ಕಲಾ ವಿಭಾಗದಲ್ಲಿ ಶ್ರಾವಣಿ ರಾಜ್ಯಕ್ಕೆ ದ್ವಿತೀಯ ರ‍್ಯಾಂಕ್

ಕಲಬುರಗಿಯ ಶ್ರಾವಣಿ ಪಾಟೀಲ ತಂದೆ ವಿಜಯರೆಡ್ಡಿ ಪಾಟೀಲ, ತಾಯಿ ಡಾ. ಶ್ಯಾಮಲಾ. ತಂದೆ ಕಲಬುರಗಿಯಲ್ಲಿ ಉದ್ಯಮಿಯಾಗಿದ್ದು, ತಾಯಿ ವೈದ್ಯೆಯಾಗಿ ಹಾವೇರಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. ತಂದೆ- ತಾಯಿಯ ಪ್ರೋತ್ಸಾಹದಿಂದ ಈ ಸಾಧನೆ ಸಾಧ್ಯವಾಗಿದೆ ಎನ್ನುತ್ತಾಳೆ ಶ್ರಾವಣಿ.

ಶ್ರಾವಣಿ ಎಸ್​ಎಸ್​ಎಲ್​ಸಿಯಲ್ಲಿ ಕಲಬುರಗಿ ಜಿಲ್ಲೆಗೆ ಪ್ರಥಮ ರ‍್ಯಾಂಕ್ ಪಡೆದಿದ್ದಳು. ಯುಪಿಎಸ್​ಸಿ ಗುರಿ ಇಟ್ಟುಕೊಂಡು ಕಲಾ ವಿಭಾಗ ಆಯ್ಕೆ ಮಾಡಿಕೊಂಡಿದ್ದಳು. ಧಾರವಾಡದ ಕಾಲೇಜುಗಳ ಬಗ್ಗೆ ವಿಚಾರಿಸಿದ್ದ ಪಾಲಕರು, ಜೆಎಸ್​ಎಸ್​ ಶ್ರೀ ಮಂಜುನಾಥೇಶ್ವರ ಪಿಯು ಕಾಲೇಜನ್ನು ಆಯ್ಕೆ ಮಾಡಿದ್ದರು.

ತನ್ನ ಸಾಧನೆಯ ಬಗ್ಗೆ "ವಿಜಯವಾಣಿ'ಯೊಂದಿಗೆ ಮಾತನಾಡಿದ ಶ್ರಾವಣಿ, "ರಾಜ್ಯಕ್ಕೆ ದ್ವಿತೀಯ ರ‍್ಯಾಂಕ್​ ಬರುತ್ತೇನೆ ಎಂದು ನಿರೀಸಿರಲಿಲ್ಲ. ನನ್ನ ಓದಿಗೆ ಧಾರವಾಡದ ವಾತಾವರಣ, ಕಾಲೇಜು ಕ್ಯಾಂಪಸ್​, ಇಲ್ಲಿನ ಊಟ ನೆರವಾಯಿತು. ಹಾಸ್ಟೆಲ್​ನಲ್ಲಿದ್ದರೂ ತಂದೆ- ತಾಯಿ ದೂರವಾಣಿಯಲ್ಲೇ ನಿತ್ಯ ನನ್ನ ಅಭ್ಯಾಸಕ್ಕೆ ನೆರವಾಗುತ್ತಿದ್ದರು. ಜತೆಗೆ ಕಾಲೇಜಿನ ಶಿಕ್ಷಕರು ತುಂಬ ಪ್ರೋತ್ಸಾಹ ನೀಡಿದರು' ಎಂದರು.