ವಿದ್ಯಾರ್ಥಿಗಳೇ ಕೊಳವೆ ಬಾವಿ ಕೊರೆಸಿದರು

ಧಾರವಾಡ: ಊರಲ್ಲಿದ್ದ 5-6 ಕೊಳವೆ ಬಾವಿಗಳು ಬತ್ತಿದ್ದು ನೀರಿಗೆ ಹಾಹಾಕಾರ ಉಂಟಾಗಿದೆ. ಗ್ರಾಪಂ ಆಡಳಿತಾಧಿಕಾರಿ, ಪಿಡಿಒಗೆ ಹೇಳಿದರೂ ಬವಣೆ ನೀಗಿರಲಿಲ್ಲ. ಹೀಗಾಗಿ ಶಾಲಾ ಮಕ್ಕಳೇ ಶಾಲಾ ಸುಧಾರಣೆ ಸಮಿತಿ ಸದಸ್ಯರೊಂದಿಗೆ ಸೇರಿ ಪಟ್ಟಿ ಹಾಕಿ (ಹಣ ಕೂಡಿಸಿ) ಬೋರ್‌ವೆಲ್ ಕೊರೆಸಿ ಮಾದರಿಯಾಗಿದ್ದಾರೆ. ಇದರಿಂದ, ಜಿಡ್ಡುಗಟ್ಟಿದ ಆಡಳಿತ ವ್ಯವಸ್ಥೆಗೆ ಚಾಟಿ ಏಟು ಕೊಟ್ಟಂತೆಯೂ ಆಗಿದೆ.

ಧಾರವಾಡ ತಾಲೂಕಿನ ಹೊಸಟ್ಟಿ ಗ್ರಾಮಸ್ಥರು, ಸರ್ಕಾರಿ ಹಿ.ಪ್ರಾ. ಶಾಲೆ ಮಕ್ಕಳು ಹೀಗೆ ತಮ್ಮ ಒಗ್ಗಟ್ಟು, ಸಾಧನೆ ಮೂಲಕ ಗಮನ ಸೆಳೆದಿದ್ದಾರೆ.

ಶಾಲೆಯಲ್ಲಿ 160 ಮಕ್ಕಳಿದ್ದಾರೆ. ವಾರದಿಂದ ಕುಡಿಯುವ ನೀರಿಗೆ ಸಮಸ್ಯೆಯಾಗಿತ್ತು. ಅಧಿಕಾರಿ ವರ್ಗಕ್ಕೆ ಹೇಳಿದರೂ ಸಮಸ್ಯೆ ನೀಗಿರಲಿಲ್ಲ. ಹೀಗಾಗಿ ವಿದ್ಯಾರ್ಥಿಗಳು ಮುಂದಾಗಿ ಕೊಳವೆಬಾವಿ ಕೊರೆಸಿದ್ದಾರೆ.

ಮಾದನಭಾವಿ ಗ್ರಾಪಂ ವ್ಯಾಪ್ತಿಯ ಹೊಸಟ್ಟಿಯಲ್ಲಿ 1,500 ಜನಸಂಖ್ಯೆ ಇದೆ. ಬೇಸಿಗೆ ಶುರುವಾದಾಗಿನಿಂದ ಕುಡಿಯುವ ನೀರಿಗೆ ತೊಂದರೆಯಾಗಿದೆ. ರೈತರ ಹೊಲಗಳಲ್ಲಿನ ಬೋರ್ ವೆಲ್‌ಗಳಿಂದ ಬಾಡಿಗೆ ಆಧಾರದಲ್ಲಿ ನೀರು ಪೂರೈಕೆ ಮಾಡಲಾಗುತ್ತಿದೆಯಾದರೂ ಸಮರ್ಪಕವಾಗಿ ಎಲ್ಲರಿಗೂ ಸಿಗುತ್ತಿಲ್ಲ. ಶಾಲಾ ಮಕ್ಕಳಿಗೂ ನೀರು ಸಿಗದಂತಾಗಿತ್ತು. ಈ ಸಮಸ್ಯೆಯನ್ನು ಗ್ರಾಪಂ ಅಧ್ಯಕ್ಷ, ಸದಸ್ಯರಿಗೆ ಹೇಳಬೇಕೆಂದರೆ ಅವರ ಅಧಿಕಾರಾವಧಿಯೂ ಮುಗಿದಿದೆ. ಇತ್ತ ಅಧಿಕಾರಿಗಳು ಸಮಸ್ಯೆಗೆ ಸರಿಯಾಗಿ ಸ್ಪಂದಿಸದಿದ್ದಾಗ

ವಿದ್ಯಾರ್ಥಿಗಳೇ ಪರಿಹಾರಕ್ಕೆ ಮುಂದಾದರು. ಎಸ್‌ಡಿಎಂಸಿಯವರು 18 ಸಾವಿರ ರೂ. ನೀಡಿದರು. ಮಾಜಿ ಸೈನಿಕರು 5 ಸಾವಿರ ರೂ. ನೀಡಿ ಪ್ರೋತ್ಸಾಹಿಸಿದರು. ಉಳಿದ ಹಣವನ್ನು ವಿದ್ಯಾರ್ಥಿಗಳೇ ಭರಿಸಿದ್ದು, 73 ಸಾವಿರ ರೂ. ವೆಚ್ಚದಲ್ಲಿ ಬುಧವಾರ ಬೋರ್‌ವೆಲ್‌ ಕೊರೆಸಲಾಗಿದ್ದು, 500 ಅಡಿ ಆಳದಲ್ಲಿ ಎರಡು ಇಂಚು ನೀರು ಸಿಕ್ಕಿದೆ. ಶಾಲೆಯ ಮಕ್ಕಳಿಗೆ ಈ ನೀರನ್ನು ಪೂರೈಕೆ ಮಾಡುವುದಕ್ಕೆ ಸಿದ್ಧತೆ ನಡೆದಿದೆ. ವಿದ್ಯಾರ್ಥಿಗಳ ಕಾರ್ಯಕ್ಕೆ ಊರಲ್ಲಿ ಮೆಚ್ಚುಗೆ ವ್ಯಕ್ತವಾಗಿದೆ.

ಹೊಸಟ್ಟಿಯಲ್ಲಿ 5 ಬೋರ್ ವೆಲ್‌ನಲ್ಲಿ ನೀರು ಬರುತ್ತಿಲ್ಲ. ಬಾಡಿಗೆ ಟ್ಯಾಂಕರ್‌ಗಳನ್ನು ಪಡೆದು ಪೂರೈಕೆ ಮಾಡುತ್ತಿದ್ದೇವೆ. ವಿದ್ಯಾರ್ಥಿಗಳು, ಎಸ್‌ಡಿಎಂಸಿಯವರು ಬೋರ್ ವೆಲ್ ಕೊರೆಸಿರುವುದು ಗೊತ್ತಾಗಿದೆ. ಬೋರ್‌ವೆಲ್‌ ವೆಚ್ಚವನ್ನು ಎಸ್‌ಡಿಎಂಸಿ ಯವರು ಭರಿಸಿದ್ದಾರೆ. ಇನ್ನು ಬೋರ್ ಆರಂಭಿಸುವುದಕ್ಕೆ ತಗಲುವ ಎಲ್ಲ ವೆಚ್ಚವನ್ನು ನಾವು ಭರಿಸುತ್ತೇವೆ ಎಂದು ಮಾದನಭಾವಿ ಗ್ರಾಪಂ

ಪಿಡಿಒ ಎಸ್.ಆರ್. ಬೆಟದೂರು ಪ್ರತಿಕ್ರಿಯಿಸಿದ್ದಾರೆ.

ಹೊಸಟ್ಟಿಯಲ್ಲಿ‌ ನೀರಿನ ಸಮಸ್ಯೆ ಇರುವುದರಿಂದ ಬಾಡಿಗೆ ಟ್ಯಾಂಕರ್ ಗಳಿಂದ ನೀರು ಪೂರೈಕೆ ಮಾಡಲಾಗುತ್ತಿದೆ.‌ ಗ್ರಾಮದ ನೀರಿನ‌ ಸಮಸ್ಯೆ ನೀಗಿಸುತ್ತೇವೆ ಎಂದು ಜಿಪಂ ಸಿಇಒ ಭುವನೇಶ ಪಾಟೀಲ ಪ್ರತಿಕ್ರಿಯಿಸಿದ್ದಾರೆ.