ಮಡಿಕೇರಿ
ಗುಡ್ಡಗಾಡು ಪ್ರದೇಶ ಕೊಡಗಿನಲ್ಲಿ ಪಶುವೈದ್ಯಕೀಯ ಸೇವೆಗೆ ಹಿನ್ನಡೆ ಆಗಿದೆ. ಸಿಬ್ಬಂದಿ ಕೊರತೆ ಒಂದು ಕಡೆಯಾದರೆ, ಸರ್ಕಾರದ ಬಹಳಷ್ಟು ಯೋಜನೆಗಳು ಸಮರ್ಪಕವಾಗಿ ಅನುಷ್ಠಾನಕ್ಕೆ ಬರುತ್ತಿಲ್ಲ. ಒಂದು ಪಾಲಿಕ್ಲಿನಿಕ್ ಸೇರಿ ಜಿಲ್ಲೆಯಲ್ಲಿ ೭೪ ವಿವಿಧ ಬಗೆಯ ಪಶುವೈದ್ಯಕೀಯ ಕೇಂದ್ರಗಳಿದ್ದರೂ ಸದ್ಬಳಕೆ ಆಗುತ್ತಿಲ್ಲ.
ಕೊಡಗು ಪಶುಸಂಗೋಪನಾ ಇಲಾಖೆಯಲ್ಲಿ ಒಟ್ಟು ೩೦೪ ಮಂಜೂರಾದ ಹುದ್ದೆಗಳಿವೆ. ಆದರೆ ಭರ್ತಿಯಾಗಿರುವುದು ಕೇವಲ ೭೭ ಹುದ್ದೆಗಳು. ಉಳಿದ ೨೨೭ ಹುದ್ದೆಗಳು ಖಾಲಿ ಉಳಿದಿವೆ. ೨೨ ಪಶುವೈದ್ಯಾಧಿಕಾರಿಗಳು ಇರಬೇಕಿದಲ್ಲಿ ೭ ಜನ ಮಾತ್ರ ಇದ್ದು ಉಳಿದ ೧೫ ಹುದ್ದೆಗಳು ಖಾಲಿ ಇದೆ. ೧೫ ಹಿರಿಯ ಪಶು ವೈದ್ಯಾಧಿಕಾರಿಗಳು ಇರಬೇಕಿದ್ದಲ್ಲಿ ೪ ಜನರು ಮಾತ್ರ ಇದ್ದು. ೧೧ ಹುದ್ದೆಗಳಲ್ಲಿ ಯಾರೂ ಇಲ್ಲ. ೭ ಮುಖ್ಯ ಪಶುವೈದ್ಯಾಧಿಕಾರಿಗಳು ಇರಬೇಕಿದ್ದಲ್ಲಿ ಕೇವಲ ಒಬ್ಬರು ಮಾತ್ರ ಇದ್ದಾರೆ.
೧೧೮ ಡಿ ದರ್ಜೆ ನೌಕರರ ಹುದ್ದೆಯಲ್ಲಿ ೯೬ ಹುದ್ದೆಗಳು ಖಾಲಿ ಇದೆ. ಬೆರಳಚ್ಚುಗಾರರು, ಎಕ್ಸರೇ ತಂತ್ರಜ್ಞರು ಒಬ್ಬರೂ ಇಲ್ಲ. ಆರ್ಥಿಕ ಮಿತಿ ಕಾರಣದಿಂದ ನೇರ ನೇಮಕಾತಿಗೆ ಅವಕಾಶ ಇಲ್ಲ ಎಂದು ಸÀರ್ಕಾರ ಈಗಾಗಲೇ ಸ್ಪಷ್ಟನೆ ನೀಡಿರುವುದರಿಂದ ಖಾಲಿ ಇರುವ ಹುದ್ದೆಗಳು ಸದ್ಯಕ್ಕಂತೂ ಭರ್ತಿಯಾಗುವ ಲಕ್ಷಣಗಳಿಲ್ಲ. ಜಾನುವಾರು ಅಭಿವೃದ್ಧಿ ಅಧಿಕಾರಿ, ಜಾನುವಾರು ಅಧಿಕಾರಿ, ಪಶುವೆದ್ಯಕೀಯ ಸಹಾಯಕರ ಹುದ್ದೆಗಳನ್ನು ಮುಂಬಡ್ತಿ ಮೂಲಕ ಇಲಾಖೆಯಲ್ಲಿ ಭರ್ತಿ ಮಾಡಿದ್ದರೂ ಕೊಡಗಿನಲ್ಲಿ ಈ ಹುದ್ದೆಗಳಿಗೆ ಯಾರೂ ಬರುತ್ತಿಲ್ಲ..
ಪಶು ವೈದ್ಯಕೀಯ ಇಲಾಖೆಯಲ್ಲಿ ವೈದ್ಯರು ಮತ್ತು ಸಿಬ್ಬಂದಿ ಕೊರತೆ ಕಾರಣದಿಂದ ಸರ್ಕಾರದ ವಿವಿಧ ಯೋಜನೆಗಳು ಫಲಾನುಭವಿಗಳಿಗೆ ಸಮರ್ಪಕವಾಗಿ ದೊರಕಲು ಅಡ್ಡಿ ಆಗಿದೆ. ಉಚಿತ ಜಾನುವಾರು ವಿಮಾ ಯೋಜನೆ, ಪಶುಭಾಗ್ಯ ಯೋಜನೆ, ಅಮೃತ ಯೋಜನೆ, ಗಿರಿರಾಜ ಕೋಳಿ ಮರಿಗಳ ವಿತರಣೆ ಕಾರ್ಯಕ್ರಮಗಳು ಸೇರಿದಂತೆ ಹಲವು ಯೋಜನೆಗಳ ಬಗ್ಗೆ ರೈತರಿಗೆ ಅರಿವು ಮೂಡಿಸಲೂ ಸಾಧ್ಯವಾಗುತ್ತಿಲ್ಲ.
ಜಿಲ್ಲೆಯಲ್ಲಿ ೧ ಪಾಲಿ ಕ್ಲಿನಿಕ್, ೧೭ ಪಶು ಆಸ್ಪತ್ರೆ, ೨೨ ಪಶು ಚಿಕಿತ್ಸಾಲಯ, ೩೧ ಪ್ರಾಥಮಿಕ ಪಶು ಚಿಕಿತ್ಸಾ ಕೇಂದ್ರಗಳು ಹಾಗೂ ಸಂಚಾರಿ ಪಶು ಚಿಕಿತ್ಸಾಲಯUಳೂ ಇದ್ದು, ವೈದ್ಯರು ಮತ್ತು ಸಿಬ್ಬಂದಿ ಕೊರತೆಯಿಂದ ಸಮರ್ಪಕ ಸೇವೆ ಸಿಗದಂತಾಗಿದೆ.
