ಗೊಬ್ಬರಕ್ಕಾಗಿ ಮುಂದುವರಿದ ಪರದಾಟ

ಕೊಪ್ಪಳ: ರಸಗೊಬ್ಬರಕ್ಕಾಗಿ ರೈತರ ಪರದಾಟ ಮುಂದುವರೆದಿದೆ. ನಗರದ ಟಿಎಪಿಸಿಎಂಎಸ್​ ಕಚೇರಿ ಮುಂದೆ ಗೊಬ್ಬರ ಪಡೆಯಲು ಟೋಕನ್​ ವಿತರಿಸಲು ನೂಕುನುಗ್ಗಲು ಕಂಡುಬಂತು.

ಯೂರಿಯಾ ಗೊಬ್ಬರದ ಬೇಡಿಕೆ ಕಡಿಮೆಯಾಗಿಲ್ಲ. ಮಳೆ ಮುಂದುವರೆದಿದ್ದು, ಮೆಕ್ಕೆಜೋಳ ಸೇರಿ ಇತರ ಬೆಳೆಗಳಿಗೂ ಯೂರಿಯಾ ಅವಶ್ಯವಿದೆ. ಹೀಗಾಗಿ ನಿತ್ಯ ರೈತರು ಗೊಬ್ಬರ ಕೊಳ್ಳಲು ಕಚೇರಿ ಮುಂದೆ ಜಮಾಯಿಸುತ್ತಿದ್ದಾರೆ. ಬುಧವಾರ ಟಿಎಪಿಸಿಎಂಎಸ್​ಗೆ 46 ಟನ್​ನಷ್ಟು ಯೂರಿಯಾ ಬಂದಿದೆ. ಗುರುವಾರ ವಿತರಣೆಗೆ ಯೋಜಿಸಲಾಗಿದೆ. ಬುಧವಾರ ಬಂದ ರೈತರಿಗೆ ಟೋಕನ್​ ನೀಡಲಾಯಿತು. 400 ರೈತರಿಗೆ ನೀಡಲು ಯೋಜಿಸಿದ್ದು, ಸಾವಿರಾರು ರೈತರು ಜಮಾಯಿಸಿದರು. ಕಚೇರಿಯಿಂದ ಬಸವೇಶ್ವರ ವೃತ್ತವರೆಗೆ ಸರತಿ ಸಾಲು ಕಂಡುಬಂತು. ಟೋಕನ್​ ಕೊಳ್ಳಲು ಅನ್ನದಾತರು ಮುಗಿಬಿದ್ದರು.

ಇದರಿಂದ ಗದ್ದಲ ಉಂಟಾಗಿ ಪರಿಸ್ಥಿತಿ ವಿಕೋಪಕ್ಕೆ ತಿರುಗಿತು. ಎಚ್ಚೆತ್ತ ಪೊಲೀಸರು ಸ್ಥಳಕ್ಕೆ ಧಾವಿಸಿದರು. ಸ್ವತ@ ಎಸ್ಪಿ ಡಾ.ರಾಮ್​ ಎಲ್​. ಅರಸಿದ್ದು, ಅಪರ ಪೊಲೀಸ್​ ವರಿಷ್ಠಾಧಿಕಾರಿ ಹೇಮಂತ್​ ಕುಮಾರ್​, ಡಿವೈಎಸ್ಪಿ, ಸೈಬರ್​ ಠಾಣೆ ಡಿವೈಎಸ್ಪಿ, ನಗರಠಾಣೆ ಪಿಐ ಸೇರಿ ಇತರ ಪೊಲೀಸರು ಪರಿಸ್ಥಿತಿ ನಿಭಾಯಿಸಲು ಹೆಣಗಾಡಿದರು. ಬ್ಯಾರಿಕೇಡ್​ ಅಳವಡಿಸಿ ಗದ್ದಲ ನಿಯಂತ್ರಿಸಿದರು. ಬೆಳಗ್ಗೆಯಿಂದ ಸಂಜೆವರೆಗೆ ಬಂದ ರೈತರಿಗೆಲ್ಲ ಟೋಕನ್​ ನೀಡಿ ಕಳಿಸಲಾಯಿತು.