ಜನರ, ದೇಶದ ಭವಿಷ್ಯ ನಿರ್ಮಿಸುವ ಕಲೆ ಯಕ್ಷಗಾನ

ಚಾರುಕೀರ್ತಿ ಭಟ್ಟಾರಕ ಶ್ರೀ ಆಶೀರ್ವಚನ | ತಾಳಮದ್ದಲೆ ಪ್ರಶಸ್ತಿ ಪ್ರದಾನ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಪುರಾಣ ಕಥೆಗಳು ಮನರಂಜನೆಗಾಗಿ ಇರುವುದಲ್ಲ. ಅವು ಮನಸ್ಸಿನ ಪರಿವರ್ತನೆ ಹಾಗೂ ನೆಮ್ಮದಿ ಕೊಡಲೆಂದೇ ರಚಿತವಾಗಿವೆ. ಅಂತಹ ಪುರಾಣ ಕಥಾನಕಗಳನ್ನು ಜನಮಾನಸಕ್ಕೆ ತಲುಪಿಸಿ, ಜನರ ಹಾಗೂ ದೇಶದ ಭವಿಷ್ಯ ನಿರ್ಮಿಸುವ ಮಹತ್ತರ ಕಲೆ ತಾಳಮದ್ದಲೆ ಹಾಗೂ ಯಕ್ಷಗಾನವಾಗಿದೆ ಎಂದು ಮೂಡಬಿದ್ರೆ ಜೈನ ಮಠದ ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯ ಸ್ವಾಮೀಜಿ ಹೇಳಿದರು.

ಉಡುಪಿಯ ಕಲಾರಂಗ ಐವೈಸಿ ಸಭಾಭವನದಲ್ಲಿ ಯಕ್ಷಗಾನ ಕಲಾರಂಗ ಉಡುಪಿ ಭಾನುವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಕಲಾವಿದ ಜಬ್ಬಾರ್​ ಸಮೋ ಅವರಿಗೆ ಮಟ್ಟಿ ಮುರಲೀಧರ್​ ರಾವ್​ ತಾಳಮದ್ದಲೆ ಪ್ರಶಸ್ತಿ ಹಾಗೂ ಸೇರಾಜೆ ಸೀತಾರಮ್​ ಭಟ್​ ಅವರಿಗೆ ಪೆರ್ಲ ಕೃಷ್ಣ ಭಟ್​ ತಾಳಮದ್ದಲೆ ಪ್ರಶಸ್ತಿ ವಿತರಿಸಿ ಆಶೀರ್ವಚನ ನೀಡಿದರು.

ಜೀವನ ಸಂಘರ್ಷ ನಿವಾರಣೆ

ಈ ಇಬ್ಬರೂ ಕಲಾವಿದರು ನುಡಿ ತೋರಣ ಕಟ್ಟಿ, ಭಾರತೀಯ ಸಂಸ್ಕೃತಿ, ಸಂಸ್ಕಾರ, ಸಿದ್ಧಾಂತ ಹಾಗೂ ಭಾರತದ ವಿರಾಟ್​ ಸ್ವರೂಪವನ್ನು ಕಣ್ಣೆದುರಿಗೆ ನಿಲ್ಲಿಸುತ್ತಾರೆ. ಮಾತಿನ ಮೂಲಕವೇ ದೇವರ ಪಾತ್ರ ಸೃಷ್ಟಿಸಿ, ತಾವೇ ಆ ಪಾತ್ರದೊಳಗೆ ಹೊಕ್ಕಿ, ದೇವರನ್ನು ಭೂಮಿಗೆ ಕರೆತರುವ ಶ್ರೇಷ್ಠ ಕಲಾವಿದರು ಇವರು. ಯಕ್ಷಗಾನ, ತಾಳಮದ್ದಲೆಯಂತಹ ಕಲೆಯಿಂದ ಜೀವನದ ನಿತ್ಯ ಸಂಘರ್ಷ ನಿವಾರಣೆ ಆಗಲು ಸಾಧ್ಯವಿದೆ ಎಂದರು.

ಮಂಗಳೂರಿನ ಶಾರದಾ ವಿದ್ಯಾ ಸಂಸ್ಥೆಗಳ ಸಂಸ್ಥಾಪಕ ಡಾ. ಎಂ.ಬಿ. ಪುರಾಣಿಕ್​ ಅಧ್ಯಕ್ಷತೆ ವಹಿಸಿದ್ದರು. ವಿದ್ವಾನ್​ ಪಂಜ ಭಾಸ್ಕರ ಭಟ್​ ಸುರತ್ಕಲ್​ ಅಭಿನಂದನೆ ಸಲ್ಲಿಸಿದರು. ಕುಂದಾಪುರದ ಆದರ್ಶ ಆಸ್ಪತ್ರೆಯ ಸಂಸ್ಥಾಪಕ ಡಾ. ಆದರ್ಶ ಹೆಬ್ಬಾರ್​, ಉಡುಪಿ ನಗರಸಭಾ ಸದಸ್ಯೆ ರಜನಿ ಹೆಬ್ಬಾರ್​, ಕಲಾರಂಗದ ಉಪಾಧ್ಯಕ್ಷರಾದ ಕಿಶನ್​ ಹೆಗ್ಡೆ ಪಳ್ಳಿ, ಎಸ್​.ವಿ. ಭಟ್​, ವಿ.ಜಿ. ಶೆಟ್ಟಿ ಉಪಸ್ಥಿತರಿದ್ದರು.

ಕಲಾರಂಗದ ಅಧ್ಯಕ್ಷ ಎಂ. ಗಂಗಾಧರ ರಾವ್​ ಸ್ವಾಗತಿಸಿದರು. ನಾರಾಯಣ ಎಂ. ಹೆಗ್ಡೆ ಪ್ರಶಸ್ತಿ ಪುರಸ್ಕೃತರ ಸಾಧನೆ ವಾಚಿಸಿದರು. ಕಾರ್ಯದರ್ಶಿ ಮುರಲಿ ಕಡೇಕಾರ್​ ಕಾರ್ಯಕ್ರಮ ನಿರೂಪಿಸಿದರು.

ಕಾರ್ಯಕ್ರಮದ ನಂತರ ನಡೆದ ಪಾರ್ತಿ ಸುಬ್ಬ ವಿರಚಿತ ಸೀತಾಪಹಾರ ತಾಳಮದ್ದಲೆ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಯಿತು.