ಕಡ್ಡಾಯವಾಗಿ ಆರೋಗ್ಯ ತಪಾಸಣೆ ಮಾಡಿಸಿ

ಕೊಪ್ಪಳ: ಎಲ್ಲರು ತಿಂಗಳಿಗೊಮ್ಮೆ ಆರೋಗ್ಯ ತಪಾಸಣೆ ಮಾಡಿಸಿಕೊಳ್ಳಬೇಕು ಎಂದು ಸಮುದಾಯ ಆರೋಗ್ಯ ಅಧಿಕಾರಿ ಅಜಯಕುಮಾರ ದೇವೂರ ಹೇಳಿದರು.

ಹನುಮಸಾಗರ ಸಮೀಪದ ಕಾಟಾಪುರ ಗ್ರಾಮದ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ ಬುಧವಾರ ವಿಶ್ವ ಕ್ಯಾನ್ಸರ್​ ದಿನಾಚರಣೆ ನಿಮಿತ್ತ ಜಾಗೃತಿ ಹಾಗೂ ಅರಿವು ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಸಾಮಾನ್ಯವಾಗಿ ಗುಟಕಾ ಸೇವಿಸುವದರಿಂದ ಬಾಯಿ ಕ್ಯಾನ್ಸರ್​ ಬರುತ್ತದೆ. ವಾಸಿಯಾಗದೇ ಇರುವ ಗಾಯ, ಬಹಳ ದಿನಗಳ ಕೆಮ್ಮು, ಊಟ ಮಾಡುವಾಗ ಗಂಟಲು ನೋವು ಇದು ಕ್ಯಾನ್ಸರ್​ ಲಕ್ಷಣವಾಗಿರುತ್ತದೆ. ಯುವಕರು ದುಶ್ಚಟಗಳಿಗೆ ಬಲಿಯಾಗಬಾರದು. ಮಹಿಳೆಯರಲ್ಲಿ ಸ್ತನ ಹಾಗೂ ಗರ್ಭಕೋರಳಿನಂತಹ ಕ್ಯಾನ್ಸರ್​ ಇರುತ್ತವೆ. ನಿಮ್ಮ ಹತ್ತಿರದ ಸರ್ಕಾರಿ ಆಸ್ಪತ್ರೆಯಲ್ಲಿ ಪ್ರತಿ ತಿಂಗಳು ಆರೋಗ್ಯ ತಪಾಸಣೆ ಮಾಡಿಸಿಕೊಂಡು, ಆರೋಗ್ಯ ಸಮಸ್ಯೆ ಕಂಡು ಬಂದರೆ ಸೂಕ್ತ ಚಿಕಿತ್ಸೆ ಪಡೆದುಕೊಳ್ಳಬೇಕು ಎಂದರು.

ಮುಖ್ಯ ಶಿಕ್ಷಕ ಶಿವಪ್ಪ ಚೊಳಚಗುಡ್ಡ, ಆರೋಗ್ಯ ಇಲಾಖೆ ಸಿಬ್ಬಂದಿಗಳಾದ ಸುಧಾ, ರಾಧಾ ರಾಠೋಡ, ವಿಜಯಲಕ್ಷ್ಮೀ ಇತರರಿದ್ದರು.