ಕೊಪ್ಪಳದಲ್ಲಿ ಸಂಭ್ರಮದ ಈದ್​

ಕೊಪ್ಪಳ: ಪ್ರವಾದಿ ಮೊಹ್ಮದ್​ ಪೈಗಂಬರ್​ ಜನ್ಮ ದಿನ ಅಂಗವಾಗಿ ನಗರ ಸೇರಿ ಗ್ರಾಮೀಣ ಭಾಗಗಳಲ್ಲಿ ಶುಕ್ರವಾರ ಸಂಭ್ರಮದ ಈದ್​ ಹಬ್ಬ ಆಚರಿಸಲಾಯಿತು.

ಗುರುವಾರದಿಂದಲೇ ಸಂಭ್ರಮ ಮನೆ ಮಾಡಿದ್ದು, ಮಸೀದಿಗಳಲ್ಲಿ ಜಾಗರಣೆ, ಸಾಮೂಹಿಕ ಪ್ರಾರ್ಥನೆ ನಡೆದವು. ಸಾರ್ವಜನಿಕರು ಶ್ರದ್ಧಾಭಕ್ತಿಯಿಂದ ಅಲ್ಲಾಹುವಿಗೆ ನಮಿಸಿದರು. ಶುಕ್ರವಾರ ಬೆಳಗ್ಗೆ ಗಡಿಯಾರ ಕಂಬ ವೃತ್ತ, ಶಾರದಾ ಚಿತ್ರಮಂದಿರ, ಸಾಲಾರಜಂಗ್​ ರಸ್ತೆ, ಅಶೋಕ ವೃತ್ತ, ಜವಾಹರ ರಸ್ತೆ ಮೂಲಕ ಯೂಸೂಫಿಯಾ ಮಸೀದಿವರೆಗೆ ಶಾಂತಿಯುತ ಮೆರವಣಿಗೆ ನಡೆಯಿತು.

ಹಿರಿಯರು, ಮಕ್ಕಳು ಮೆರವಣಿಗೆಯಲ್ಲಿ ಪಾಲ್ಗೊಂಡರು ಮೆರಗು ತಂದರು. ಇಸ್ಲಾಂ ಧರ್ಮದ ಬಾವುಟ, ಮೆಕ್ಕಾ, ಮದಿನಾ ಸ್ಥಬ್ಧ ಚಿತ್ರ ನೋಡುಗರನ್ನು ಸೆಳೆದವು. ಜವಾಹರ್​ ರಸ್ತೆಯಲ್ಲಿ ಕೊಪ್ಪಳ ಕಾ ಸರ್ಕಾರ ಗಣೇಶನಿಗೆ ಮುಸ್ಲಿಮರು ಹಾರ ಹಾಕಿ ನಮಿಸಿದರು. ಹಿಂದುಗಳು ಸಿಹಿ ಹಾಗೂ ಅನ್ನ ಸಂತರ್ಪಣೆ ಮೂಲಕ ಪರಸ್ಪರ ಭಾವೈಕ್ಯತೆ ಮೆರೆದರು. ಸಂಸದ ರಾಜಶೇಖರ ಹಿಟ್ನಾಳ್​ ಸೇರಿ ಇತರ ಗಣ್ಯರು ಭಾಗಿಯಾದರು.