ಜಿಲ್ಲೆಯಲ್ಲಿ 184 ಸರ್ಕಾರಿ ಪ್ರೌಢ ಶಾಲೆ ಹಾಗೂ 959 ಪ್ರಾಥಮಿಕ ಶಾಲೆಗಳಿವೆ. ಶೇ.70ರಷ್ಟು ಪಠ್ಯ ಪುಸ್ತಕಗಳನ್ನು ಶಾಲೆಗೆ ಮುಟ್ಟಿಸಲಾಗಿದೆ. ಬಾಕಿ ಪುಸ್ತಕಗಳು ಬರಬೇಕಿದೆ. ಗುರುವಾರ ಶಾಲೆ ಆರಂಭ ಹಿನ್ನೆಯಲ್ಲಿ ಚಿಣ್ಣರು ಖುಷಿಯಿಂದಲೇ ಶಾಲೆಗಳತ್ತ ಮುಖ ಮಾಡಿದರು. ಬೇಸಿಗೆ ರಜೆ ಮುಗಿದಿದ್ದು ಮತ್ತೆ ಬ್ಯಾಗ್ ಹಿಡಿದು, ಶಾಲಾ ಸಮವಸ್ತ್ರ ಧರಿಸಿ ಸ್ಕೂಲ್ಗೆ ಬಂದರು. ನಗರದ ವಿವಿಧ ಶಾಲೆಗಳು ಸೇರಿ ಗ್ರಾಮೀಣ ಭಾಗದ ಶಾಲೆಗಳಲ್ಲೂ ಮಕ್ಕಳನ್ನು ಶಿಕ್ಷಕರು ಆತ್ಮೀಯವಾಗಿ ಸ್ವಾಗತಿಸಿದರು. ವಿಶೇಷ ದಾಖಲಾತಿ ಆಂದೋಲನವು ನಡೆದಿದೆ. ಗ್ರಾಮೀಣ ಭಾಗಗಳಲ್ಲಿ ಗ್ರಾಮಗಳಲ್ಲಿ ಸಂಚರಿಸಿ ಶಾಲೆಯಿಂದ ವಿಮುಖರಾಗುವ ಮಕ್ಕಳನ್ನು ಮರಳಿ ಶಾಲೆಗೆ ಸೇರಿಸುವಂತೆ ಶಿಕ್ಷಕರು, ಮಕ್ಕಳು ಜಾಗೃತಿ ಮೂಡಿಸುತ್ತಿದ್ದಾರೆ.
