ಕಾರ್ಖಾನೆ ಕಾಮಗಾರಿ ನಿಲ್ಲಿಸಿದ ಜಿಲ್ಲಾಡಳಿತ

ಕೊಪ್ಪಳ: ಬಿಎಸ್​ಪಿಎಲ್​ ಕಾರ್ಖಾನೆ ಕಾಮಗಾರಿ ನಿಲ್ಲಿಸುವಂತೆ ಸಿಎಂ ಆದೇಶಿಸಿದರೂ ಅಸಡ್ಡೆ ತೋರಿದ್ದ ಜಿಲ್ಲಾಡಳಿತ ಗುರುವಾರ ಎಚ್ಚೆತ್ತು ಕಾಮಗಾರಿ ನಿಲ್ಲಿಸಿದೆ. ಈ ಬಗ್ಗೆ ವೀಕ್ಷಣೆಗೆ ತೆರಳಿದ ಹೋರಾಟಗಾರರು ಬಸಾಪುರ ಕೆರೆಗೆ ತೆರಳುವ ರಸ್ತೆಗೆ ಅಡ್ಡಲಾಗಿ ಹಾಕಿದ್ದ ಬ್ಯಾರಿಕೇಡ್​ ಕಿತ್ತೆಸೆದು ಆಕ್ರೋಶ ಹೊರಹಾಕಿದರು.

ಕಾರ್ಖಾನೆ ಆರಂಭಿಸಿದಂತೆ ಸಚಿವ ಶಿವರಾಜ ತಂಗಡಗಿ ಅಧ್ಯಕ್ಷತೆಯಲ್ಲಿ ಸರ್ವ ಪಕ್ಷ ನಿಯೋಗ ಸಿಎಂಗೆ ಮನವಿ ಮಾಡಿದೆ. ಸ್ಪಂದಿಸಿದ ಸಿಎಂ, ಕೆಲಸ ನಿಲ್ಲಿಸಲು ಸೂಚಿಸಿದ್ದಾರೆ. ಇಷ್ಟಾದರೂ ಕಾರ್ಯಪ್ರವೃತ್ತರಾದ ಡಿಸಿ ನಲಿನ್​ ಅತುಲ್​ ಲಿಖಿತ ಆದೇಶ ಬಂದಿಲ್ಲವೆಂಬ ಅರ್ಥದಲ್ಲಿ ನಡೆದುಕೊಂಡಿದ್ದರು. ಬುಧವಾರ ಕಾರ್ಖಾನೆಯಲ್ಲಿ ಕಾಮಗಾರಿ ರಾಜಾರೋಷವಾಗಿ ನಡೆದರೂ ಅಧಿಕಾರಿಗಳು ತಮಗೆ ಸಂಬಂಧ ಇಲ್ಲವೆಂಬಂತೆ ವರ್ತಿಸಿದ್ದರು. ಈ ಬಗ್ಗೆ ಮಾಧ್ಯಮಗಳಲ್ಲಿ ವರದಿ ಬಿತ್ತರವಾಗುತ್ತಲೇ ಎಚ್ಚೆತ್ತ ಜಿಲ್ಲಾಡಳಿತ, ಎಡಿಸಿ ಸಿದ್ರಾಮೇಶ್ವರ ಅವರ ಮೂಲಕ ಸ್ಪಷ್ಟೀಕರಣ ನೀಡಿದೆ. ಸಿಎಂ ಆದೇಶ ಮೇರೆಗೆ ಬಿಎಸ್​ಪಿಎಲ್​ ಕಾಮಗಾರಿ ಸ್ಥಗಿತಗೊಳಿಸಲು ಕ್ರಮ ಕೈಗೊಂಡಿದ್ದಾಗಿ ತಿಳಿಸಿದೆ.

ಆದರೂ, ಕಾಮಗಾರಿ ನಡೆಯುತ್ತಿದೆ ಎಂಬ ಅನುಮಾನ ಹಿನ್ನೆಲೆಯಲ್ಲಿ ಕೆಲ ಹೋರಾಟಗಾರರು ಕಾರ್ಖಾನೆ ಸ್ಥಳಕ್ಕೆ ತೆರಳಿದರು. ಈ ವೇಳೆ ಬಸಾಪುರ ಕೆರೆಗೆ ತೆರಳಲು ಕಾರ್ಖಾನೆಯವರು ದಾರಿ ಬಿಡಲಿಲ್ಲ. ಇದರಿಂದ ಆಕ್ರೋಶಗೊಂಡ ರಸ್ತೆಗೆ ಅಡ್ಡಲಾಗಿ ಹಾಕಿದ್ದ ಬ್ಯಾರಿಕೇಡ್​ ಕಿತ್ತೆಸೆದರು. ಕಾರ್ಖಾನೆ ವಿರುದ್ಧ ಘೋಷಣೆ ಕೂಗಿದರು. ಕಂಪನಿ ಅಧಿಕಾರಿಗಳೊಂದಿಗೆ ವಾಗ್ವಾದ ನಡೆಸಿದರು. ಬಸಾಪುರ ಕೆರೆ ಸಾರ್ವಜನಿಕ ಬಳಕೆಗೆ ಮುಕ್ತವಾಗಿರಬೇಕು. ಜನ&ಜಾನುವಾರುಗಳಿಗೆ ಕುಡಿವ ನೀರು ಬಳಕೆಗೆ ಅವಕಶವಿರಬೇಕು. ಅದಕ್ಕೆ ಅಡ್ಡಿಪಡಿಸಬಾರದೆಂದು ಎಚ್ಚರಿಕೆ ನೀಡಿದರು. ಪೊಲೀಸರು ಮಧ್ಯ ಪ್ರವೇಶಿಸಿ ಶಾಂತಗೊಳಿಸಿದರು.

ಹೋರಾಟಗಾರರಾದ ಮಲ್ಲು ಪುಜಾರ, ಸಿದ್ದು ಮಣ್ಣಿನವರ, ಯಲ್ಲಪ್ಪ ಹಳೇಮನಿ, ಗವಿ ಹೂಗಾರ, ವೀರಭದ್ರಪ್ಪ, ಮೂಕಪ್ಪ ಮೇಸ್ತ್ರಿ ಇನ್ನಿತರರಿದ್ದರು.