ಬೆಂಗಳೂರು: ವಿಧಾನ ಪರಿಷತ್ಗೆ ನಾಮನಿರ್ದೇಶಿತ ಸದಸ್ಯರಾಗಲು ತೆರೆಮರೆಯಲ್ಲಿ ಸತತ ಪ್ರಯತ್ನ ನಡೆಸಿದ್ದ ಆಕಾಂಕ್ಷಿಗಳಲ್ಲಿ ಅಸಮಾಧಾನ ಮನೆ ಮಾಡಿದೆ. ಬಿಜೆಪಿ ನಾಯಕರಾದ ನಿರ್ಮಲ್ಕುಮಾರ್ ಸುರಾನ, ಜಗ್ಗೇಶ್, ಗೋ.ಮಧುಸೂದನ್, ಪರಮಶಿವಯ್ಯ ಹೆಸರು ಕೊನೆಯವರೆಗೂ ಕೇಳಿ ಬರುತ್ತಿದ್ದವು. ಮಹಿಳಾ ಕೋಟಾದಲ್ಲಿ ತಾರಾ ಅನೂರಾಧ, ಶ್ರುತಿ, ಮಾಳವಿಕಾ ಅವಿನಾಶ್ ಹೆಸರು ಚಾಲ್ತಿಯಲ್ಲಿದ್ದವು. ಇನ್ನು ಸಂಘಟನೆ ನೆಲೆಯಲ್ಲಿ ಬಿಜೆಪಿ ಜಿಲ್ಲಾ ಅಧ್ಯಕ್ಷರೊಬ್ಬರಿಗೆ ಮತ್ತು ಕೇಂದ್ರ ಕಚೇರಿಯಲ್ಲಿ ಕೆಲಸ ಮಾಡುವ ಕಾರ್ಯಕರ್ತರೊಬ್ಬರಿಗೆ ಅದೃಷ್ಟ ಒಲಿಯಬಹುದು ಎನ್ನುವ ಲೆಕ್ಕಾಚಾರ ಇತ್ತು. ಆದರೆ, ಈ ಬಾರಿ ಸಂಘದ ನೆಲೆಯಲ್ಲಿ ಯೋಚಿಸಿದವರಿಗೆ, ಯಾವುದೇ ಲೆಕ್ಕಾಚಾರ ಫಲಿಸಿಲ್ಲ. ಹೈಕಮಾಂಡ್ ಕೂಡ ಸಿಎಂ ಯಡಿಯೂರಪ್ಪ ಅವರ ಶಿಫಾರಸಿಗೆ ಮಣೆ ಹಾಕಿದೆ. ಸಿಎಂ ಯಾರಿಗೂ ಗುಟ್ಟು ಬಿಟ್ಟುಕೊಡದೆ, ಮೌನವಾಗಿದ್ದಕೊಂಡೇ ಎಲ್ಲ್ಲನ್ನೂ ಸಾಧಿಸಿದ್ದಾರೆ ಎನ್ನುವುದು ಪಕ್ಷದೊಳಗಿನ ಒಂದು ಗುಂಪು ಚರ್ಚೆ ನಡೆಸುತ್ತಿದೆ. ಪಕ್ಷದೊಳಗೆ ಮಡುಗಟ್ಟಿರುವ ಅಸಮಾಧಾನ ಚರ್ಚೆಗೆ ಮಾತ್ರ ಸೀಮಿತವಾಗಿದ್ದು, ಇದು ಭಿನ್ನಮತ ಸೃಷ್ಟಿಸುವ ಮಟ್ಟಿಗೆ ಬೆಳೆಯಲಾರದು. ಪಕ್ಷದೊಳಗೆ ಇಂತಹ ಪ್ರಕ್ರಿಯೆ ಸಹಜವಾದದ್ದು ಎಂಬುದು ಬಿಜೆಪಿ ನಾಯಕರ ಸಮರ್ಥನೆ.
