ಗಣಿತ ನಿತ್ಯ ಜೀವನದಲ್ಲೇ ಹಾಸು ಹೊಕ್ಕಾಗಿದೆ

ಧಾರವಾಡ: ಗಣಿತ ನಮ್ಮ ಬೌದ್ಧಿಕ ಸಾಮರ್ಥ್ಯ ಹೆಚ್ಚಿಸಿ ತಾರ್ಕಿಕ ನಿರ್ಧಾರ ತೆಗೆದುಕೊಳ್ಳಲು ಸಹಕಾರಿಯಾಗುತ್ತದೆ. ನಿತ್ಯ ಜೀವನದಲ್ಲೂ ಹಾಸು ಹೊಕ್ಕಾಗಿದೆ ಎಂದು ಧಾರವಾಡ ಶಾಲಾ ಶಿಕ್ಷಣ ಇಲಾಖೆಯ ಅಪರ ಆಯುಕ್ತರ ಕಚೇರಿಯ ಸಹ ನಿರ್ದೇಶಕಿ ಜಯಶ್ರೀ ಕಾರೇಕರ ಹೇಳಿದರು.

ಕವಿವ ಸಂಘವು ಏರ್ಪಡಿಸಿದ್ದ ಶ್ರೇಷ್ಠ ಗಣಿತ ತಜ್ಞ ಎಂ.ಎ. ಭಾವಿಕಟ್ಟಿ ಅವರು ರಚಿಸಿದ `೭೮೬' ರ ಗಣಿತ ಪರಿಕಲ್ಪನೆಗಳು ಪುಸ್ತಕ ಬಿಡುಗಡೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಬಾವಿಕಟ್ಟಿಯವರ ಈ ಕೃತಿ ೪ನೇದ್ದಾಗಿದ್ದು, ಗಣಿತ ಅಧ್ಯಯನಕಾರರಿಗೊಂದು ಪೂರಕ ಸಾಹಿತ್ಯವಾಗಿದೆ ಎಂದು ಹೇಳಿದರು.

ಡಿಡಿಪಿಐ ಉಮೇಶ ಬೊಮ್ಮಕ್ಕನವರ ಮಾತನಾಡಿ, ಎಂ.ಎ. ಭಾವಿಕಟ್ಟಿ ಅನೇಕ ವರ್ಷಗಳಿಂದ ಡೈಟ್‌ನಲ್ಲಿ ಗಣಿತ ವಿಷಯದ ಸಂಪನ್ಮೂಲ ವ್ಯಕ್ತಿಯಾಗಿ ಶಿಕ್ಷಕರಿಗೆ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ಮಾಡಿದ್ದಾರೆ. ಅವರು ರಚಿಸಿದ `೭೮೬' ಗಣಿತ ಪರಿಕಲ್ಪನೆಗಳು ಕೃತಿ ಓದುಗರಲ್ಲಿ ಖಂಡಿತಾ ಆಸಕ್ತಿ ಮೂಡಿಸುತ್ತದೆ ಎಂದು ಹೇಳಿದರು.

ಮಕ್ಕಳ ಸಾಹಿತಿ ಕೆ.ಎಚ್. ನಾಯಕ ಮಾತನಾಡಿ, ಗಣಿತ ಕಬ್ಬಿಣದ ಕಡಲೆಯಲ್ಲ. ಆಸಕ್ತಿಯಿಂದ ಅಧ್ಯಯನ ಮಾಡಿದರೆ ಅದು ಅತ್ಯಂತ ಸುಲಭ. ಗಣಿತ ನಮ್ಮ ಜೀವನದ ಅವಿಭಾಜ್ಯ ಅಂಗವಾಗಿದೆ. ಗಣಿತವಿಲ್ಲದ ಜೀವನ ಉಹಿಸಿಕೊಳ್ಳುವುದೇ ಕಷ್ಟ. ಸ್ನೇಹಜೀವಿ, ಸದಾ ಹಸನ್ಮುಖಿಯಾದ ಭಾವಿಕಟ್ಟಿ ನಿವೃತ್ತಿ ನಂತರವೂ ಕ್ರಿಯಾಶೀಲರಾಗಿರುವುದು ಅಭಿನಂದನೀಯ ಎಂದರು.

ವಿಶ್ರಾಂತ ಉಪನ್ಯಾಸಕ ಕೆ.ಜಿ. ದೇವರಮನಿ ಪುಸ್ತಕ ಪರಿಚಯಿಸಿ ಮಾತನಾಡಿದರು. ಕೃತಿಕಾರ ಎಂ.ಎ. ಭಾವಿಕಟ್ಟಿ ಮಾತನಾಡಿದರು. ರೋಹಿಣಿ ದಾನಿ ಸ್ವಾಗತಿಸಿದರು. ಶಿವಾನಂದ ಭಾವಿಕಟ್ಟಿ ಪ್ರಾಸ್ತಾವಿಸಿದರು. ವೀರಣ್ಣ ಜಕ್ಕಣ್ಣವರ ಪ್ರಾರ್ಥಿಸಿದರು.