ತಹಸೀಲ್ದಾರ್​ ಸಚ್ಚಿದಾನಂದಗೆ ನ್ಯಾಯಾಂಗ ಬಂಧನ

ಬಾಗಲಕೋಟೆ ಜಿಲ್ಲೆ ಮೂಲದ ಮಂಜುನಾಥ ಅರಳಿಕಟ್ಟಿ ಎಂಬುವರು ಧಾರವಾಡದ ಯರಿಕೊಪ್ಪ ಬಳಿ ಜಮೀನು ಖರೀದಿಸಿದ್ದರು. ಜಮೀನಿನ "ಬ' ಖರಾಬು ಬದಲಾವಣೆ ಮಾಡಿಕೊಡಲು ತಹಶೀಲ್ದಾರ್​ ಸಚ್ಚಿದಾನಂದ 1 ಕೋಟಿ ರೂಪಾಯಿ ಹಾಗೂ 1 ಎಕರೆ ಜಮೀನು ಕೊಡುವಂತೆ ಮಾಲೀಕನಿಗೆ ಬೇಡಿಕೆ ಇಟ್ಟಿದ್ದರು. ಈ ಸಂಬಂಧ ಜಮೀನು ಮಾಲೀಕ ಲೋಕಾಯುಕ್ತರಿಗೆ ದೂರು ನೀಡಿದ್ದರು.

ಬುಧವಾರ ರಾತ್ರಿ 8 ಗಂಟೆ ಸುಮಾರಿಗೆ ಜಮೀನು ಮಾಲೀಕ ಮಂಜುನಾಥ ತಹಸೀಲ್ದಾರ್​ ಸಚ್ಚಿದಾನಂದ ಅವರನ್ನು ನಗರದ ಕೆಸಿಡಿ ಮೈದಾನಕ್ಕೆ ಕರೆಸಿದ್ದರು. ಮುಂಗಡವಾಗಿ 50 ಲಕ್ಷ ರೂ. ಹಣ ಪಡೆದ ತಹಸೀಲ್ದಾರ್​ ತಮ್ಮ ಕಾರ್​ನಲ್ಲಿ ಇಡುತ್ತಿದ್ದ ವೇಳೆ ಲೋಕಾಯುಕ್ತ ಅಧಿಕಾರಿಗಳು ಕಾರ್ಯಾಚರಣೆ ನಡೆಸಿ ಹಣ ಸಮೇತ ಸಚ್ಚಿದಾನಂದ ಅವರನ್ನು ವಶಕ್ಕೆ ಪಡೆದಿದ್ದರು. ಲೋಕಾಯುಕ್ತ ಎಸ್​ಪಿ ಸಿದ್ದಲಿಂಗಪ್ಪ ನೇತೃತ್ವದಲ್ಲಿ ಈ ದಾಳಿ ನಡೆದಿತ್ತು.

ತಹಸೀಲ್ದಾರ್​ ಸಚ್ಚಿದಾನಂದ ಅವರನ್ನು ಗುರುವಾರ ಲೋಕಾಯುಕ್ತ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಯಿತು. ನ್ಯಾಯಾಲಯವು ಅವರಿಗೆ 14 ದಿನಗಳ ನ್ಯಾಯಾಂಗ ಬಂಧನ ವಿಧಿಸಿದೆ ಎಂದು ಲೋಕಾಯುಕ್ತ ಎಸ್​ಪಿ ಸಿದ್ದಲಿಂಗಪ್ಪ ಪ್ರತಿಕ್ರಿಯಿಸಿದ್ದಾರೆ.