ಕ್ರಸ್ಟ್​ ಗೇಟ್​ ಅಳವಡಿಕೆ ಶ್ರೀ, ಎಂಪಿ ರಾಜಶೇಖರ ಹಿಟ್ನಾಳ ಹೇಳಿಕೆ

ಕೊಪ್ಪಳ: ತಾಲೂಕಿನ ಮುನಿರಾಬಾದ್​ ತುಂಗಭದ್ರಾ ಜಲಾಶಯದ ಕ್ರಸ್ಟ್​ ಗೇಟ್​ ಅಳವಡಿಕೆ ಕಾರ್ಯ ನಡೆದಿದೆ. ಇನ್ನೊಂದು ತಿಂಗಳಲ್ಲಿ 19ನೇ ಗೇಟ್​ ಅಳವಡಿಕೆ ಆಗಲಿದೆ. ರೈತರು ಆತಂಕಪಡಬೇಕಿಲ್ಲವೆಂದು ಸಂಸದ ರಾಜಶೇಖರ ಹಿಟ್ನಾಳ ಹೇಳಿದರು.

ಕಳೆದ ವರ್ಷ ಆ.10ರಂದು ಗೇಟ್​ ತುಂಡಾಗಿದೆ. ಸರ್ಕಾರ ಸಮರೋಪಾದಿಯಲ್ಲಿ ಸ್ಟಾಪ್​ ಲಾಗ್​ ಗೇಟ್​ ಅಳವಡಿಸಿ ನೀರು ನಿಲ್ಲಿಸಿದೆ. ಸದ್ಯ 19ನೇ ಗೇಟ್​ ಅಳವಡಿಕೆ ಟೆಂಡರ್​ ಮುಗಿದಿದ್ದು ಕಾರ್ಯ ನಡೆದಿದೆ. ಇನ್ನೊಂದು ತಿಂಗಳಲ್ಲಿ ಗೇಟ್​ ಅಳವಡಿಕೆ ಆಗಲಿದೆ. ಬಾಕಿ 32 ಗೇಟ್​ಗಳಿಗೆ ಟೆಂಡರ್​ ಕರೆಯಲಾಗಿದೆ. ಅದಕ್ಕೆ 15 ತಿಂಗಳು ಸಮಯವಕಾಶ ಹಿಡಿಯಲಿದೆ. ತಜ್ಞ ಕನ್ನಯ್ಯ ನಾಯ್ಡು ಎಲ್ಲ ಗೇಟ್​ ಶಕ್ತಿ ಕಳೆದುಕೊಂಡಿದ್ದು 80 ಟಿಎಂಸಿ ಅಡಿ ನೀರು ನಿಲ್ಲಿಸುವಂತೆ ಸಲಹೆ ನೀಡಿದ್ದಾರೆ. ಈ ಬಗ್ಗೆ ಟಿಬಿ ಬೋರ್ಡ್​ ಹಾಗೂ ಕೇಂದ್ರ ಜಲ ಆಯೋಗ ಸೂಕ್ತ ನಿರ್ಧಾರ ತೆಗೆದುಕೊಳ್ಳಲಿದೆ ಎಂದು ಗುರುವಾರ ತಮ್ಮ ಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಹೂಳಿಗೆ ಪರ್ಯಾಯ ಕ್ರಮಗಳನ್ನು ಕೈಗೊಳ್ಳಲು ಸರ್ಕಾರ ಚಿಂತನೆ ನಡೆಸಿದೆ. ನವಲಿ ಬಳಿ ಸಮಾನಾಂತರ ಜಲಾಶಯ ನಿರ್ಮಾಣಕ್ಕೆ ಡಿಪಿಆರ್​ ಆಗಿದೆ. ಹಾಗೆಂದು ಜಲಾಶಯ ನಿರ್ಮಿಸಬೇಕೆಂದಿಲ್ಲ. ಸಾಧ್ಯಾಸಾಧ್ಯತೆಗಳ ಬಗ್ಗೆ ತಜ್ಞರು ಅವಲೋಕಿಸಲಿದ್ದಾರೆ. ಯಾವುದೇ ಕಾರಣಕ್ಕೂ ರೈತರಿಗೆ ಅನ್ಯಾಯವಾಗಲು ಬಿಡುವುದಿಲ್ಲ. ರೈತರು ಗೊಂದಲಕ್ಕೀಡಾಗುವುದು ಬೇಡ. ಸರ್ಕಾರ ನಿರಂತರ ಸಮಾಲೋಚನೆ ನಡೆಸಿದ್ದು ಬೆಳವಣಿಗೆಗಳ ಬಗ್ಗೆ ಮಾಹಿತಿ ಪಡೆಯುತ್ತಿದೆ. ಈ ಭಾಗದ ಜನಪ್ರತಿನಿಧಿಗಳು ಬೋಡ್​ ಸಂಪರ್ಕದಲ್ಲಿದ್ದು ಆದಷ್ಟು ಬೇಗ ಗೇಟ್​ ಅಳವಡಿಕೆ ಮಾಡಿಸು ಶ್ರಮಿಸುತ್ತಿದ್ದೇವೆಂದು ಮಾಹಿತಿ ನೀಡಿದರು.