ಟ್ರ್ಯಾಕ್ಟರ್​ ಮಾಲೀಕರಿಗೆ ಲೋಕಾ ಸಂಕಷ್ಟ!

ಕಿರುವಾರ ಎಸ್​.ಸುದರ್ಶನ್​ ಕೋಲಾರ: ಕನ್ನಡದ ನಂ.1 ದಿನಪತ್ರಿಕೆ ವಿಜಯವಾಣಿ ಬಯಲಿಗೆಳೆದಿದ್ದ ಬೋನೈಡ್​ ಹಗರಣಕ್ಕೆ ಸಂಬಂಧಿಸಿದಂತೆ ಟ್ರ್ಯಾಕ್ಟರ್​ ಮಾಲೀಕರಿಗೀಗ ಸಂಕಷ್ಟ ಶುರುವಾಗಿದೆ. ಕೋಲಾರ ತಾಲೂಕಿನ ನರಸಾಪುರ ನಾಡಕಚೇರಿಯಿಂದ ಕೊಟ್ಟಿರುವ ಬೋನೈಡ್​ ಸರ್ಟಿಫಿಕೇಟ್​ಗಳ ಆಧಾರದಲ್ಲಿ ಟ್ರಾ$್ಯಕ್ಟರ್​ ನೋಂದಣಿ ಮಾಡಿಸಿರುವ ಮಾಲೀಕರ ಪಟ್ಟಿ ಸಿದ್ದಪಡಿಸಿಕೊಂಡಿರುವ ಲೋಕಾಯುಕ್ತ ಪೊಲೀಸರು, ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್​ ಜಾರಿಗೊಳಿಸಿದ್ದು, ಹಲವರಲ್ಲಿ ಬಂಧನ ಭೀತಿ ಶುರುವಾಗಿದೆ.

ನರಸಾಪುರ ಹೋಬಳಿ ನಾಡಕಚೇರಿಯಲ್ಲಿ ನಕಲಿ ರೈತರಿಗೆ ಬೋನೈಡ್​ ಸರ್ಟಿಫಿಕೇಟ್​ಗಳನ್ನು ವಿತರಿಸಿರುವ ಬಗ್ಗೆ 2023 ಮೇ 18ರಂದು "ನಕಲಿ ರೈತರಿಗೆ ಬೋನೈಡ್​ ಸರ್ಟಿಫಿಕೇಟ್​' ಶೀರ್ಷಿಕೆಯಡಿ ವಿಜಯವಾಣಿ ಮುಖಪುಟದಲ್ಲಿ ಪ್ರಕಟಿಸಿದ್ದ ವಿಶೇಷ ವರದಿಯನ್ನು ಆಧರಿಸಿ ಉಪ ಲೋಕಾಯುಕ್ತ ಕೆ.ಎನ್​.ಣೀಂದ್ರ ಸ್ವಯಂಪ್ರೇರಿತ ಕೇಸ್​ ದಾಖಲಿಸಿಕೊಂಡು ತನಿಖೆ ಆದೇಶಿಸಿದ್ದರು. ಕೋಲಾರ ಲೋಕಾಯುಕ್ತ ಎಸ್ಪಿ ನೇತೃತ್ವದಲ್ಲಿ ತನಿಖೆ ನಡೆಸಿದ ತಂಡ ಅಂತಿಮ ವರದಿಯನ್ನು ಕೋರ್ಟ್​ಗೆ ದಾಖಲಿಸಿತ್ತು. ಇದೀಗ ತನಿಖೆಯ ಮುಂದುವರಿದ ಭಾಗವಾಗಿ ಟ್ರಾ$್ಯಕ್ಟರ್​ ಮಾಲೀಕರ ವಿಚಾರಣೆ ಆರಂಭವಾಗಿದೆ.

ಕರ್ನಾಟಕ ಲೋಕಾಯುಕ್ತ ಕಾಯ್ದೆ 1984ರ ಸೆನ್​ 7(2) ಮತ್ತು 9(ಎ) ಪ್ರಕಾರ ನರಸಾಪುರ ನಾಡಕಚೇರಿ ಡೆಪ್ಯುಟಿ ತಹಶೀಲ್ದಾರ್​, ಕಂಪ್ಯೂಟರ್​ ಆಪರೇಟರ್​, ಕೋಲಾರ ತಾಲೂಕು ತಹಶೀಲ್ದಾರ್​ ಹಾಗೂ ಕೋಲಾರ ಪ್ರಾದೇಶಿಕ ಸಾರಿಗೆ ಕಚೇರಿ ಎಆರ್​ಟಿಒ ಅವರ ವಿರುದ್ಧ ದೂರು ದಾಖಲಿಸಿಕೊಳ್ಳಲಾಗಿತ್ತು. ಕೋಲಾರ ಜಿಲ್ಲೆ ಗರುಡಪಾಳ್ಯದಲ್ಲಿರುವ ಕಂದಾಯ ಸಚಿವ ಕೃಷ್ಣ ಬೈರೇಗೌಡ ಅವರ ಜಮೀನುಗಳ ಸರ್ವೇ ನಂಬರ್​ ಬಳಸಿಯೂ ಬೇರೆಬೇರೆ ವ್ಯಕ್ತಿಗಳಿಗೆ ನಕಲಿ ಬೋನೈಡ್​ ಸರ್ಟಿಫಿಕೇಟ್​ಗಳನ್ನು ವಿತರಣೆ ಮಾಡಲಾಗಿದೆ.

ವಂಚನೆ ಹೇಗೆ?

- ಮೂಲ ಮಾಲೀಕರ ಹೆಸರಲ್ಲಿರುವ ಜಮೀನಿಗೆ ಬೇರೆ ವ್ಯಕ್ತಿ ಹೆಸರಿನಲ್ಲಿ ಬೋನೈಡ್​ ಪತ್ರ ಸೃಷ್ಟಿ.

- ಕೆಲ ಗ್ರಾಮಗಳಲ್ಲಿರುವ ಸರ್ಕಾರಿ ಖರಾಬ್​ ಭೂಮಿಯ ಹೆಸರಿಗೂ ಪ್ರಮಾಣ ಪತ್ರ ಕೊಡಲಾಗಿದೆ.

- ತಲಾ ನಕಲಿ ದೃಢೀಕರಣ ಪತ್ರಕ್ಕೆ ಇಂತಿಷ್ಟು ಲಂಚ ಪಡೆದು ಮಾಡಿಕೊಟ್ಟ ನಾಡಕಚೇರಿ ಸಿಬ್ಬಂದಿ.

- ಬೆಂ.ನಗರ, ಗ್ರಾಮಾಂತರ, ಚಿಕ್ಕಬಳ್ಳಾಪುರ, ಕೋಲಾರ ಜಿಲ್ಲೆ ವ್ಯಕ್ತಿಗಳ ಹೆಸರಿಗೆ ಪತ್ರ ವಿತರಣೆ.

- ನಕಲಿ ಪತ್ರಗಳನ್ನು ಸಲ್ಲಿಸುವ ಮೂಲಕ ಕೃಷಿಕ ಎಂದು ಬಿಂಬಿಸಿಕೊಂಡು ವಾಹನಗಳ ನೋಂದಣಿ.

ಕೋಲಾರದಲ್ಲೂ ದಂಧೆ ವ್ಯಾಪಕ

ತುಮಕೂರಿನಲ್ಲಿ ಬೋನೋೈಡ್​ ಸರ್ಟಿಫಿಕೇಟ್​ ದಂಧೆ ಬೆಳಕಿಗೆ ಬರುತ್ತಿದ್ದಂತೆ, ಲೋಕಾಯುಕ್ತ ಪೊಲೀಸರು ಆರ್​ಟಿಒ ಕಚೇರಿ ಮೇಲೆ ದಾಳಿ ಮಾಡಿ, ಪರಿಶೀಲಿಸಿದರು. ಆಗ ಸುಮಾರು ನಕಲಿ ಬೋನೋೈಡ್​ ಸರ್ಟಿೇಕೇಟ್​ಗಳು ಪತ್ತೆಯಾಗಿದ್ದವು. ಇದನ್ನು ಗಂಭೀರವಾಗಿ ತೆಗೆದುಕೊಂಡ ಪೊಲೀಸರು, ಆರೋಪ ಇರುವ ಆರ್​ಟಿಒ ಕಚೇರಿಗಳ ಮೇಲೂ ದಾಳಿ ನಡೆಸಿದರು. ಇದು ಜಿಲ್ಲೆಯಲ್ಲೂ ಸಹ ವ್ಯಾಪಕವಾಗಿ ನಡೆದಿದ್ದು, ಜಿಲ್ಲಾ ಲೋಕಾಯುಕ್ತ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

 ಪರಿಶೀಲಿಸದೆ ವಿತರಣೆ

ನಾಡ ಕಚೇರಿಗಳಲ್ಲಿ ಬೋನೋೈಡ್​ ಸರ್ಟಿಫಿಕೇಟ್​ಗಳನ್ನು ವಿತರಣೆ ಮಾಡಲಾಗುತ್ತಿದ್ದು, ಉಪ ತಹಸೀಲ್ದಾರ್​ ಮತ್ತು ಕಂಪ್ಯೂಟರ್​ ಆಪರೇಟ್​ಗಳು ನಕಲಿ ಪ್ರಮಾಣ ಪತ್ರ ನೀಡುತ್ತಾರೆ. ಪ್ರಮಾಣ ಪತ್ರ ನೀಡಬೇಕಾದರೆ ಪಹಣಿ, ಆಧಾರ್​ ಕಾರ್ಡ್​, ಟ್ರ್ಯಾಕ್ಟರ್​ ದಾಖಲೆಗಳು ತಾಳೆ ಆಗುತ್ತಿವೆಯೇ ಎಂಬುದು ಸೇರಿ ಹಲವು ನಿಯಮ ಪಾಲಿಸಬೇಕು. ಇದ್ಯಾವುದನ್ನು ಮಾಡದೆ ಅರ್ಜಿದಾರ ಸಲ್ಲಿಸುವ ದಾಖಲೆಗಳನ್ನೇ ಇಟ್ಟುಕೊಂಡು ಪ್ರಮಾಣ ಪತ್ರ ವಿತರಿಸಲಾಗುತ್ತಿದೆ.

ಇನ್ನು ಆರ್​ಟಿಒ ಕಚೇರಿಗಳಲ್ಲೂ ಸಹ ದಾಖಲೆ ಪರಿಶೀಲನೆ ಮಾಡದೆ ನಕಲಿ ಸರ್ಟಿಫಿಕೇಟ್​ ಮೇಲೆಯೇ ವಾಹನ ನೋಂದಣಿ ಮಾಡುತ್ತಿರುವುದು ಚರ್ಚೆಗೆ ಗ್ರಾಸವಾಗಿದೆ.

17ರಂದು ವಿಚಾರಣೆ

ನರಸಾಪುರ ನಾಡಕಚೇರಿ ಉಪ ತಹಸೀಲ್ದಾರ್​ ಮತ್ತು ಕಂಪ್ಯೂಟರ್​ ಆಪರೇಟರ್​ ಮತ್ತು ಇತರರ ವಿರುದ್ಧ ಕೋಲಾರ ಲೋಕಾಯುಕ್ತ ಠಾಣೆಯಲ್ಲಿ ಕಲಂ 7(ಎ), 7(ಎ), 11(1)(ಎ) ಆರ್​/ಡಬ್ಲ್ಯೂ 13(12) ಪಿ.ಸಿ (ತಿದ್ದುಪಡಿ0 ಆಕ್ಟ್​ 1988 ಮತ್ತು 120(ಬಿ), 420, 465, 468, 471 ಐಪಿಸಿ ಪ್ರಕರಣದ ತನಿಖೆಯಲ್ಲಿ ವಿಚಾರಣೆ ಅವಶ್ಯವಿದ್ದು, ಫೆ.17ರಂದು ಬೆಳಗ್ಗೆ 11 ಗಂಟೆಗೆ ಹಾಜರಾಗುವಂತೆ ಉಪಾಧೀಕ್ಷಕ ಯಶವಂತ್​ ನೊಟೀಸ್​ ನೀಡಿದ್ದಾರೆ.