ವಿಶ್ವೇಶ್ವರಿ ಹಿರೇಮಠಗೆ ನಾಟಕ ಅಕಾಡೆಮಿ ಪ್ರಶಸ್ತಿ

ಬೆಳಗಾವಿ ಜಿಲ್ಲೆ ಚನ್ನಮ್ಮನ ಕಿತ್ತೂರು ಮೂಲದ ವಿಶ್ವೇಶ್ವರಿ, ಬಾಲ್ಯದಲ್ಲೇ ಸಂಗೀತ, ಸಾಹಿತ್ಯ, ನೃತ್ಯ, ನಾಟಕ ಕಲೆಗಳಲ್ಲಿ ತೊಡಗಿಸಿಕೊಂಡವರು. 1984ರಿಂದ ಹವ್ಯಾಸಿ ರಂಗಭೂಮಿಗೆ ಪದಾರ್ಪಣೆ, ಕೆ.ವಿ. ಸುಬ್ಬಣ್ಣ ಮಾರ್ಗದರ್ಶನದಲ್ಲಿ ನಿನಾಸಂ ಸೇರ್ಪಡೆಯಾದರು. ರಾಜ್ಯಾದ್ಯಂತ ಮಕ್ಕಳ ಹಾಗೂ ಹಿರಿಯರ ನಾಟಕಗಳ ನಿರ್ದೇಶನ, ರಂಗ ತರಬೇತಿ ಶಿಬಿರಗಳನ್ನು ಆಯೋಜಿಸಿದ್ದಾರೆ. 1995ರಲ್ಲಿ ಪತಿ, ಜಾನಪದ ಕಲಾವಿದ ದಿ. ಬಸವಲಿಂಗಯ್ಯ ಹಿರೇಮಠ ಅವರೊಂದಿಗೆ ಜಾನಪದ ಸಂಶೋಧನ ಕೇಂದ್ರ ಹುಟ್ಟು ಹಾಕಿ ಜಾನಪದ ಕಲಾವಿದರ ಮತ್ತು ಕಲೆಗಳ ಪೋಷಣೆ ಕಾರ್ಯ ಮಾಡುತ್ತಿದ್ದಾರೆ.