ಗ್ರಾಮ ಒನ್​ಗಳಿಗೆ ಲಾಗಿನ್​ ಐಡಿ ವಿತರಣೆ

ಕೊಪ್ಪಳ: ಪಡಿತರ ಚೀಟಿ ತಿದ್ದುಪಡಿಗೆ ಸರ್ಕಾರ ಅವಕಾಶ ಕಲ್ಪಿಸಿದೆ. ಆಹಾರ ಇಲಾಖೆಯಿಂದ ಗ್ರಾಮ ಒನ್​ ಕೇಂದ್ರಗಳಿಗೆ ಲಾಗಿನ್​ ಐಡಿ ಸೃಜಿಸಿ ವಿತರಿಸಲಾಗುತ್ತಿದೆ.

ಸರ್ಕಾರ ಗೃಹ ಲಕ್ಷಿ$್ಮ ಹಾಗೂ ಅನ್ನಭಾಗ್ಯ ಯೋಜನೆಗಳನ್ನು ಪಡಿತರ ಚೀಟಿ ಆಧರಿಸಿ ಅನುಷ್ಠಾನ ಮಾಡುತ್ತಿದೆ. ಇತ್ತೀಚೆಗೆ ಅನರ್ಹರ ಪಡಿತರ ಚೀಟಿಗಳನ್ನು ರದ್ದುಪಡಿಸಿದೆ. ಈ ಬೆನ್ನಲ್ಲೇ ಪಡಿತರ ಚೀಟಿಗಳಲ್ಲಿ ತಿದ್ದುಪಡಿ, ಬದಲಾವಣೆ, ತೆಗೆದುಹಾಕುವಿಕೆ ಸೇರಿ ಇತರ ಮಾರ್ಪಾಡು ಮಾಡಲು ಡಿ.1ರಿಂದ ಅವಕಾಶ ನೀಡಿದೆ. ದುರ್ಬಳಕೆ ತಪ್ಪಿಸಲು ಆಹಾರ ಇಲಾಖೆಯಿಂದಲೇ ಗ್ರಾಮ ಒನ್​, ಕರ್ನಾಟಕ ಒನ್​ ಕೇಂದ್ರಗಳ ಮೂಲಕ ಅವಕಾಶ ಕಲ್ಪಿಸಿದೆ.

ಆದರೆ, ಜಿಲ್ಲೆಯಲ್ಲಿ ಗ್ರಾಮ ಒನ್​ ಕೇಂದ್ರಗಳಿಗೆ ಲಾಗಿನ್​ ಅಡಿ ನೀಡುವುದು ವಿಳಂಬವಾಗಿದೆ. ಈ ತಿಂಗಳ ಅಂತ್ಯದವರೆಗೆ ಮಾತ್ರ ತಿದ್ದುಪಡಿಗೆ ಅವಕಾಶವಿದೆ. ಆದರೆ, ದಿನಗಳು ಕಳೆದಿದ್ದು ವಿವಿಧ ಕಾರಣ ನೀಡಿದ ಅಧಿಕಾರಿಗಳು ಲಾಗಿನ್​ ಐಡಿ ನೀಡಿರಲಿಲ್ಲ. ಈ ಬಗ್ಗೆ ವಿಜಯವಾಣಿ ಡಿ.18ರಂದು "ಗ್ರಾಮ ಒನ್​ ಇಲ್ಲ ಲಾಗಿನ್​' ಶೀರ್ಷಿಕೆಯಡಿ ವಿಶೇಷ ವರದಿ ಪ್ರಕಟಿಸಿ ಗಮನ ಸೆಳೆದಿತ್ತು. ಎಚ್ಚೆತ್ತ ಜಿಲ್ಲಾಡಳಿತ ಅಧಿಕಾರಿಗಳಿಗೆ ಸೂಚಿಸಿ ಲಾಗಿನ್​ ಐಡಿ ನೀಡುವಂತೆ ತಾಕೀತು ಮಾಡಿದೆ.

ಒಂದೊಂದು ತಾಲೂಕಿನ ಗ್ರಾಮ ಒನ್​ ಸೇವಕರನ್ನು ಕರೆದು ಅಗತ್ಯ ದಾಖಲೆ ಪಡೆದು ಲಾಗಿನ್​ ನೀಡಲಾಗುತ್ತಿದೆ. ಸದ್ಯ ಕೊಪ್ಪಳ, ಕುಷ್ಟಗಿ ತಾಲೂಕಿನವರಿಗೆ ಲಾಗಿನ್​ ಐಡಿ ಸೃಜಿಸಿ ನೀಡಲಾಗುತ್ತಿದೆ. ಈವರೆಗೆ ಸುಮಾರು 78 ಐಡಿಗಳನ್ನು ನೀಡಿದ್ದು, ಗುರುವಾರ ಸರ್ವರ್​ ಸಮಸ್ಯೆ ಕಾರಣ ಬಹಳ ಐಡಿ ರಚನೆ ಸಾಧ್ಯವಾಗಿಲ್ಲ. ಶುಕ್ರವಾರದಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಮಾಡಿ ನೀಡುವುದಾಗಿ ಆಹಾರ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.