ಅಣಬೆ ಬೇಸಾಯ ಅಪಾರ ಆದಾಯ

ಇಂಜಿನಿಯರಿಂಗ್ ಮತ್ತು ಸೂಕ್ಷ್ಮ ಜೀವಾಣುಶಾಸ್ತ್ರ ಓದಿರುವ ನಾಲ್ವರು ಪದವೀಧರರು ಧಾರವಾಡ ತಾಲೂಕಿನ ಕ್ಯಾರಕೊಪ್ಪ ರಸ್ತೆ ಯ ಕೆಲಗೇರಿ ಗ್ರಾಮದಲ್ಲಿ ಚಿಪ್ಪು ಅಣಬೆ (ಪ್ಲುರೋಟಸ್ ಸಾಜೋರಕಾಜು) ಕೃಷಿ ಮಾಡಿ ಯಶಸ್ವಿಯಾಗಿದ್ದಾರೆ.
ಧಾರವಾಡದ ನರಸನಗೌಡ ವೀರಾಪುರ, ಪ್ರಕಾಶ ವೀರಾಪುರ, ವರುಣ ವಿಶ್ವನಾಥ ಮತ್ತು ಹುಬ್ಬಳ್ಳಿಯ ವಿಶಾಲ ಮಠ ಎಂಬುವವರು ಚಿಪ್ಪು ಅಣಬೆ (ಆಯಸ್ಟರ್ ಮಶ್ರೂಂ) ಬೆಳೆದವರು. ಉತ್ತರ ಭಾರತದಲ್ಲಿ ಇದಕ್ಕೆ ಡಿಂಗ್ರಿ ಮಶ್ರೂಂ ಎನ್ನುತ್ತಾರೆ. ಚಿಪ್ಪು ಅಣಬೆ ಕೃಷಿ ಅತಿ ಸರಳ. ಕಡಿಮೆ ವೆಚ್ಚ ಮತ್ತು ಕಡಿಮೆ ಅವಧಿಯಲ್ಲಿ ಕೃಷಿ ತ್ಯಾಜ್ಯಗಳಾದ ಭತ್ತ ಅಥವಾ ಗೋಧಿ ಹುಲ್ಲು ಬಳಸಿ ಇದನ್ನು ಬೆಳೆಯಬಹುದು.
ಸದ್ಯ ನಿತ್ಯ 20 ಕೆಜಿಯಂತೆ ತಿಂಗಳಿಗೆ 600 ಕೆಜಿ ಅಣಬೆ ಇಳುವರಿ ಬರುತ್ತಿದೆ. 240 ರೂ.ಗೆ ಒಂದು ಕೆಜಿಯಂತೆ ಮಾರಾಟ ಮಾಡಿದರೆ 1.44 ಲಕ್ಷ ರೂ. ಸಿಗುತ್ತದೆ. ಅದರಲ್ಲಿ ಖರ್ಚು 40 ಸಾವಿರ ರೂ. ಖರ್ಚು ಕಳೆದು ಪ್ರತಿ ತಿಂಗಳು 1 ಲಕ್ಷ ರೂ. ಲಾಭ ಸಿಗುತ್ತದೆ.
ಬೀಜ ಖರೀದಿ: ಅಣಬೆ ಬೀಜಗಳನ್ನು ಶಿವಮೊಗ್ಗದ ಸರ್ಕಾರಿ ಜೈವಿಕ ಕೇಂದ್ರದಿಂದ 80 ರೂ.ಗೆ ಒಂದು ಕೆಜಿಯಂತೆ ಖರೀದಿಸಲಾಗುವುದು. ಪ್ರತಿ ತಿಂಗಳಿಗೆ 120 ಕೆಜಿ ಖರೀದಿಸಲಾಗುವುದು.
ಅಣಬೆ ಬೆಳೆಯುವ ವಿಧಾನ: ಮೊದಲಿಗೆ ಭತ್ತದ ಹುಲ್ಲನ್ನು ಒಂದು ಇಂಚಿನಷ್ಟು ತುಂಡು ಮಾಡಿ ಆ ಪುಡಿಯನ್ನು ಎಂಟು ತಾಸು ನೀರಿನಲ್ಲಿ ನೆನಸಿಡಲಾಗುವುದು. ಬಳಿಕ ಆ ಹುಲ್ಲಿನಲ್ಲಿರುವ ನೀರು ಬಸಿಯಲು 3 ತಾಸು ಇಡಲಾಗುವುದು. ಅದಾದ ನಂತರ 14/24 ಇಂಚಿನ ಪ್ಲಾಸ್ಟಿಕ್ ಚೀಲಗಳಲ್ಲಿ 6 ಹಂತಗಳಲ್ಲಿ ಹುಲ್ಲು ಮತ್ತು ಅಣಬೆ ಬೀಜಗಳನ್ನು ಸೇರಿಸಿ ಚೀಲಗಳನ್ನು ಸಿದ್ಧಪಡಿಸಲಾಗುವುದು. ಈ ಚೀಲಗಳನ್ನು 2 ತಾಸು ನಿರ್ಜೀವಿಕರಣ (ಸ್ಟೀಮಿಂಗ್) ಪ್ರಕ್ರಿಯೆಗೆ ಒಳಪಡಿಸಲಾಗುವುದು. ಸ್ಟೀಮಿಂಗ್ ಬಳಿಕ ಬೀಜ ಬಿತ್ತನೆ ಕೊಠಡಿಯಲ್ಲಿ 20 ನಿಮಿಷ ಇಡಲಾಗುವುದು. ನಂತರ ಈ ರೀತಿ ಸಿದ್ಧಪಡಿಸಿದ ಚೀಲಗಳನ್ನು ಕತ್ತಲೆ ಕೊಠಡಿಯಲ್ಲಿ 15 ರಿಂದ 20 ದಿನ ಇರಿಸಲಾಗುವುದು. ಅಲ್ಲಿ ಅದರ ಪ್ರಾಥಮಿಕ ಬೆಳವಣಿಗೆಯಾಗುತ್ತದೆ. 20 ದಿನಗಳ ನಂತರ ಅದೇ ಚೀಲಗಳನ್ನು ಫಲೋತ್ಪನ್ನ ಕೊಠಡಿಗಳಿಗೆ ವರ್ಗಾಯಿಸಲಾಗುವುದು. ಇಲ್ಲಿ ವಾತಾವರಣದ ಆರ್ದ್ರತೆ ಕಾಯ್ದುಕೊಳ್ಳಲು ಮಂಜು ಹನಿ ಸಿಂಪಡಣೆ ವ್ಯವಸ್ಥೆ ಮಾಡಿಕೊಳ್ಳಲಾಗಿದೆ. ಫಲೋತ್ಪನ್ನ ಕೊಠಡಿಗಳಲ್ಲಿ ಐದಾರು ದಿನಗಳಲ್ಲಿ ಮೊದಲ ಇಳುವರಿ ಬರುತ್ತದೆ. 1 ವಾರದ ನಂತರ ಹಂತಹಂತವಾಗಿ 2 ಹಾಗೂ 3ನೇ ಇಳುವರಿ ಬರುತ್ತದೆ. 50 ದಿನಗಳಲ್ಲಿ ಪೂರ್ಣ ಇಳುವರಿ ಪಡೆಯಲಾಗುತ್ತದೆ.
ಪ್ಯಾಕಿಂಗ್: ಕಟಾವು ಮಾಡಿದ ಅಣಬೆಗಳನ್ನು ಪೊಟ್ಟಣಗಳಲ್ಲಿ 200 ಗ್ರಾಂ, ಅರ್ಧ ಕೆಜಿ, 1 ಕೆಜಿಯಂತೆ ಪ್ಯಾಕ್ ಮಾಡಿ ಮಾರುಕಟ್ಟೆಗೆ ಸಾಗಿಸಲಾಗುವುದು. ತಾಜಾ ಚಿಪ್ಪು ಅಣಬೆಗಳ ತಾಳಿಕೆ ಕಾಲ 24 ತಾಸು ಆಗಿರುತ್ತದೆ.
ಒಣ ಅಣಬೆ: ಇದೇ ಚಿಪ್ಪು ಅಣಬೆಗಳನ್ನು ಪ್ರಖರವಾದ ಸೂರ್ಯನ ಬೆಳಕಿನಲ್ಲಿ ಎರಡ್ಮೂರು ದಿನ ಒಣಗಿಸಿ ಅದನ್ನು ತೇವಾಂಶ ಇರದ ಮತ್ತು ಗಾಳಿ ಆಡದ ಡಬ್ಬಗಳಲ್ಲಿ ಶೇಖರಿಸಿಟ್ಟುಕೊಳ್ಳಬಹುದು. ಈ ಅಣಬೆಗಳನ್ನು ಒಂದು ವರ್ಷದವರೆಗೆ ಬಳಸಬಹುದು.
ಅಣಬೆ ಸೇವನೆಯಿಂದಾಗುವ ಲಾಭ: ಅಣಬೆ (ಮಶ್ರೂಮ್ ಇದು ಶಿಲೀಂಧ್ರ ವರ್ಗಕ್ಕೆ ಸೇರಿದ್ದು, ಸಸ್ಯಾಹಾರ ಬೆಳೆಯಾಗಿದೆ. ಇದರಲ್ಲಿ ಸಸಾರಜನಕ ಮತ್ತು ನಾರಿನಾಂಶ ಪ್ರಮಾಣ ಹೆಚ್ಚಿಗೆ ಇದೆ. ಇದರಲ್ಲಿ ಸಕ್ಕರೆ ಅಂಶ ಕಡಿಮೆ ಇದೆ. ಮಧುಮೇಹ ಮತ್ತು ರಕ್ತದ ಒತ್ತಡ ಇರುವವರಿಗೆ ಉತ್ತಮ ಆಹಾರ. ಅಲ್ಲದೆ, ಕೊಬ್ಬಿನಾಂಶ ಕಡಿಮೆ ಇರುವುದರಿಂದ ಹೆಚ್ಚು ತೂಕವಿರುವವರಿಗೆ ಇದು ಉತ್ತಮ. ಕಡಿಮೆ ಕ್ಯಾಲೋರಿ ಹೊಂದಿದೆ.
ಭಗವಂತನ ಬೆಳೆ: ಚೀನಾ ದೇಶದಲ್ಲಿ ಎರಡು ಸಾವಿರ ವರ್ಷಗಳಿಂದ ಅಣಬೆಯನ್ನು ಆಹಾರವಾಗಿ ಬಳಸುತ್ತಿದ್ದಾರೆ. ವೈದ್ಯಕೀಯ ಗುಣಗಳಿಂದಾಗಿ ಅಣಬೆಗೆ ರೋಮನ್ನರು ‘ಭಗವಂತನ ಆಹಾರ’ ಎಂದು ಕರೆದಿದ್ದಾರೆ. ಅಣಬೆ ಕೃಷಿಗೆ ಭಾರತದಲ್ಲಿ ಕೂಡ ಇತ್ತೀಚಿನ ದಿನಗಳಲ್ಲಿ ಬಹಳ ಬೇಡಿಕೆ ಕಂಡು ಬಂದಿದ್ದು, ಆಹಾರದಲ್ಲಿ ನಿತ್ಯ ಅಣಬೆಯನ್ನು ಬಳಸುವುದರಿಂದ ಉತ್ತಮ ಆರೋಗ್ಯ ಕಾಪಾಡಿಕೊಳ್ಳಬಹುದು.

ಅಣಬೆ ಎಂದರೇನು:ಅಣಬೆಯನ್ನು ಆಂಗ್ಲ ಭಾಷೆಯಲ್ಲಿ (ಮಶ್ರೂಮ್ ಎನ್ನುತಾರೆ. ಇದು ಬೆಸಿಡಿಯೋಮೈಸಿಟಿಸ್ ಶಿಲೀಂಧ್ರಗಳ ಗುಂಪಿಗೆ ಸೇರಿದೆ. ವಿಜ್ಞಾನಿ ಚಾಂಗ್ ಹೇಳಿಕೆ ಪ್ರಕಾರ ಅಣಬೆಗಳು ಎಲೆರಹಿತ, ಮೊಗ್ಗುರಹಿತ, ಹೂವು ರಹಿತವಿದ್ದರೂ ಹಣ್ಣನ್ನು ಕೊಡುವ ಆಹಾರವಾಗಿ, ಶಕ್ತಿವರ್ಧಕ ಔಷಧೀಯ ಗುಣ ಹೊಂದಿದ್ದು, ಸೃಷ್ಟಿಯ ಅಮೂಲ್ಯ ಕೊಡುಗೆಯಾಗಿದೆ.
ಅಣಬೆ ಪ್ರಕಾರಗಳು: ಚಿಪ್ಪು ಅಣಬೆ (ಪ್ಲುರೋಟಸ್ ಸಾಜೋರಕಾಜು) ಭತ್ತದ ಹುಲ್ಲಿನ ಅಣಬೆ (ವೋಲ್ವೇರಿಯಲ್ಲ ವಲವೇಸಿ) ಹಾಲು ಅಣಬೆ (ಕ್ಯಾಲೋಸೈಟ್ ಇಂಡಿಕಾ) ಬಿಳಿಗುಂಡಿ ಅಣಬೆ (ಅಗ್ಯಾರಿಕಸ್ ಬೈಸ್ಪೋರಸ್).
ಅಣಬೆ ಖಾದ್ಯಗಳು: ಅಣಬೆ ಟ್ಯೊಮಾಟೊ ಸೂಪ್, ಅಣಬೆ ತರಕಾರಿ ಮಿಕ್ಸ್ ಸೂಪ್, ಅಣಬೆ, ಟ್ಯೊಮಾಟೊ ಕೋಸಂಬರಿ, ಉಪ್ಪಿನಕಾಯಿ, ಅಣಬೆ, ಮೊಳಕೆ ಕಾಳುಗಳ ಕೋಸಂಬರಿ, ಭಜಿ, ಸ್ಯಾಂಡ್​ವಿಚ್, ಸಾಂಬಾರ್, ಬಿರಿಯಾನಿ, ಅಣಬೆ ಫ್ರೖೆ, ಮ್ಯಾಕ್ರೋನಿ ನೂಡಲ್ಸ್, ಅಣಬೆ ಮಂಚೂರಿ, ಫ್ರೖೆಡ್​ರೈಸ್, ಅಣಬೆ ಸಮೋಸ ಹೀಗೆ ವಿವಿಧ ಖಾದ್ಯ ತಯಾರಿಸಬಹುದು.