ಅಗತ್ಯವಿದ್ದಲ್ಲಿ ಬೋರ್​ವೆಲ್​ ಕೊರೆಸಿ:ಡಿಸಿ ನಲಿನ್​

ಕೊಪ್ಪಳ: ಚುನಾವಣಾ ಕರ್ತವ್ಯದೊಂದಿಗೆ ಕುಡಿವ ನೀರು ಪೂರೈಸಿ. ಅಗತ್ಯವಿದ್ದಲ್ಲಿ ಹೊಸದಾಗಿ ಬೋರ್​ವೆಲ್​ ಕೊರೆಸಿ ಎಂದು ಡಿಸಿ ನಲಿನ್​ ಅತುಲ್​ ಅಧಿಕಾರಿಗಳಿಗೆ ಸೂಚಿಸಿದರು.

ನಗರದ ಡಿಸಿ ಕಚೇರಿ ಸಭಾಂಗಣದಲ್ಲಿ ಸೋಮವಾರ ಹಮ್ಮಿಕೊಂಡಿದ್ದ ಜಿಲ್ಲಾ ಟಾಸ್ಕ್​ ಪೋರ್ಸ್​ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ದಿನ ಬೆಳಗಾದರೆ ನೀರು ಅವಶ್ಯ. ಅಧಿಕಾರಿಗಳು ಇದನ್ನು ಮನದಲ್ಲಿಟ್ಟುಕೊಂಡು ಕೆಲಸ ಮಾಡಿ. ಕುಡಿವ ನೀರಿನ ಸಮಸ್ಯೆ ಕಂಡುಬಂದಲ್ಲಿ ತಕ್ಷಣ ಸ್ಪಂದಿಸಿ. ಈ ಸಂಬಂಧ ಈವರೆಗೆ ನಡೆದ ಸಭೆಗಳಲ್ಲಿ ನೀಡಿದ ಸೂಚನೆ ಪಾಲಿಸಿ. ಪ್ರತಿ ಗ್ರಾಮಗಳಲ್ಲಿ ಬೋರ್​ವೆಲ್​, ಖಾಸಗಿ ಬೋರ್​ವೆಲ್​, ಕಿರು ನೀರು ಪೂರೈಕೆ ಟಕಗಳ ಮಾಹಿತಿ ಸಂಗ್ರಹಿಸಿಟ್ಟುಕೊಳ್ಳಿ. ಸರ್ಕಾರಿ ಬೋರ್​ವೆಲ್​ನಲ್ಲಿ ನೀರು ಕಡಿಮೆಯಾದಲ್ಲಿ ಖಾಸಗಿ ಬೋರ್​ವೆಲ್​ ಬಾಡಿಗೆ ಪಡೆಯಿರಿ. ಅಗತ್ಯ ಅನುದಾನವಿದ್ದು, ಯವುದೇ ವಿಳಂಬ ಮಾಡದಿರಿ.

ಖಾಸಗಿ ಬೋರ್​ವೆಲ್​ ಮಾಲೀಕರಿಗೆ ನಿಯಮಿತವಾಗಿ ಹಣ ಪಾವತಿಸಿ. ಇದರಿಂದ ಬೇರೆಯವರು ನೀರು ನೀಡಲು ಮುಂದೆ ಬರುತ್ತಾರೆ. ಅಗತ್ಯವಿದ್ದಲ್ಲಿ ಟ್ಯಾಂಕರ್​ ನೀರು ಒದಗಿಸಿ. ಗ್ರಾಪಂ, ನಗರ, ಸ್ಥಳಿಯ ಸಂಸ್ಥೆಗಳು ಹೊಸ ಬೋರ್ವೆಲ್​ ಕೊರೆಸಲು ಕ್ರಮವಹಿಸಿ. ಈ ಸಂಬಂಧ ಪ್ರಸ್ತಾವನೆ ಸಲ್ಲಿಸಿ ಅನುಮೋದನೆ ಪಡೆದುಕೊಳ್ಳಿ ಎಂದು ನಿರ್ದೇಶಿಸಿದರು.

ಜಿಪಂ ಸಿಇಒ ರಾಹುಲ್​ ರತ್ನಂ ಪಾಂಡೆಯ, ಎಡಿಸಿ ಸಾವಿತ್ರಿ ಕಡಿ, ಜಿಪಂ ಉಪ ಕಾರ್ಯದರ್ಶಿ ಮಲ್ಲಿಕಾರ್ಜುನ ತೊದಲಬಾಗಿ, ತಹಸೀಲ್ದಾರ್​ಗಳು, ತಾಪಂ ಇಒಗಳಿದ್ದರು.