ಮಳೆಗಾಲಕ್ಕೆ ನೈಋತ್ಯ ರೈಲ್ವೆ ಸಿದ್ಧತೆ rainy

ಹಿಂದಿನ ಪ್ರವಾಹದ ಇತಿಹಾಸವನ್ನು ಆಧರಿಸಿ ಗುರುತಿಸಲಾದ 15 ಪ್ರಮುಖ ಸೇತುವೆಗಳಲ್ಲಿ ನೀರಿನ ಮಟ್ಟ ನಿರ್ವಹಣಾ ಉಪಕರಣಗಳನ್ನು ಅಳವಡಿಸಲಾಗಿದೆ.

ಈ ಸಾಧನಗಳು ನೈಜ ಸಮಯದಲ್ಲಿ ನೀರಿನ ಮಟ್ಟದ ಮಾಹಿತಿ ಒದಗಿಸುವುದರೊಂದಿಗೆ, ಅಧಿಕಾರಿಗಳಿಗೆ ದೈನಂದಿನ ಸ್ವಯಂಚಾಲಿತ ಎಸ್​ಎಂಎಸ್ ಎಚ್ಚರಿಕೆಗಳನ್ನು ಕಳುಹಿಸಿ, ಸಕಾಲಿಕ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳಲು ಸಹಕಾರಿಯಾಗಿವೆ.

ನೀರು ನಿಲುಗಡೆಯ ಅಪಾಯವಿರುವ 48 ರಸ್ತೆ ಕೆಳ ಸೇತುವೆಗಳು ಗುರುತಿಸಲ್ಪಟ್ಟಿದ್ದು, ಅವುಗಳಲ್ಲಿ ಹೂಳು ತೆಗೆಯುವುದು, ಪ್ರವಾಹ ಮಟ್ಟ ಸೂಚಕಗಳನ್ನು ಅಳವಡಿಸುವುದು, ಎಚ್ಚರಿಕೆ ಫಲಕಗಳನ್ನು ಸ್ಥಾಪಿಸುವುದು ಹಾಗೂ ನಿರಂತರ ಮೇಲ್ವಿಚಾರಣೆ ಜಾರಿಗೊಳಿಸಲಾಗಿದೆ.

ಆಯ್ದ ಆರ್​ಯುುಬಿಗಳಲ್ಲಿ ಪ್ರಾಯೋಗಿಕವಾಗಿ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿದ್ದು, ಬ್ರಿಡ್ಜ್ ಮ್ಯಾನೇಜ್ಮೆಂಟ್ ಸಿಸ್ಟೆಮ್ ಮೂಲಕ ನೈಜ ಸಮಯದ ಮೇಲ್ವಿಚಾರಣೆ ನಡೆಯುತ್ತಿದೆ.

ಹೆಚ್ಚಿನ ಗಾಳಿಯ ಪರಿಸ್ಥಿತಿಗಳನ್ನು ಗಮನಿಸಲು ಮೈಸೂರು-ಅರಸೀಕೆರೆ ಮಾರ್ಗದ ಸಾಗರಕಟ್ಟೆ ಸಮೀಪ ಅನಿಮೋಮೀಟರ್ ಅನ್ನು ಸ್ಥಾಪಿಸಲಾಗಿದೆ.

ಹವಾಮಾನ ಸಂಬಂಧಿತ ತುರ್ತು ಪರಿಸ್ಥಿತಿಗಳಿಗೆ ತಕ್ಷಣ ಪ್ರತಿಕ್ರಿಯಿಸಲು ಹುಬ್ಬಳ್ಳಿಯಲ್ಲಿರುವ ಕೇಂದ್ರ ನಿಯಂತ್ರಣ ಕಚೇರಿ ಭಾರತ ಹವಾಮಾನ ಇಲಾಖೆಯಿಂದ ಎಚ್ಚರಿಕೆಗಳನ್ನು ಸ್ವೀಕರಿಸಿ, ಅವುಗಳನ್ನು ತಕ್ಷಣವೇ ಸಂಬಂಧಿತ ಕ್ಷೇತ್ರಾಧಿಕಾರಿಗಳಿಗೆ ರವಾನಿಸುತ್ತದೆ.

ಜತೆಗೆ, 52 ಮಳೆ ಮಾಪನ ಕೇಂದ್ರಗಳಿಂದ ಸಂಗ್ರಹಿಸಲಾದ ದೈನಂದಿನ ಮಳೆಯ ಮಾಹಿತಿಯನ್ನು ನಿರಂತರವಾಗಿ ಮೇಲ್ವಿಚಾರಣೆ ಮಾಡಲಾಗುತ್ತಿದೆ.

ತುರ್ತು ಪರಿಸ್ಥಿತಿಗಳಲ್ಲಿ ತ್ವರಿತ ಪುನಃಸ್ಥಾಪನೆ ಕಾರ್ಯಗಳನ್ನು ಕೈಗೊಳ್ಳಲು ಬಂಡೆಗಳು ಮತ್ತು ಮರಳು ಚೀಲಗಳಂತಹ ಮಾನ್ಸೂನ್ ಮೀಸಲು ಸಾಮಗ್ರಿಗಳನ್ನು ಹುಬ್ಬಳ್ಳಿ ಮತ್ತು ಮೈಸೂರು ವಿಭಾಗಗಳ 7 ಪ್ರಮುಖ ಸ್ಥಳಗಳಲ್ಲಿ ಪೂರ್ವಭಾವಿಯಾಗಿ ಸಂಗ್ರಹಿಸಲಾಗಿದೆ.

ಅಗತ್ಯವಿದ್ದಲ್ಲಿ ತಕ್ಷಣ ಬಳಸಲು ಅಗೆಯುವ ಯಂತ್ರಗಳು, ಕಂಪ್ರೆಸರ್​ಗಳು ಸೇರಿದಂತೆ ವಿವಿಧ ಉಪಕರಣಗಳನ್ನೂ ಸಿದ್ಧವಾಗಿರಿಸಲಾಗಿದೆ.

ಇಳಿಜಾರು ಪ್ರದೇಶಗಳ ಸ್ಥಿರತೆ ಹೆಚ್ಚಿಸಲು ಮಣ್ಣಿನ ನೈಲಿಂಗ್, ಬಂಡೆಗಳ ಅಳವಡಿಕೆ, ಮರದ ಕೊಂಬೆಗಳ ಕತ್ತರಿಸುವುದು, ಹುಲ್ಲಿನ ಬಲವರ್ಧನೆ ಹಾಗೂ ಗೇಬಿಯನ್ ಮತ್ತು ರಿಟೈನಿಂಗ್ ಗೋಡೆಗಳಂತಹ ರಕ್ಷಣಾತ್ಮಕ ಕಾಮಗಾರಿ ಕೈಗೊಳ್ಳಲಾಗಿದೆ.

ದುರ್ಬಲ ಘಾಟ್ ವಿಭಾಗಗಳಲ್ಲಿ ಸುರಂಗ ಪ್ರವೇಶ ಭಾಗಗಳನ್ನು ವಿಸ್ತರಿಸುವ ಮೂಲಕ ಬಂಡೆಗಳು ಹಳಿಗೆ ಬೀಳುವುದನ್ನು ತಡೆಯಲಾಗಿದೆ.

ಪಕ್ಕದ ಚರಂಡಿಗಳು ಮತ್ತು ಕ್ಯಾಚ್​ವಾಟರ್ ಡ್ರೖೆನ್​ಗಳನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಲಾಗಿದೆ.

ಮಳೆಗಾಲದಲ್ಲಿ ಪೆಟ್ರೋಲಿಂಗ್ ವ್ಯವಸ್ಥೆ ತೀವ್ರಗೊಳಿಸಲಾಗಿದ್ದು, ಅಪಾಯದ ಪ್ರದೇಶಗಳಲ್ಲಿ ಕಾವಲುಗಾರರನ್ನು ನಿಯೋಜಿಸಲಾಗಿದೆ.

ನೀರಿನ ಮೂಲಗಳ ಅಚಾನಕ್ ಒಡೆತ ಅಥವಾ ಹೆಚ್ಚುವರಿ ನೀರಿನ ಬಿಡುಗಡೆಗಳಿಂದ ಉಂಟಾಗಬಹುದಾದ ಅಪಾಯಗಳನ್ನು ತಗ್ಗಿಸಲು ಸ್ಥಳೀಯ ಆಡಳಿತದೊಂದಿಗೆ ಜಂಟಿ ಪರಿಶೀಲನೆಗಳನ್ನು ನಡೆಸಲಾಗಿದೆ.

ತುರ್ತು ಸಂದರ್ಭಗಳಲ್ಲಿ ತಕ್ಷಣ ವೈದ್ಯಕೀಯ ನೆರವು ಒದಗಿಸಲು ಎಲ್ಲ ವಿಭಾಗಗಳಲ್ಲಿ ಸಂಪೂರ್ಣ ಸಜ್ಜಿತ ಸಹಾಯಕ ವೈದ್ಯಕೀಯ ಪರಿಹಾರ ರೈಲುಗಳು ಮತ್ತು ಸ್ವಯಂ ಚಾಲಿತ ಅಪಘಾತ ಪರಿಹಾರ ರೈಲುಗಳನ್ನು ಕಾರ್ಯತಂತ್ರದ ರೀತಿಯಲ್ಲಿ ನಿಯೋಜಿಸಲಾಗಿದೆ.