ಕ್ರಸ್ಟ್​ ಗೇಟ್​ ಅಳವಡಿಕೆ ಅನುಮಾನ, ಟೆಂಡರ್​ ಹಂತದಲ್ಲಿ ಪ್ರಕ್ರಿಯೆ

ವಿಜಯವಾಣಿ ವಿಶೇಷ ಕೊಪ್ಪಳ : ತ್ರಿವಳಿ ರಾಜ್ಯದ ಅನ್ನದ ಬಟ್ಟಲು ತುಂಗಭದ್ರಾ ಜಲಾಶಯದ 19ನೇ ಕ್ರಸ್ಟ್​ ಗೇಟ್​ ಅಳವಡಿಕೆ ಈವರ್ಷವೂ ಅನುಮಾನ ಮೂಡಿಸಿದೆ. ಟಿಬಿ ಬೋರ್ಡ್​ ವಿಳಂಬ ನೀತಿಯಿಂದ ಟೆಂಡರ್​ ಹಂತದಲ್ಲೇ ದಿನಗಳು ಉರುಳುತ್ತಿವೆ. ರಾಜ್ಯಾದ್ಯಂತ ವರ್ಷಧಾರೆ ಕಾರಣ ಜಲಾಶಯಕ್ಕೆ ಒಳ ಹರಿವು ಹೆಚ್ಚಿದ್ದು ಸಂಗ್ರಹ ಮಟ್ಟ ಈಗಾಗಲೇ 10 ಟಿಎಂಸಿ ಅಡಿ ತಲುಪಿದೆ.

2024ರ ನವೆಂಬರ್​ 10ರಂದು 19ನೇ ಕ್ರಸ್ಟ್​ ಗೇಟ್​ ಕಳಚಿ ಬಿದ್ದಿದೆ. ವಾರದಲ್ಲಿ ಸ್ಟಾಪ್​ಲಾಗ್​ ಗೇಟ್​ ಅಳವಡಿಸಿದ ತಜ್ಞ ಕನ್ನಯ್ಯ ನಾಯ್ಡು ತಂಡ ನೀರು ಉಳಿಕೆ ಮಾಡಿದೆ. ದುರ್ಟನೆ ನಡೆವ ವರ್ಷ ಮುಂಚೆಯೇ ಕ್ರಸ್ಟ್​ ಗೇಟ್​ಗಳನ್ನು ಬದಲಾಯಿಸುವಂತೆ ತಜ್ಞರ ಸಮಿತಿ ವರದಿ ನೀಡಿದೆ. ಗೇಟ್​ ತುಂಡಾಗಿ ಏಳು ತಿಂಗಳು ಕಳೆದರೂ ಕೇವಲ ತಾಂತ್ರಿಕ ವರದಿ ಪಡೆಯುವಲ್ಲಿ ಬೋರ್ಡ್​ ಕಾಲಹರಣ ಮಾಡಿದೆ. ಕಳೆದ ವಾರ ಟೆಂಡರ್​ ಪ್ರಕ್ರಿಯೆ ಶುರು ಮಾಡಿದ್ದು 19ನೇ ಗೇಟ್​ ಒಂದಕ್ಕೆ 1.6 ಕೋಟಿ ರೂ.ಗೆ ಗುಜರಾತನ ಹಾರ್ಡವೇರ್​ ಟೂಲ್ಸ್​ ಆ್ಯಂಡ್​ ಮಷಿನರಿ ಪ್ರಾಜೆಕ್ಟ್​ ಕಂಪನಿ ಟೆಂಡರ್​ ಪಡೆದಿದೆ. ಬಾಕಿ 32 ಗೇಟ್​ಗಳಿಗೂ 80 ಕೋಟಿ ರೂ.ನಲ್ಲಿ ಟೆಂಡರ್​ ಪ್ರಕ್ರಿಯೆ ಶುರು ಮಾಡಿದೆ.

ಕಂಪನಿ ಸಲ್ಲಿಸಿದ ಗೇಟ್​ ವಿನ್ಯಾಸವನ್ನು ಆಂಧ್ರಪ್ರದೇಶದ ಸೆಂಟ್ರಲ್​ ಡಿಸೈನ್​ ಆರ್ಗನೈಸೇಷನ್​ ತಜ್ಞರ ತಂಡ ಪರಿಶೀಲಿಸಿ ಒಪ್ಪಿದೆ. ಆದರೆ, ಕೇಂದ್ರ ಜಲ ಆಯೋಗದ ಅನುಮತಿ ಪಡೆಯುವಂತೆ ಸಲಹೆ ನೀಡಿದೆ. ಅನುಮೋದನೆ ದೊರೆತು ಗೇಟ್​ ಸಿದ್ಧಗೊಳ್ಳಲು ಕನಿಷ್ಠ ಒಂದೆರಡು ತಿಂಗಳು ಕಾಲವಕಾಶ ಬೇಕಿದೆ. ಹೀಗಾಗಿ ಈ ವರ್ಷ ಗೇಟ್​ ಅಳವಡಿಕೆ ಅನುಮಾನ ದಟ್ಟವಾಗಿಸುತ್ತಿದೆ. ಮತ್ತೊಂದೆಡೆ ಜಲಾಶಯಕ್ಕೆ ಒಳ ಹರಿವು ಹೆಚ್ಚಳವಾಗಿದೆ. ಮುಂದಿನ ವಾರ ಕಾಲ ಭಾರಿ ಮಳೆ ಆಗುವುದಾಗಿ ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದೆ. ಬುಧವಾರ ಬೆಳಗ್ಗೆ ಜಲಾಶಯಕ್ಕೆ 9,378 ಕ್ಯೂಸೆಕ್​ ಒಳ ಹರಿವು ದಾಖಲಾಗಿದೆ. 10 ಟಿಎಂಸಿ ಅಡಿ ನೀರು ಸಂಗ್ರಹವಾಗಿದ್ದು ಜಲಮಟ್ಟ ಏರಿಕೆಯಾಗುತ್ತಿದೆ.

1613 ಕ್ರಸ್ಟ್​ ಗೇಟ್​ ಮಟ್ಟ

ಜಲಾಶಯದ 1613 ಅಡಿಗೆ ಕ್ರಸ್ಟ್​ ಗೇಟ್​ ಅಳವಡಿಸಲಾಗಿದೆ. ಸದ್ಯ 1588 ಅಡಿಗೆ ನೀರು ಶೇಖರಣೆಯಾಗಿದೆ. ಇನ್ನು 25 ಅಡಿಯಷ್ಟು ನೀರು ಬಂದಲ್ಲಿ ಗೇಟ್​ ಹಂತಕ್ಕೆ ಬರಲಿದೆ. ಒಳ ಹರಿವು ಏರಿಕೆಮಟ್ಟದಲ್ಲಿದ್ದು ಮತ್ತಷ್ಟು ಹೆಚ್ಚಿದಲ್ಲಿ ಬೇಗನೇ ಜಲಾಶಯ ಭರ್ತಿಯಾಗುವ ಸಾಧ್ಯತೆ ದಟ್ಟವಾಗಿಸಿದೆ. ಸ್ಟಾಪ್​ಲಾಗ್​ ಗೇಟ್​ ತಾತ್ಕಾಲಿಕವಾಗಿದ್ದು, 33 ಗೇಟ್​ಗಳು ಅಲ್ಲದಿದ್ದರೂ 19ನೇ ಗೇಟ್​ ಒಂದಾದರೂ ಬದಲಿಸಿದಲ್ಲಿ ರೈತರಿಗೆ ಅನುಕೂಲವಾಗಲಿದೆ. ತಜ್ಞರು ಈ ವರ್ಷ ಪೂರ್ಣ ಜಲಾಶಯ ತುಂಬಿಸದಂತೆ ಎಚ್ಚರಿಕೆ ನೀಡಿದ್ದಾರೆ. ನೀರು ಕ್ರಸ್ಟ್​ ಗೇಟ್​ ಹಂತ ತಲುಪುವಷ್ಟರಲ್ಲಿ ಗೇಟ್​ ಅಳವಡಿಕೆ ಕಷ್ಟಸಾಧ್ಯ. ಹೀಗಾಗಿ ಈ ವರ್ಷ ನೀರು ದೊರೆಯುವುದಾ ಇಲ್ಲವೆಂಬ ಆತಂಕ ಹೆಚ್ಚಿಸಿದೆ.

ಒಂದು ಅಡಿ ಹೆಚ್ಚಿಸಿದ್ದು ಯಾಕೆ ?

ಕಳೆದ ವರ್ಷ ಜಲಾಶಯದ ಎಲ್ಲ ಗೇಟ್​ಗಳನ್ನು ಒಂದು ಅಡಿ ಹೆಚ್ಚಿಸಲಾಗಿದೆ. ಹಿಂದಿನ ವರ್ಷವಷ್ಟೇ ಗೇಟ್​ಗಳು 50 ವರ್ಷವಾಗಿದ್ದು ಬದಲಿಸಬೇಕೆಂದು ವರದಿ ಸಲ್ಲಿಕೆಯಾಗಿದೆ. ಹೀಗಿದ್ದರೂ 1 ಅಡಿ ಹೆಚ್ಚಳ ಮಾಡಲಾಗಿದೆ. ಇದಾದ ಮೇಲೆ ಜಲಾಶಯಕ್ಕೆ ನೀರು ಹರಿದು ಬಂದಾಗ 19ನೇ ಗೇಟ್​ ಕಳಚಿಕೊಂಡಿದ್ದು ಅನುಮಾನ ಮೂಡಿಸಿದೆ. ಸಿಡಬ್ಲೂಸಿ ಸಲಹೆಯಂತೆ ಎತ್ತರ ಹೆಚ್ಚಳ ಮಾಡಿದ್ದಾಗಿ ಬೋರ್ಡ್​ ಮೂಲಗಳು ಹೇಳುತ್ತಿವೆ. ಜಲಾಶಯದ ಮೇಲೆ ಬೀಸುವ ಗಾಳಿಯಿಂದ ನೀರು ಹೊರ ಚೆಲ್ಲುವುದನ್ನು ತಡೆಯಲು ಈ ಕ್ರಮವೆಂದು ಹೇಳಲಾಗುತ್ತಿದೆ. ಹೀಗಿದ್ದರೆ ಜಲಾಶಯ ನಿರ್ಮಾಣವಾದಾಗಿನಿಂದ ಈವರೆಗೆ ಏಕೆ ಈ ಕ್ರಮವಾಗಲಿಲ್ಲ ಎಂಬ ಪ್ರಶ್ನೆ ಕಾಡುತ್ತಿದೆ. ಇದಕ್ಕೆ ಬೋರ್ಡ್​ ಸಮರ್ಪಕ ಉತ್ತರ ನೀಡಬೇಕಿದೆ.