ಟಿಬಿ ಡ್ಯಾಂ 6 ಗೇಟ್​ ವರ್ಕ್​ ಆಗಲ್ಲ !

ಕೊಪ್ಪಳ: ತುಂಗಭದ್ರಾ ಜಲಾಶಯದ 18 ಗೇಟ್​ಗಳ ಸ್ಥಿತಿ ಗಂಭೀರವಾಗಿದೆ. ಅದರಲ್ಲೂ 6 ಗೇಟ್​ ಬೆಂಡ್​ ಆಗಿದ್ದು, ಅವುಗಳ ಮೂಲಕ ನದಿಗೆ ನೀರು ಬಿಡುಗಡೆ ಸಾಧ್ಯವಾಗುತ್ತಿಲ್ಲ ಎಂದು ಸಚಿವ ಶಿವರಾಜ ತಂಗಡಗಿ ತಿಳಿಸಿದರು.

ನಗರದ ಜಿಲ್ಲಾ ಕ್ರೀಡಾಂಗಣದಲ್ಲಿ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಕ್ರಸ್ಟ್​ ಗೇಟ್​ಗಳ ಗುಣಮಟ್ಟ ಬಗ್ಗೆ ಡ್ಯಾಂ ಸೇಫ್ಟಿ ಕಮಿಟಿ ವರದಿ ನೀಡಿದೆ. ಒಟ್ಟು 33 ಗೇಟ್​ಗಳಲ್ಲಿ ಒಂದೊಂದೇ ಗೇಟ್​ ಸಾಮರ್ಥ್ಯ ಅಳೆಯಲಾಗಿದೆ. ವರದಿ ಪ್ರಕಾರ ಸದ್ಯ 18 ಗೇಟ್​ ಬಹುತೇಕ ಸವೆದಿವೆ. ತಕ್ಷಣಕ್ಕೆ ಬದಲಾಯಿಸಬೇಕಿದೆ. 19ನೇ ಗೇಟ್​ ಸಿದ್ಧಗೊಂಡಿದ್ದು ಅಳವಡಿಸಬೇಕಿದೆ. ಬಾಕಿ ಗೇಟ್​ ಟೆಂಡರ್​ ಮುಗಿದಿದೆ. ಕನಿಷ್ಠ 8 ತಿಂಗಳಾದರೂ ಬೇಕೆಂದು ಕಂಪನಿ ತಿಳಿಸಿದೆ.

11, 18, 20, 24, 27,28 ಸಂಖ್ಯೆ ಗೇಟ್​ ಬೆಂಡ್​ ಆಗಿವೆ. ಅವುಗಳನ್ನು ಆಪರೇಟ್​ ಮಾಡುತ್ತಿಲ್ಲ. ಸಮಸ್ಯೆ ಆಗದಿರಲೆಂದು ಹಾಗೇ ಬಿಡಲಾಗಿದೆ. 4ನೇ ಗೇಟ್​ ಸಹ ಬೆಂಡ್​ ಇದೆ. ಆದರೆ ಎರಡು ಅಡಿವರೆಗೆ ಎತ್ತರಿಸಬಹುದು. ಬಾಕಿ ಗೇಟ್​ ಗಳ ಮೂಲಕವೇ ನೀರು ಹೊರ ಹಾಕಲಾಗುತ್ತಿದೆ. ಅದೇ ಕಾರಣಕ್ಕೆ ಕೇವಲ 80 ಟಿಎಂಸಿ ಅಡಿ ನೀರು ಸಂಗ್ರಹಿಸಲಾಗುತ್ತಿದೆ. ಒಂದನೇ ಬೆಳೆಗೆ ನೀರಿನ ಕೊರತೆ ಇಲ್ಲ. ಬೋರ್ಡ್​ ಸಹ ಒಂದು ಬೆಳೆಗೆ ನೀರು ಕೊಡಲು ನಿರ್ಧರಿಸಿದೆ. ರೈತರು ಸಹಕರಿಸಬೇಕು. 1.5 ಲಕ್ಷ ಕ್ಯೂಸೆಕ್​ ಗಿಂತ ಅಧಿಕ ನೀರು ಹೊರಹಾಕುವುದು ಸಮಸ್ಯೆ ಇದೆ. ಹೀಗಾಗಿ ಸಾಕಷ್ಟು ಮುನ್ನೆಚ್ಚರಿಕೆ ತೆಗೆದುಕೊಳ್ಳಲಾಗುತ್ತಿದೆ ಎಂದರು.