Dharmasabhe ಹುಬ್ಬಳ್ಳಿಯಲ್ಲಿ ಶ್ರೀಶೈಲ ಜಗದ್ಗುರುಗಳ ಧರ್ಮಸಭೆ

ಹುಬ್ಬಳ್ಳಿ: Dharmasabhe ಬೆಳಗಾವಿ ಜಿಲ್ಲೆಯ ಚಿಕ್ಕೋಡಿ ತಾಲೂಕಿನ ಶ್ರೀಕ್ಷೇತ್ರ ಯಡೂರು ಶ್ರೀ ವೀರಭದ್ರೇಶ್ವರ ದೇವಸ್ಥಾನ ಪೌರಾಣಿಕವಾಗಿ ಅತ್ಯಂತ ಪ್ರಸಿದ್ಧಿ ಪಡೆದ ಪವಿತ್ರ ಕ್ಷೇತ್ರವಾಗಿದೆ. ಕ್ಷೇತ್ರಪಾಲಕ ಶ್ರೀ ವೀರಭದ್ರ ಸ್ವಾಮಿಯು ದುಷ್ಟ ಶಿಕ್ಷೆ ಶಿಷ್ಠ ರಕ್ಷೆಗಾಗಿ ಶಿವನ ಅವತಾರ ಹೊತ್ತು ಉದಿಸಿದ ಮಹಾಶಕ್ತಿ ಪುರುಷ. ಶ್ರೀ ವೀರಭದ್ರನು ಶಿವನ ಆಣತಿಯಂತೆ ದಕ್ಷನ ಯಜ್ಞವನ್ನು ನಾಶಗೊಳಿಸಿ ಆತನನ್ನು ಸಂಹರಿಸಿ ಆ ಯಜ್ಞ ಕುಂಡದಲ್ಲಿಯೇ ವಾಸವಾಗಿದ್ದಾನೆ ಎಂಬುದು ಪೌರಾಣಿಕ ಪ್ರತೀತಿ.

ಕಾಡಸಿದ್ದೇಶ್ವರ ಎಂಬ ಯತಿಗಳ ಪರಿಶ್ರಮದಿಂದ ಈ ಸ್ಥಳ ಇನ್ನೂ ಹೆಚ್ಚಿನ ಮಹತ್ವವನ್ನು ಪಡೆದು ಈ ಮಠದ ಧರ್ಮಾಧಿಕಾರಿಗಳೇ ಈ ದೇವಸ್ಥಾನದ ಅಧಿಕಾರ ವಹಿಸಿಕೊಂಡು ಬಂದಿರುವದು ಇತಿಹಾಸ. ಇದೀಗ ಮಠದ ಧರ್ಮಾಧಿಕಾರಿಗಳು, ಪ್ರಸ್ತುತ ಶ್ರೀಶೈಲ ಸೂರ್ಯಸಿಂಹಾಸನ ಪೀಠದ ಜಗದ್ಗುರು ಶ್ರೀ ಡಾ. ಚನ್ನಸಿದ್ಧರಾಮ ಪಂಡಿತಾರಾಧ್ಯ ಶಿವಾಚಾರ್ಯ ಭಗವತ್ಪಾದರು ಈ ಕ್ಷೇತ್ರದ ಸರ್ವಾಂಗೀಣ ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಂಡಿದ್ದಾರೆ.

ಭಕ್ತ ಸಮೂಹಕ್ಕೆ ಈ ಎಲ್ಲ ಸೇವಾ ಕಾರ್ಯಗಳ ಬಗ್ಗೆ ತಿಳಿಸುವದರ ಜೊತೆಗೆ ಮಾರ್ಚ್​ನಲ್ಲಿ ನಡೆಯುವ ಧರ್ಮಯಜ್ಞ, ರಾಜಗೋಪುರಗಳ ಲೋಕಾರ್ಪಣೆ ಸಮಾರಂಭಕ್ಕೆ ಆಮಂತ್ರಿಸುವುದಕ್ಕಾಗಿ ಸ್ವತಃ ಶ್ರೀಶೈಲ ಜಗದ್ಗುರುಗಳು ನಗರಕ್ಕೆ ಆಗಮಿಸುತ್ತಿದ್ದಾರೆ.

ಹುಬ್ಬಳ್ಳಿಯ ಲಿಂಗರಾಜ ನಗರದ ಸಾಂಸ್ಕೃತಿಕ ಸಮುದಾಯ ಭವನದಲ್ಲಿ ಜ. 4 ರಂದು ಸಂಜೆ 4.30ಕ್ಕೆ ಧರ್ಮಸಭೆ ನಡೆಸಿ ಸಂಪೂರ್ಣ ಕಾರ್ಯಕ್ರಮಗಳ ಚಿತ್ರಣ ತಿಳಿಸಿ ಆಶೀರ್ವಚನ ನೀಡಲಿದ್ದಾರೆ.

ಶ್ರೀಕ್ಷೇತ್ರ ಯಡೂರು ಶ್ರೀ ವೀರಭದ್ರೇಶ್ವರ ಭಕ್ತ ಬಳಗ, ಧರ್ಮಾಭಿಮಾನಿಗಳು, ಧರ್ಮಸಭೆಯಲ್ಲಿ ಭಾಗವಹಿಸಬೇಕೆಂದು ಸಂಘಟನೆಯ ಸಂಚಾಲಕ ಸದಾನಂದ ಡಂಗನವರ ಕೋರಿದ್ದಾರೆ.