ಸಮರ್ಪಕ ನೀರು ಪೂರೈಸಿ

ಕೊಪ್ಪಳ: ಸಮರ್ಪಕವಾಗಿ ಕುಡಿವ ನೀರು ಪೂರೈಸುವಂತೆ ಆಗ್ರಹಿಸಿ ತಾಲೂಕಿನ ಭಾಗ್ಯನಗರ ಪಟ್ಟಣದ 18-19ನೇ ವಾರ್ಡ್​ ನಿವಾಸಿಗಳು ಪಪಂ ಕಚೇರಿ ಮುಂಭಾಗದಲ್ಲಿ ಪ್ರತಿಭಟನೆ ನಡೆಸಿದರು.

ಅಡವಿ ಆಂಜನೇಯ ಬಡಾವಣೆಗೆ ಮೂರು ತಿಂಗಳಿಂದ ನೀರು ಬರುತ್ತಿಲ್ಲ. ಈ ಬಗ್ಗೆ ಅನೇಕ ಬಾರಿ ಪಪಂ ಅಧಿಕಾರಿಗಳ ಗಮನಕ್ಕೆ ತಂದಿದ್ದೇವೆ. ಮನವಿ ಕೊಟ್ಟಿದ್ದೇವೆ. ಕಳೆದ ಏಪ್ರೀಲ್​ 28ರಂದು ದೂರು ಪಪಂಗೆ ದೂರು ದಾಖಲಿಸಿದ್ದೇವೆ. ಪ್ರತಿ ಬಾರಿಯೂ ಸಮಸ್ಯೆ ಸರಿಪಡಿಸುವುದಾಗಿ ಹೇಳುವ ಅಧಿಕಾರಿಗಳು ಪರಿಹಾರ ನೀಡುತ್ತಿಲ್ಲವೆಂದು ಆಕ್ರೋಶ ಹೊರಹಾಕಿದರು. ಪಪಂ ಕಚೇರಿಗೆ ನುಗ್ಗಿ ಅಧಿಕಾರಿಗಳನ್ನು ತರಾಟೆ ತೆಗೆದುಕೊಂಡರು.

ಟ್ಯಾಂಕರ್​ ಮೂಲಕ ನೀರು ಹಾಕಿಸಿಕೊಳ್ಳುತ್ತಿದ್ದೇವೆ. ನೀರಿನ ಕರ ಪಾವತಿಸುತ್ತಿದ್ದೇವೆ. ಆದರೂ ಸಮಸ್ಯೆ ಆಲಿಸುತ್ತಿಲ್ಲ. ಮುಖ್ಯಾಧಿಕಾರಿ ಸುರೇಶ ಬಬಲಾದ ಕಚೇರಿಯಲ್ಲಿ ಸಿಗುವುದಿಲ್ಲ. ವಾರ್ಡ್​ ಸದಸ್ಯರೂ ಸಮಸ್ಯೆಗೆ ಸ್ಪಂದಿಸುತ್ತಿಲ್ಲ. ಟೆಂಡರ್​ ಕರೆದಿದ್ದೇವೆ. ಅನುದಾನ ಬಂದಿಲ್ಲ ಎಂಬ ಕುಂಟು ನೆಪ ಹೇಳುತ್ತಿದ್ದಾರೆಂದು ಕಿಡಿಕಾರಿದರು. ಪಪಂ ಉಪಾಧ್ಯಕ್ಷ ಹೊನ್ನೂರಸಾಬ ಬೈರಾಪುರ, ವಾರ್ಡ್​ ಸದಸ್ಯ ಜಗದೀಶ ಮಾಲಗಿತ್ತಿ ಪ್ರತಿಭಟನಕಾರರನ್ನು ಸಮಾಧಾನಪಡಿಸಿದರು. ಶ್ರೀ ಪರಿಹಾರ ಕಂಡುಕೊಳ್ಳದಿದ್ದಲ್ಲಿ ಮತ್ತೆ ಹೋರಾಟ ಮಾಡುವುದಾಗಿ ಎಚ್ಚರಿಸಿದರು.

ನಿವಾಸಿಗಳಾದ ಶಿವಪ್ಪ ಕೋಗಳಿ, ಗವಿಸಿದ್ದಪ್ಪ ಯಕ್ಲಾಸಪುರ, ಮಲ್ಲಿಕಾರ್ಜುನ ಸಸಿಮಠ, ಸಂದೀಪ್​, ಸಾಯಿಸೋಹನ್​, ವನಜಾ, ಅನಸೂಯ, ನಿರ್ಮಲಾ, ಅನಿತಾ, ಸುನಂದಾ ಇತರರಿದ್ದರು.