ಕೊಪ್ಪಳ ಬಂದ್​ ಯಶಸ್ವಿ

ಕೊಪ್ಪಳ: ಬಿಎಸ್​ಪಿಎಲ್​ ಸೇರಿ ಹೊಸ ಕಾರ್ಖಾನೆಗಳ ಆರಂಭ ವಿರೋಧಿಸಿ ಕೊಪ್ಪಳ ತಾಲೂಕು ಹಿತರಕ್ಷಣಾ ವೇದಿಕೆ ಸೋಮವಾರ ಕರೆ ನೀಡಿದ್ದ ಬಂದ್​ ಯಶಸ್ವಿಯಾಯಿತು. ಜನರು ಸ್ವಯಂ ಪ್ರೇರಿತರಾಗಿ ಅಂಗಡಿ&ಮುಂಗಟ್ಟೆಗಳನ್ನು ಬಂದ್​ ಮಾಡುವ ಮೂಲಕ ಹೋರಾಟ ಬೆಂಬಲಿಸಿದರು.

ಗವಿಮಠದಿಂದ ಆರಂಭವಾದ ಜಾಥಾ ಗಡಿಯಾರ ಕಂಬ ವೃತ್ತ, ಜವಾಹರ ರಸ್ತೆ, ಅಶೋಕ ವೃತ್ತ ಮಾರ್ಗವಾಗಿ ತಾಲೂಕು ಕ್ರೀಡಾಂಗಣ ತಲುಪಿತು. 20&25 ಸಾವಿರ ಜನರು ಭಾಗಿಯಾದರು. ಕವಿಗಳು ಕವನ ವಾಚಿಸಿದರೆ, ವಕೀಲರು ಕಲಾಪದಿಂದ ದೂರ ಉಳಿದರು. ಜನರಿಗೆ ಬೆಳಗ್ಗೆ ಪ್ರಸಾದ, ಕುಡಿವ ನೀರು, ಮಜ್ಜಿಗೆ, ಪಾನಕ, ಮಧ್ಯಾಹ್ನ ಊಟ ವ್ಯವಸ್ಥೆ ಮಾಡಲಾಯಿತು. ಹಿರೇ ಬಗನಾಳ ರೈತರು ಟ್ರ್ಯಾಕ್ಟರ್​ನಲ್ಲಿ ಧೂಳಿನಿಂದ ಆವೃತವಾದ ಬೆಳೆಗಳು ಹಾಗೂ ಆಕ್ಸಿಜನ್​ ಮಾಸ್ಕ್​ ಹಾಕಿ ಪ್ರದರ್ಶಿಸುವ ಮೂಲಕ ಗಮನ ಸೆಳೆದರು.