ಮಧುಮೇಹದ ಬಗ್ಗೆ ಯುವಜನತೆಯಲ್ಲಿ ಜಾಗೃತಿ ಅಗತ್ಯ

ಉಡುಪಿ: ಆಧುನಿಕ ಜೀವನಶೈಲಿ, ಸ್ಥೂಲಕಾಯ ಹಾಗೂ ಅನಾರೋಗ್ಯಕರ ಆಹಾರ ಪದ್ಧತಿ ಇಂದಿನ ಯುವ ಜನಾಂಗದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ. ಈ ಬಗ್ಗೆ ಜಾಗೃತಿ ವಹಿಸದಿದ್ದಲ್ಲಿ ಭವಿಷ್ಯದಲ್ಲಿ ಅಪಾಯ ಎದುರಾಗಲಿದೆ ಎಂದು ಬೆಂಗಳೂರು ಸೆಂಟರ್​ ಫಾರ್​ ಡಯಾಬಿಟೀಸ್​ ಮತ್ತು ಎಂಡೋಕೆನ್​ ಕೇರ್​ ಮುಖ್ಯಸ್ಥ ಡಾ. ಕೆ.ಎನ್​.ಪ್ರಸನ್ನ ಕುಮಾರ್​ ಎಚ್ಚರಿಸಿದರು.

ಭಾನುವಾರ ಜಿಲ್ಲಾಸ್ಪತ್ರೆ ಆವರಣದಲ್ಲಿ ಆದರ್ಶ ಆಸ್ಪತ್ರೆ, ಆದರ್ಶ ಚಾರಿಟೆಬಲ್​ ಟ್ರಸ್ಟ್​, ಆದರ್ಶ ಸಮೂಹ ಸಂಸ್ಥೆಗಳು, ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ , ಜಿಲ್ಲಾ ಆಸ್ಪತ್ರೆ, ಜಿಲ್ಲಾ ಸರ್ವೇಕ್ಷಣಾ ಘಟಕ, ಅಸೋಸಿಯೇಶನ್​ ಆಫ್​ ಫಿಸಿಶಿಯನ್ಸ್​ ಆಫ್​ ಇಂಡಿಯಾ ಮತ್ತು ಲಯನ್ಸ್​ ಕ್ಲಬ್​ ಸಂಯುಕ್ತಾಶ್ರಯದಲ್ಲಿ ಜರಗಿದ ಮಧುಮೇಹ ಜಾಗೃತಿ ಜಾಥಾದಲ್ಲಿ ಅವರು ಮಾತನಾಡಿದರು.

11 ತಿಂಗಳಿನಿಂದ 25 ವರ್ಷ ವಯೋಮಾನದ ಸುಮಾರು 40 ಸಾವಿರ ಮಧುಮೇಹಿರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿದ್ದು, ಹೆತ್ತವರೂ ಮಕ್ಕಳಿಗೆ ಮಧು ಮೇಹದ ಕುರಿತು ಅರಿವು ಮೂಡಿಸಬೇಕೆಂದು ಕೋರಿದರು. ಮಾಜಿ ಸಂಸದ ಕೆ. ಜಯಪ್ರಕಾಶ್​ ಹೆಗ್ಡೆ ಜಾಥಾ ಉದ್ಘಾಟಿಸಿ, ಶುಭ ಸಮಾರಂಭಗಳಲ್ಲಿ ಮಧುಮೇಹಕ್ಕೆ ಪ್ರೇರಕವಾಗಬಲ್ಲ ಪಾಕ ವೈವಿಧ್ಯಗಳು ಒಂದು ಹಂತದಲ್ಲಿ ಮಧುಮೇಹ ಹೆಚ್ಚಳಕ್ಕೆ ಪರೋಕ್ಷವಾಗಿ ಪರಿಣಾಮ ಬೀರುತ್ತಿವೆ. ಈ ಬಗ್ಗೆ ಮನೆ ಮನೆಗೆ ತೆರಳಿ ಆರೋಗ್ಯ ಶಿಕ್ಷಣ ನೀಡಬೇಕೆಂದರು.

ಆದರ್ಶ ಆಸ್ಪತ್ರೆಯ ವೈದ್ಯಕಿಯ ನಿರ್ದೇಶಕ ಡಾ. ಜಿ. ಎಸ್​. ಚಂದ್ರಶೇಖರ್​ ಪ್ರಾಸ್ತಾವಿಕವಾಗಿ ಮಾತನಾಡಿ, ಭಾರತ ಇದೀಗ ಹತ್ತು ಕೋಟಿ ಮಧುಮೇಹಿರೋಗಿಗಳನ್ನು ಹೊಂದಿದೆ. ಈ ಬಗ್ಗೆ ಎಚ್ಚೆತ್ತು ಕೊಳ್ಳದಿದ್ದಲ್ಲಿ ಮುಂದೆ ಇನ್ನೂ ಹತ್ತು ಕೋಟಿ ಪೂರ್ವ ಮಧುಮೇಹಿಗಳಾಗುವ ಆತಂಕ ಇದೆ. ಇಂದು 5 ಸೆಕೆಂಡಿಗೆ ಓರ್ವ ಡಯಾಬಿಟಿಸ್​ ರೋಗಿ ಮೃತ್ಯು ಹೊಂದುತ್ತಿದ್ದಾನೆ. ಡಯಾಬಿಟಿಸ್​ ಎಜುಕೇರ್ಟಸ್​ ಇಂದಿನ ಅನಿವಾರ್ಯ ಎಂದು ಹೇಳಿದರು.

ಜಿಲ್ಲಾ ಸರ್ವೇಕ್ಷಣಾಧಿಕಾರಿ ಡಾ. ನಾಗರತ್ನ ಶಾಸ್ತ್ರಿ ,ಉಡುಪಿ ಜಿಲ್ಲಾ ಆಸ್ಪತ್ರೆಯ ಸರ್ಜನ್​ ಡಾ. ಅಶೋಕ್​ , ತಾಲೂಕು ವೈಧ್ಯಾಧಿಕಾರಿ ಡಾ . ವಾಸುದೇವ , ಡಾ.ರಾಮ ರಾವ್​, ಐ ಎಂ ಎ ಅಧ್ಯಕ್ಷ ಸುರೇಶ್​ ಶೆಣೈ , ಡಾ, ಅನಂತ್​ ಶೆಣೈ , ಎ ಪಿ ಐ ಉಡುಪಿ ಮಣಿಪಾಲ ಘಟಕದ ಡಾ. ಅನಂತ್​ ಶೆಣೈ, ಲಯನ್ಸ್​ ಕ್ಲಬ್​ ಡಾ. ಅಶೋಕುಮಾರ್​ ವೈ.ಜಿ., ಲಯನ್ಸ್​ ಕ್ಲಬ್​ ಜಿಲ್ಲಾ ಗವರ್ನರ್​ ಮಹ್ಮದ್​ ಹನೀಫ್​, ವಾಸುದೇವ್​ ಉಪಾಧ್ಯ , ಆದರ್ಶ ಆಸ್ಪತ್ರೆಯ ಸಿ ಇ ಓ ವಿಮಲಾ ಚಂದ್ರಶೇಖರ್​ ಉಪಸ್ಥಿತರಿದ್ದರು. ಆದರ್ಶ ಆಸ್ಪತ್ರೆಯ ಅನುಶ್ರೀ ಆಚಾರ್ಯ ಕಾರ್ಯಕ್ರಮ ನಿರೂಪಿಸಿದರು. ಬಳಿಕ ಜಾಗೃತಿ ಜಾಥಾ ಆದರ್ಶ ಆಸ್ಪತ್ರೆಯವರೆಗೆ ನಡೆಯಿತು.