ನೇತ್ರ ಜಾಗೃತಿ ಅಭಿಯಾನ ಸೆ.8ಕ್ಕೆ

ಕೊಪ್ಪಳ: ನೇತ್ರದಾನ ಪಾಕ ಅಂಗವಾಗಿ ಕೊಪ್ಪಳದಲ್ಲಿ ಸೆ.8ರಂದು ಜಾಗೃತಿ ಅಭಿಯಾನ ಹಮ್ಮಿಕೊಳ್ಳಲಾಗಿದೆ. ಗವಿಮಠದ ಆವರಣದಲ್ಲಿ ಗವಿಶ್ರೀಗಳು ಜಾಥಾಕ್ಕೆ ಚಾಲನೆ ನೀಡುವರು ಎಂದು ಎಂ.ಎಂ.ಜೋಶಿ ನೇತ್ರತಜ್ಞ ಡಾ.ವಾಗೀಶ್​ ತೆಗ್ಗಿನಕೇರಿಮಠ ತಿಳಿಸಿದರು.

ನಗರದಲ್ಲಿ ಶುಕ್ರವಾರ ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡಿ, ಆ.25ರಿಂದ ಸೆ.8ವರೆಗೆ ಪಾಕ ಹಮ್ಮಿಕೊಳ್ಳಲಾಗಿದೆ. ನೇತ್ರದಾನ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸುವುದು ಮುಖ್ಯ ಉದ್ದೇಶ. ಕೊಪ್ಪಳದಲ್ಲೂ ಜಾಥಾ ಮೂಲಕ ಅರಿವು ಮೂಡಿಸಲಾಗುತ್ತಿದೆ. ಪ್ರತಿ ವರ್ಷ ಕಾರ್ಯಕ್ರಮ ಆಯೋಜಿಸುತ್ತಿದ್ದೇವೆ. ಸೆ.8ರಂದು ಬೆಳಗ್ಗೆ 8 ಗಂಟೆಗೆ ಗವಿಶ್ರೀಗಳು ಜಾಥಾಕ್ಕೆ ಚಾಲನೆ ನೀಡುವರು. ಎಸ್ಪಿ ಡಾ.ರಾಮ್​ ಎಲ್​.ಅರಸಿದ್ದಿ, ಎಂ.ಎಂ.ಜೋಶಿ ನೇತ್ರವಿಜ್ಞಾನ ಸಂಸ್ಥೆ ನಿರ್ದೇಶಕ ಡಾ.ಶ್ರೀನಿವಾಸ ಎಂ.ಜೋಶಿ, ಎಸ್​ಜಿಎಂ ನೇತ್ರಭಂಡಾರ ನಿರ್ದೇಶಕ ಡಾ.ಅನಿಕೆತ್​, ಸಿಇಒ ಕುತ್ಬುದ್ದಿನ್​ ಮುಲ್ಲಾ, ಸ್ವಯಂ ಸೇವಾ ಸಂ, ಆಶಾ ಕಾರ್ಯಕರ್ತರು ಭಾಗಿಯಾಗುವರು ಎಂದರು.

ನೇತ್ರದಾನ ಘೋಷಣೆಗಳೊಂದಿಗೆ ಗವಿಮಠದಿಂದ ಬಸವೇಶ್ವರ ವೃತ್ತ ಮಾರ್ಗವಾಗಿ ಎಂ.ಎಂ.ಜೋಶಿ ಆಸ್ಪತ್ರೆವರೆಗೆ ಜಾಥಾ ಸಾಗಲಿದೆ. ಬಳಿಕ ಗಣ್ಯರು ಅನಿಸಿಕೆ ಹಂಚಿಕೊಳ್ಳುವರು ಎಂದು ಮಾಹಿತಿ ನೀಡಿದರು. ಶಾಖಾ ಮುಖ್ಯಸ್ಥ ವಿಕ್ರಂ ಗುಡಗೇರಿ ಇದ್ದರು.