`ಶಿವಾನಂದ ಲಹರಿ' ದಿವ್ಯ ಕಾವ್ಯ

ಧಾರವಾಡ: ಆದಿಗುರು ಶಂಕರಾಚಾರ್ಯರು ಭಗವಾನ ಶಿವನ ಮಹಿಮೆ ಕೊಂಡಾಡಲು ರಚಿಸಿದ ಅತ್ಯಂತ ಪ್ರಸಿದ್ಧ ಸ್ತೋತ್ರವೇ `ಶಿವಾನಂದ ಲಹರಿ' ಕೃತಿ. ಶಿವನ ಆನಂದದ ಅಲೆಗಳು ನಿರಂತರವಾಗಿ ಅನುಭವಿಸುವಂತೆ ಮಾಡುವ ದಿವ್ಯ ಕಾವ್ಯವಾಗಿದೆ ಎಂದು ಕರ್ನಾಟಕ ಕಾಲೇಜಿನ ಅತಿಥಿ ಉಪನ್ಯಾಸಕ ಡಾ. ಚಿದಾನಂದ ಮಾಸನಕಟ್ಟಿ ಅಭಿಪ್ರಾಯಪಟ್ಟರು.

ಕರ್ನಾಟಕ ವಿದ್ಯಾವರ್ಧಕ ಸಂಘವು ದಿ. ವೀರಪ್ಪ ವೀರಭದ್ರಪ್ಪ ನಾಗಶೆಟ್ಟಿ ದತ್ತಿ ಅಂಗವಾಗಿ ಆಯೋಜಿಸಿದ್ದ ಉಪನ್ಯಾಸ ಹಾಗೂ ಸಾಧಕರಿಗೆ ಸನ್ಮಾನ ಕಾರ್ಯಕ್ರಮದಲ್ಲಿ `ಶಿವಾನಂದ ಲಹರಿ ಸಾಹಿತ್ಯದ ಕಂಪು' ವಿಷಯ ಉಪನ್ಯಾಸ ನೀಡಿದರು.

ಶಿವಾನಂದ ಲಹರಿಯು 100 ಸಂಸ್ಕೃತ ಶ್ಲೋಕಗಳನ್ನೊಳಗೊಂಡಿದೆ. ಇದನ್ನು 1956ರಲ್ಲಿ ವೀರಪ್ಪ ನಾಗಶೆಟ್ಟಿ ಓರ್ವ ಶಿಕ್ಷಕರಾಗಿ ಸಂಸ್ಕೃತದಲ್ಲಿದ್ದ ಸ್ತೋತ್ರ ಗಳನ್ನು ಹಳಗನ್ನಡಕ್ಕೆ ಅನುವಾದಿಸಿದರು. ಹಳಗನ್ನಡ ಇಂದಿನ ತಲೆಮಾರಿನವರಿಗೆ ಓದಲು, ಅರ್ಥ ಮಾಡಿಕೊಳ್ಳಲು ಅಷ್ಟು ಸರಳವಲ್ಲ. ಹೀಗಾಗಿ ಅದನ್ನು ಕನ್ನಡಕ್ಕೆ ಸರಳಾನುವಾದ ಮಾಡುವ ಕಾರ್ಯ ಮಾಡಲಾಗಿದೆ. ದಿ. ವೀರಪ್ಪ ನಾಗಶೆಟ್ಟಿ ಕನ್ನಡ, ಸಂಸ್ಕೃತ, ಹಳೆಗನ್ನಡದ ವಿದ್ವತ್‌ಪೂರ್ಣ ಪಂಡಿತರಾಗಿದ್ದರು. ಮೂರೂ ಭಾಷೆಗಳಲ್ಲಿ ಆಳವಾಗಿ ಅಧ್ಯಯನ ಮಾಡಿ ಅನೇಕ ಅಮೂಲ್ಯ ಕೃತಿ ರಚಿಸಿ ಸಾಹಿತ್ಯ ಲೋಕವನ್ನು ಶ್ರೀಮಂತಗೊಳಿಸಿದ್ದಾರೆ ಎಂದರು.

ದತ್ತಿದಾನಿಗಳ ಪರ ಸನ್ಮಾನ ಸ್ವೀಕರಿಸಿದ ಡೈಟ್‌ನ ವಿಶ್ರಾಂತ ಉಪನ್ಯಾಸಕ ಕೆ.ಜಿ. ದೇವರಮನಿ ಮಾತನಾಡಿದರು. ಸಂಘದ ಗೌರವ ಉಪಾಧ್ಯಕ್ಷ ಶ್ರೀನಿವಾಸ ವಾಡಪ್ಪಿ ಅಧ್ಯಕ್ಷತೆ ವಹಿಸಿದ್ದರು. ದತ್ತಿ ದಾನಿಗಳಾದ ಅಕ್ಕಮಹಾದೇವಿ ಸದಾನಂದ ನಾಗಶೆಟ್ಟಿ ವೇದಿಕೆಯಲ್ಲಿದ್ದರು. ಎಸ್.ಎಸ್. ನಾಗಶೆಟ್ಟಿ ದತ್ತಿದಾನಿಗಳ ಪರವಾಗಿ ಮಾತನಾಡಿದರು.

ಇದೇ ವೇಳೆ ಎಸ್.ಎಸ್.ಎಲ್.ಸಿ. ಪರೀಕ್ಷೆಯಲ್ಲಿ ಶಾಲೆಗೆ ಪ್ರಥಮ ಸ್ಥಾನ ಪಡೆದ ಚನ್ನಮ್ಮನ ಕಿತ್ತೂರಿನ ಎಸ್.ಜಿ. ಪ್ರೌಢಶಾಲೆಯ ವಿದ್ಯಾರ್ಥಿ ಮಂಜುನಾಥ ಪೂಜೇರಗೆ ಸನ್ಮಾನಿಸಿ, ಗೌರವಿಸಿದರು. ಶಂಕರ ಹಲಗತ್ತಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಡಾ. ಧನವಂತ ಹಾಜವಗೋಳ ಸ್ವಾಗತಿಸಿದರು. ವೀರಣ್ಣ ಒಡ್ಡೀನ ಪರಿಚಯಿಸಿದರು. ರಾಜಶೇಖರ ನಾಗಶೆಟ್ಟಿ ಸನ್ಮಾನಪತ್ರ ವಾಚಿಸಿದರು. ಶಿವಾನಂದ ಭಾವಿಕಟ್ಟಿ ನಿರೂಪಿಸಿದರು.