ನಾಲ್ಕೈದು ತಾಸು ಮಾರ್ಗ ಮಧ್ಯೆ ನಿಂತ ರೈಲುಗಳು trains

ಹಲವು ರೈಲುಗಳ ಸಂಚಾರ ಸ್ಥಗಿತಗೊಂಡರೆ, ಇನ್ನೂ ಕೆಲ ರೈಲುಗಳು ತಡವಾಗಿ ಸಂಚರಿಸಿವೆ. ಕೆಲವಂತೂ ಸಂಚಾರವನ್ನೇ ರದ್ದುಗೊಳಿಸಿವೆ.

ಲೋಂಡಾ ಯಾರ್ಡ್​ನಲ್ಲಿ ಹೆಚ್ಚುವರಿ ಪ್ರಯಾಣಿಕ ಮಾರ್ಗ (ಪ್ಯಾಸೆಂಜರ್ ಲೈನ್) ಹಾಗೂ ನೂತನ ಪ್ಲಾಟ್ ಫಾಮ್ರ್ ಕಾಮಗಾರಿಗಾಗಿ ನಾನ್ ಇಂಟರ್​ಲಾಕಿಂಗ್ (ಎನ್​ಐ) ಕೆಲಸವನ್ನು ಕೈಗೆತ್ತಿಕೊಳ್ಳಲಾಗಿತ್ತು.

ಹೀಗಾಗಿ, ಸೋಮವಾರ ಇಡೀ ರಾತ್ರಿ ವಿದ್ಯುತ್ ಪೂರೈಕೆ ಸ್ಥಗಿತಗೊಳಿಸಲಾಗಿತ್ತು. ಇದರಿಂದ ರೈಲ್ವೆ ಸಿಗ್ನಲ್, ಮಾರ್ಗಕ್ಕೆ ವಿದ್ಯುತ್ ಪೂರೈಕೆ ಸ್ಥಗಿತಗೊಂಡಿತ್ತು. ನಿಗದಿತ ಅವಧಿಯಂತೆ ಮಂಗಳವಾರ ಬೆಳಗ್ಗೆ 9.45ಕ್ಕೆ ವಿದ್ಯುತ್ ಸಂಪರ್ಕ ನೀಡಬೇಕಿತ್ತು. ಆದರೆ, ಅಧಿಕಾರಿಗಳು ಹಾಗೂ ಸಿಬ್ಬಂದಿಯ ಬೇಜವಾಬ್ದಾರಿಯಿಮದಾಗಿ 8 ತಾಸು ತಡವಾಗಿ ವಿದ್ಯುತ್ ಸಂಪರ್ಕ ನೀಡಲಾಯಿತು.

ಮಾರ್ಗ ಮಧ್ಯೆ ನಿಂತ ರೈಲುಗಳು : ಕಾಮಗಾರಿ ಕೈಗೊಂಡ ಸ್ಥಳ ವಿದ್ಯುದ್ದೀಕರಣಗೊಂಡ ಮಾರ್ಗವಾಗಿದ್ದರಿಂದ ನಿಜಾಮುದ್ದೀನ್- ವಾಸ್ಕೊ ರೈಲು ಹಾಗೂ ದಾದರ - ಹುಬ್ಬಳ್ಳಿ ಎಕ್ಸ್​ಪ್ರೆಸ್ ರೈಲುಗಳು ಸುಮಾರು 3 ತಾಸು 41 ನಿಮಿಷಗಳವರೆಗೆ ಮಾರ್ಗ ಮಧ್ಯೆ ನಿಲುಗಡೆಗೊಂಡಿತ್ತು. ಬೆಂಗಳೂರು-ಬೆಳಗಾವಿ ಸೂಪರ್ ಫಾಸ್ಟ್ ಎಕ್ಸ್​ಪ್ರೆಸ್ ರೈಲು ಅಳ್ನಾವರ ನಿಲ್ದಾಣದಲ್ಲಿ 6 ತಾಸು ನಿಂತಿದ್ದವು.

ಬೆಂಗಳೂರು- ಜೋಧಪುರ ಎಕ್ಸ್​ಪ್ರೆಸ್ ರೈಲು 4 ತಾಸು, ಮೈಸೂರು-ಬೆಳಗಾವಿ ರೈಲು ನಾಲ್ಕೂವರೆ ತಾಸು, ಮುಂಬೈ-ದಾದರ್ ಸೆಂಟ್ರಲ್- ಪುದುಚೇರಿ ಎಕ್ಸ್​ಪ್ರೆಸ್ ರೈಲು ಸುಮಾರು 3 ತಾಸು, ಮೀರಜ್- ಹುಬ್ಬಳ್ಳಿ ಪ್ಯಾಸೆಂಜರ್ ರೈಲು ಸುಮಾರು ಎರಡೂವರೆ ತಾಸು, ಸಿಕಂದರಾಬಾದ್- ಬೆಳಗಾವಿ ಎಕ್ಸ್​ಪ್ರೆಸ್ ರೈಲು ಸುಮಾರು 4 ತಾಸು, ವಾಸ್ಕೊ- ಶಾಲಿಮಾರ ಅಮರಾವತಿ ಎಕ್ಸ್​ಪ್ರೆಸ್ ರೈಲು 2 ತಾಸುಗಳವರೆಗೆ, ತಿರುಪತಿ- ಛತ್ರಪತಿ ಸಾಹುಮಹಾರಾಜ ಟರ್ವಿುನಸ್ ಕೊಲ್ಲಾಪುರ ರೈಲು 3 ತಾಸು, ಅಜ್ಮೀರ್- ಕೆಎಸ್​ಆರ್ ಬೆಂಗಳೂರು ಗರೀಬನವಾಜ ಎಕ್ಸ್​ಪ್ರೆಸ್ ರೈಲು ಎರಡೂವರೆ ತಾಸುಗಳವರೆಗೆ ಮಾರ್ಗ ಮಧ್ಯೆ ನಿಲುಗಡೆಗೊಂಡಿದ್ದವು.

ತಡವಾಗಿ ಸಂಚಾರ : ಬೆಳಗಾವಿ- ಬೆಂಗಳೂರು ಎಕ್ಸ್​ಪ್ರೆಸ್ ರೈಲು 3 ತಾಸು ಹಾಗೂ ಬೆಳಗಾವಿ-ಮೈಸೂರು ಎಕ್ಸ್​ಪ್ರೆಸ್ ರೈಲು 4 ತಾಸು ತಡವಾಗಿ ಸಂಚಾರ ಆರಂಭಿಸಿದವು. ಸೊಲ್ಲಾಪುರ-ಧಾರವಾಡ ಪ್ಯಾಸೆಂಜರ್ ರೈಲು ಧಾರವಾಡದವರೆಗೆ ಸಂಚರಿಸದೆ, ನವಲೂರು ನಿಲ್ದಾಣದಲ್ಲಿಯೇ ನಿಲುಗಡೆಗೊಂಡಿತು.

ಹುಬ್ಬಳ್ಳಿ-ರಕ್ಸೌಲ್ (ಬಿಹಾರ) ಸ್ಪೇಷಲ್ ಫೇರ್ ಫೆಸ್ಟಿವಲ್ ಸ್ಪೇಷಲ್ ರೈಲು ಸಂಚಾರವನ್ನು ಹಾಗೂ ರಕ್ಸೌಲ್ -ಹುಬ್ಬಳ್ಳಿ ಸ್ಪೇಷಲ್ ಫೇರ್ ಫೆಸ್ಟಿವಲ್ ಸ್ಪೇಷಲ್ ರೈಲು ಸಂಚಾರವನ್ನು ಸಂಪೂರ್ಣ ರದ್ದುಗೊಳಿಸಲಾಯಿತು. ಬ್ಲಾಕ್ ತೆರವುಗೊಳಿಸಿದ ನಂತರ ರೈಲುಗಳ ಸಂಚಾರ ಪುನರಾರಂಭಗೊಂಡವು.