆಯಾದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯನ್ನು ತ್ವರಿತವಾಗಿ ವಿಲೇವಾರಿಗೊಳಿಸುವ ಜವಾಬ್ದಾರಿಯನ್ನು ಏಕೆ ನಿರ್ವಹಿಸಲಿಲ್ಲ?. ಶಾಸಕಾಂಗ, ಕಾರ್ಯಾಂಗದ ಜತೆಗೆ ನ್ಯಾಯಾಂಗಕ್ಕೂ ನಾಚಿಕೆಯಾಗಬೇಕು. ಇದನ್ನು ಜನ ಸಾಮಾನ್ಯರು ಧೈರ್ಯವಾಗಿ ಪ್ರಶ್ನಿಸಬಹುದಾಗಿದೆ. ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಮೂರು ಅಂಗಗಳಿಗಿಂತಲೂ ಜನರೇ ಸಾರ್ವಭೌಮರು ಎಂದು ತಿಳಿಸಿದರು.
ಸಭೆಯಲ್ಲಿ ಶಾಶ್ವತ ನೀರಾವರಿ ಹೋರಾಟ ಸಮಿತಿ ಉಪಾಧ್ಯಕ್ಷ ಮಳ್ಳೂರು ಹರೀಶ್, ಹೋರಾಟಗಾರರಾದ ಸುಲೋಚನ ವೆಂಕಟರೆಡ್ಡಿ, ಹೊಳಲಿ ಪ್ರಕಾಶ್, ಎಸ್.ಲಕ್ಷ್ಮಯ್ಯ, ಸಲ್ಲಾವುದ್ದೀನ್, ಎಂ.ಆರ್.ಲಕ್ಷ್ಮೀನಾರಾಯಣ್, ಅಬ್ಬಣಿ ಶಿವಪ್ಪ, ಪುರದಗಡ್ಡೆ ಕೃಷ್ಣಪ್ಪ, ಲೋಕೇಶ್, ಕೆಂಪಣ್ಣ, ನೂರುಲ್ಲಾ, ಸುಷ್ಮಾ ಶ್ರೀನಿವಾಸ್ ಮತ್ತಿತರರು ಇದ್ದರು.
