"ರೋಟರಿ ಪಿಂಕ್​ ಆಟೋ'ಗೆ ಜಿಲ್ಲಾಧಿಕಾರಿಯಿಂದ ಚಾಲನೆ

ಧಾರವಾಡ: ರೋಟರಿ ಕ್ಲಬ್​ ಆಫ್​ ಸೆವನ್​ ಹಿಲ್ಸ್​ ಧಾರವಾಡ ಹಾಗೂ ಧಾರವಾಡ ಗುಜ್ಜಾಡಿ ಸ್ವರ್ಣ ಜುವೆಲ್ಲರ್ಸ್​ ಸಹಯೋಗದಲ್ಲಿ ಹುಬ್ಬಳ್ಳಿ& ಧಾರವಾಡದ ಮೊದಲ ರೋಟರಿ ಪಿಂಕ್​ ಆಟೋವನ್ನು ಮಹಿಳೆಯರು ಮತ್ತು ವಿದ್ಯಾಥಿರ್ನಿಯರ ಸೇವೆಗೆ ಬಿಡುಗಡೆ ಮಾಡಲಾಯಿತು.

ಕಾರ್ಯಕ್ರಮ ಉದ್ಘಾಟಿಸಿದ ಜಿಲ್ಲಾಧಿಕಾರಿ ಡಾ. ಸ್ನೇಹಲ್​ ಆರ್​. ಮಾತನಾಡಿ, ಮಹಿಳಾ ಸುರಕ್ಷತೆ ಹಾಗೂ ಸಬಲೀಕರಣಕ್ಕಾಗಿ ರೋಟರಿ ಕ್ಲಬ್​ ಕೈಗೊಂಡಿರುವ ಈ ವಿಶಿಷ್ಟ ಯೋಜನೆ ಶ್ಲಾನೀಯ. ಸಮಾಜಮುಖಿ ಸಂಸ್ಥೆಗಳು ಒಂದೇ ಉದ್ದೇಶದೊಂದಿಗೆ ಕೈ ಜೋಡಿಸಿದಾಗ ಸಮಾಜದಲ್ಲಿ ಅರ್ಥಪೂರ್ಣ ಹಾಗೂ ಶಾಶ್ವತ ಬದಲಾವಣೆ ಸಾಧ್ಯ ಎಂದು ಅಭಿಪ್ರಾಯಪಟ್ಟರು.

ಯೋಜನೆ ಅಧ್ಯೆ ರೋಟೇರಿಯನ್​ ಡಾ. ಪಲ್ಲವಿ ದೇಶಪಾಂಡೆ ಮಾತನಾಡಿ, ಎರಡು ವರ್ಷಗಳಿಂದ ಕಂಡಿದ್ದ ಈ ಕನಸಿನ ಯೋಜನೆ ನನಸಾಗಿದೆ. ಗುಜ್ಜಾಡಿ ಸ್ವರ್ಣ ಜುವೆಲ್ಲರ್ಸ್​ ಅವರ ಉದಾರ ಸಹಕಾರದಿಂದ ಈ ಯೋಜನೆ ಯಶಸ್ವಿಯಾಗಿದೆ ಎಂದರು. ಮುಂದಿನ ದಿನಗಳಲ್ಲಿ ಇನ್ನಷ್ಟು ಮಹಿಳೆಯರಿಗೆ ಆಟೋ ಚಾಲನಾ ತರಬೇತಿ ನೀಡಿ, ಹೆಚ್ಚಿನ ರೋಟರಿ ಪಿಂಕ್​ ಆಟೋಗಳನ್ನು ಪರಿಚಯಿಸುವ ಮೂಲಕ ಈ ಯೋಜನೆ ವಿಸ್ತರಿಸುವ ಗುರಿ ಹೊಂದಿದ್ದೇವೆ ಎಂದು ತಿಳಿಸಿದರು.

ಗುಜ್ಜಾಡಿ ಸ್ವರ್ಣ ಜುವೆಲ್ಲರ್ಸ್​ನ ಅಸೋಸಿಯೇಟ್​ ಡೈರೆಕ್ಟರ್​ ಗುರುದತ್ತ ನಾಯಕ ಮಾತನಾಡಿ, ಸಮಾಜಮುಖಿ ಯೋಜನೆಗಳಲ್ಲಿ ರೋಟರಿ ಕ್ಲಬ್​ನೊಂದಿಗೆ ಕೈ ಜೋಡಿಸಿರುವುದು ಸಂತಸ ತಂದಿದೆ. ಇಂತಹ ಜನಪರ ಕಾರ್ಯಗಳಿಗೆ ಮುಂದೆಯೂ ತಮ್ಮ ಸಂಸ್ಥೆಯ ಸಂಪೂರ್ಣ ಸಹಕಾರ ಮುಂದುವರಿಯಲಿದೆ ಎಂದು ಹೇಳಿದರು.

ರೋಟೇರಿಯನ್​ ಡಾ. ದೃಷ್ಟಿ ದೇಶಪಾಂಡೆ, ಮಾಜಿ ಜಿಲ್ಲಾ ಗವರ್ನರ್​ ಡಾ. ರಾಜನ್​ ದೇಶಪಾಂಡೆ, ರೋಟೇರಿಯನ್​ ರವಿ ದೇಶಪಾಂಡೆ ಹಾಗೂ ರೋಟೇರಿಯನ್​ ಗಣೇಶ್​ ಭಟ್​, ಫಲಾನುಭವಿ ಮಂಜುಳಾ, ಹಿರಿಯ ರೋಟೇರಿಯನ್​ಗಳು, ರೋಟರಿ ಕ್ಲಬ್​ ಆಫ್​ ಸೆವನ್​ ಹಿಲ್ಸ್​ ಸದಸ್ಯರು ಹಾಗೂ ಉತ್ತರ ಕರ್ನಾಟಕ ಆಟೋ ಅಸೋಸಿಯೇಷನ್​ನ ಪ್ರತಿನಿಧಿಗಳು ಇದ್ದರು.