ಬಾಲವಿಕಾಸ ಅಕಾಡೆಮಿಯಲ್ಲಿ ಸುಸಜ್ಜಿತ ಸ್ಟುಡಿಯೋ

ಸ್ಟುಡಿಯೋದಲ್ಲಿ ಇಬ್ಬರು ಕುಳಿತುಕೊಳ್ಳಬಹುದಾದ ಕುರ್ಚಿ ವ್ಯವಸ್ಥೆ ಇದ್ದು, ಸಂದರ್ಶನಕ್ಕೆ ಸೂಕ್ತವಾಗಿದೆ. ಕುರ್ಚಿಗಳನ್ನು ತೆಗೆದು ವೇದಿಕೆಯನ್ನಾಗಿಯೂ ಬಳಸಿಕೊಳ್ಳಬಹುದು. 8- 10 ಮಕ್ಕಳು ನೃತ್ಯ, ಸಮೂಹ ಗಾಯನ, ಇತರ ಸ್ಪರ್ಧಾ ಚಟುವಟಿಕೆಗಳಿಗೂ ಇದು ಬಳಕೆಯಾಗಲಿದೆ. ಸ್ಟುಡಿಯೋ ಸಂಪೂರ್ಣ ಧ್ವನಿನಿರೋಧಕವಾಗಿದ್ದು, ಕಾರ್ಯಕ್ರಮಗಳ ರೆಕಾರ್ಡಿಂಗ್‌ಗೆ ಸೂಕ್ತವಾಗಿದೆ. ರೆಕಾರ್ಡಿಂಗ್‌ಗೆ ಪೂರಕವಾಗುವಂಥ ಅತ್ಯಾಧುನಿಕ ಕ್ಯಾಮರಾ, ಮೈಕ್, ಎಡಿಟಿಂಗ್ ಸಿಸ್ಟಂ ಅಳವಡಿಸಲಾಗಿದೆ.

ಜಿಲ್ಲೆಯ ಎಸ್‌ಎಸ್‌ಎಲ್‌ಸಿ ಫಲಿತಾಂಶ ಸುಧಾರಣೆಗೆ ಜಿಲ್ಲಾಡಳಿತ `ಮಿಷನ್ ವಿದ್ಯಾಕಾಶಿ' ಅನುಷ್ಠಾನಗೊಳಿಸಿದೆ. ಕಳೆದ ಸಾಲಿನಲ್ಲಿ ಫಲಿತಾಂಶದಲ್ಲಿ ಏರಿಕೆಯಾಗದಿದ್ದರೂ ವಿದ್ಯಾರ್ಥಿಗಳ ಉತ್ತೀರ್ಣ ಪ್ರಮಾಣದಲ್ಲಿ ಪ್ರಗತಿಯಾಗಿತ್ತು. ಶೀಘ್ರದಲ್ಲೇ ಉದ್ಘಾಟನೆಗೊಳ್ಳಲಿರುವ ಸ್ಟುಡಿಯೋ `ಮಿಷನ್ ವಿದ್ಯಾಕಾಶಿ' ಯೋಜನೆಗೂ ಪೂರಕವಾಗಲಿದೆ. ಶೈಕ್ಷಣಿಕ ಚಟುವಟಿಕೆಗಳಿಗಾಗಿ ಬಳಸಿಕೊಳ್ಳಲು ಅಕಾಡೆಮಿ ನಿರ್ದೇಶಕರು ಈಗಾಗಲೇ ಶಾಲಾ ಶಿಕ್ಷಣ ಇಲಾಖೆಯ ರಾಜ್ಯದ ಎಲ್ಲ ಉಪ ನಿರ್ದೇಶಕರಿಗೆ ನಿರ್ದೇಶನ ನೀಡಿದ್ದಾರೆ.

ಸ್ಟುಡಿಯೋದಲ್ಲಿ ನಾಡಿನ ಸಂಪನ್ಮೂಲ ವ್ಯಕ್ತಿಗಳು, ವಿಷಯ ತಜ್ಞರನ್ನು ಕರೆಸಿ ಮಕ್ಕಳ ಶೈಕ್ಷಣಿಕ ಪಠ್ಯ ಚಟುವಟಿಕೆಗಳನ್ನು ರೆಕಾರ್ಡ್ ಮಾಡಿ ವಿಡಿಯೋ ಲಿಂಕ್‌ಗಳನ್ನು ಎಲ್ಲ ಶಾಲೆಗಳಿಗೆ ತಲುಪಿಸುವ ಯೋಜನೆ ಇದೆ. ಈ ಮೂಲಕ ಎಸ್‌ಎಸ್‌ಎಲ್‌ಸಿ ಫಲಿತಾಂಶ ಹೆಚ್ಚಿಸುವ ಉದ್ದೇಶ ಹೊಂದಲಾಗಿದೆ.