ಶಿವ ಪಂಚಾಕ್ಷರಿ ಮಂತ್ರ ಪಠಣ ನಿರಂತರ siddharudh

‘ಸಿದ್ಧಾರೂಢರ ಜೋಳಿಗೆ ದೇಶಕ್ಕೆಲ್ಲ ಹೋಳಿಗೆ’, ‘ಸಿದ್ಧಾರೂಢರ ಅಂಗಾರ ಜಗತ್ತಿಗೆಲ್ಲ ಬಂಗಾರ..’ 

ಹುಬ್ಬಳ್ಳೆಂಬುದು ಕೈಲಾಸ, ಶ್ರೀ ಸಿದ್ಧಾರೂಢರೇ ಪರಮೇಶ... 

ಹುಬ್ಬಳ್ಳಿಯ ಶ್ರೀ ಸಿದ್ಧಾರೂಢಸ್ವಾಮಿ siddharudh ಮಠದ ಕೈಲಾಸಮಂಟಪದಲ್ಲಿ ಸಿದ್ಧಾರೂಢರ ದರ್ಶನ ಪಡೆದು, ಕ್ಷಣ ಹೊತ್ತು ಅಲ್ಲಿ ಕುಳಿತರೆ ಮನದಲ್ಲಿ ಕೈಲಾಸದ ಕುರಿತ ಕಲ್ಪನೆ, ಭಾವನೆ ಮೂಡುತ್ತದೆ. ಕೈಲಾಸ ಮಂಟಪವನ್ನು ಸ್ವತಃ ಶ್ರೀ ಸಿದ್ಧಾರೂಢರೇ ಮುಂದೆ ನಿಂತು ಇದು ಹೀಗೇಯೇ ಆಗಬೇಕು ಎಂದು ತಮ್ಮ ಶಿಷ್ಯಂದಿರರಿಗೆ ಹೇಳಿ 1926ರಲ್ಲಿ ನಿರ್ಮಿಸಿದ್ದರಂತೆ. ಈ ಕೈಲಾಸ ಮಂಟಪಕ್ಕೀಗ ಶತಮಾನದ ಸಂಭ್ರಮ.

ಇಂಥ ಪುಣ್ಯ ಪುರುಷನ ಸಿದ್ಧಿ ಸ್ಥಳವಾದ ಹುಬ್ಬಳ್ಳಿಯ ಶ್ರೀ ಸಿದ್ಧಾರೂಢಸ್ವಾಮಿ ಮಠಕ್ಕೆ ನಿತ್ಯ ಸಾವಿರಾರು ಭಕ್ತರು ಬಂದು ಶ್ರೀ ಸಿದ್ಧಾರೂಢರು ಮತ್ತು ಗುರುನಾಥರೂಢರ ಗದ್ದುಗೆ ದರ್ಶನ ಪಡೆಯುತ್ತಾರೆ. ಮಹಾಶಿವರಾತ್ರಿ, ರಥೋತ್ಸವ, ರಾಮನವಮಿ, ಸಿದ್ಧಾರೂಢರ ಜನ್ಮೋತ್ಸವ, ಗುರುನಾಥಾರೂಢರ ಪುಣ್ಯತಿಥಿ, ಶ್ರಾವಣ ಮಹೋತ್ಸವ, ಕಾರ್ತಿಕ ದೀಪೋತ್ಸವದ ವೇಳೆ ಲಕ್ಷಾಂತರ ಭಕ್ತರು ಸೇರುತ್ತಾರೆ. 

ಬೀದರ ಜಿಲ್ಲೆಯ ಚಳಕಾಪುರ ಗ್ರಾಮದ ಮಹಾಶಿವಭಕ್ತ ಗುರುಶಾಂತಪ್ಪ-ದೇವಮಲ್ಲಮ್ಮ ದಂಪತಿ ಪುಣ್ಯ ಗರ್ಭದಲ್ಲಿ 1836ರ ಮಾ. 26ರಂದು ಸಿದ್ಧ ಎಂಬ ನಾಮದಿಂದ ಜನಿಸಿದರು. ಬಾಲ್ಯದಲ್ಲೇ ಹಲವು ಲೀಲೆ, ಪವಾಡಗಳನ್ನು ಮಾಡಿದರು. ಲೋಕ ಸಂಚಾರ ಮಾಡುತ್ತ ಪುಣ್ಯ ಪುರುಷರು, ಮಹಾತ್ಮರ ದರ್ಶನ ಪಡೆದರು. ಹೀಗೆ ದೇಶ ಸಂಚಾರಗೈಯುತ್ತ 1877ರಲ್ಲಿ ಸಿದ್ಧಾರೂಢರು 41ನೇ ವಯಸ್ಸಿನಲ್ಲಿ ಹುಬ್ಬಳ್ಳಿಗೆ ಬಂದರು. ಜ್ಞಾನ ಸಿದ್ಧಿ ಹಾಗೂ ಯೋಗ ಸಿದ್ಧಿಗಳನ್ನು ಹೊಂದಿದ್ದ ಸಿದ್ಧಾರೂಢರು ಮಠಕ್ಕೆ ಬಂದ ಭಕ್ತರ ಸಂಕಷ್ಟಗಳನ್ನು ಪರಿಹರಿಸಿದರು. ಈ ವೇಳೆ ಅನೇಕ ಪವಾಡಗಳು ಸಹಜವಾಗಿ ನಡೆದವು. ಒಮ್ಮೆ ಹುಬ್ಬಳ್ಳಿ ಹಾಗೂ ಮುರಕಿಬಾವಿಯ ಉತ್ಸವದಲ್ಲಿ ಏಕಕಾಲದಲ್ಲಿಯೇ ಎರಡೂ ಕಡೆ ಭಕ್ತರಿಗೆ ದರ್ಶನ ನೀಡಿದರು. ಇದನ್ನು ಕಂಡ ಭಕ್ತರು ಸಿದ್ಧಾರೂಢರು ಸಾಕ್ಷಾತ್ ಪರಶಿವನ ಅವತಾರವೇ ಎಂದು ಕೊಂಡಾಡಿದರು. ಮುಂದೆ ಬೆಂಕಿ ಮತ್ತು ಬಂಗಾರದ ಕಿರೀಟಗಳನ್ನು ಒಂದೇ ಸಮಭಾವದಿಂದ ಸ್ವೀಕರಿಸಿದ ನಿಜವಾದ ಸ್ಥಿತಪ್ರಜ್ಞರಾದರು. ಬಳಿಕ ಭಕ್ತರೇ ಕಾಣಿಕೆ ಸಂಗ್ರಹಿಸಿ ಮಠವನ್ನು ಕಟ್ಟಿ, ಸಿದ್ಧಾರೂಢಸ್ವಾಮಿಗಳ ಉತ್ಸವ ಆರಂಭಿಸಿದರು. 

ಬ್ರಹ್ಮೈಕ್ಯ: ಶ್ರೀ ಸಿದ್ಧಾರೂಢರು ತಮ್ಮ ಪ್ರೀತಿಯ ಶಿಷ್ಯ ಶ್ರೀ ಗುರುನಾಥರೂಢರನ್ನು ದಿವ ದೃಷ್ಟಿಯಿಂದ ನೋಡಿ ಅವರಲ್ಲಿಯೇ ಒಂದಾಗಿ 1929ರ ಆಗಸ್ಟ್ 21ರಂದು ಬ್ರಹ್ಮೈಕ್ಯರಾದರು.

ಸಿದ್ಧಾರೂಢಸ್ವಾಮಿಗಳು ಬ್ರಹ್ಮೈಕ್ಯರಾದ ಬಳಿಕ ಶ್ರೀಗಳ ಪರಮ ಭಕ್ತರಾದ ಗೋವಿಂದ ಸ್ವಾಮೀಜಿ ಎಂಬುವರು ಸಿದ್ಧಾರೂಢರ ನಿರ್ವಿಕಲ್ಪ ಸಮಾಧಿ ಮಂದಿರದಲ್ಲಿ ಅಹೋರಾತ್ರಿ ‘ಓಂ ನಮಃ ಶಿವಾಯ’ ಪಂಚಾಕ್ಷರಿ ಮಂತ್ರ ಪಠಣ ಆರಂಭಿಸಿದರು. ಅಂದಿನಿಂದ ನಿರಂತರವಾಗಿ ದಿನದ 24 ತಾಸು ಪಂಚಾಕ್ಷರಿ ಮಂತ್ರವನ್ನು ಇಂದಿಗೂ ಪಠಣ ಮಾಡಲಾಗುತ್ತಿದೆ. 

ಪಂಢರಪುರದ ಭಕ್ತರೊಬ್ಬರು ಶ್ರೀಮಠಕ್ಕೆ ತಂಬೂರಿಯನ್ನು ಕಳುಹಿಸಿದ್ದರು. ಶ್ರೀಮಠದಲ್ಲಿರುವ ಸ್ವಾಮಿಗಳು ಆ ತಂಬೂರಿಯನ್ನು ಕೊರಳಿಗೆ ಹಾಕಿಕೊಂಡು 1 ತಾಸಿಗೆ ಒಬ್ಬರಂತೆ ಸರದಿಯಲ್ಲಿ ನಿಂತು ಅಹೋರಾತ್ರಿ ಮಂತ್ರ ಪಠಣ ಮಾಡುತ್ತಾರೆ. ವಿಶೇಷವೆಂದರೆ ಆ ತಂಬೂರಿಯನ್ನು 97 ವರ್ಷಗಳಿಂದ ಕೆಳಗೆ ಇಟ್ಟಿಲ್ಲ! ಆ ತಂಬೂರಿಗೂ ನಿತ್ಯ ಪೂಜೆ ಮಾಡಲಾಗುತ್ತಿದೆ.

ಆರೂಢ ಜ್ಯೋತಿ: ಸ್ಮರಣೆಯೊಂದಿಗೆ ನಿರ್ವಿಕಲ್ಪ ಸಮಾಧಿ ಮಂದಿರದಲ್ಲಿ ಒಂದು ಜ್ಯೋತಿಯನ್ನು ಹಚ್ಚಲಾಗಿದೆ. ಆ ಜ್ಯೋತಿ ಕೂಡ ಅಂದಿನಿಂದ ಇಂದಿನವರೆಗೆ ನಂದಾ ದೀಪವಾಗಿ ಬೆಳಗುತ್ತಿದೆ. 

ಸಿದ್ಧಾರೂಢರ ಶಿಷ್ಯರಾದ ಶ್ರೀ ಗುರುನಾಥಾರೂಢರು 1909ರ ಜೂನ್ 9ರಂದು ಹುಬ್ಬಳ್ಳಿಯ ಉಣ್ಣಜ್ಜನವರ ಸಿದ್ದಪ್ಪ ಹಾಗೂ ಪಾರ್ವತಮ್ಮ ದಂಪತಿಯ ಪುಣ್ಯ ಗರ್ಭದಲ್ಲಿ ಗುರಪ್ಪ ಎಂಬ ನಾಮದಿಂದ ಜನಿಸಿದರು. ತಮ್ಮ ತಾಯಿ ತೀರಿದ ಬಳಿಕ ಶ್ರೀ ಸಿದ್ಧಾರೂಢರ ಕೃಪಾಕಟಾಕ್ಷದಲ್ಲಿ ಬೆಳೆದರು. ಸಿದ್ಧಾರೂಢರಿಂದ ದೀಕ್ಷೋಪದೇಶ ಪಡೆದಿದ್ದ ಶ್ರೀ ಗುರುನಾಥರೂಢರು ಆರೂಢರ ಪ್ರಿಯ ಶಿಷ್ಯರೆಂದು ಖ್ಯಾತರಾದರು. ಸಿದ್ಧಾರೂಢರು ಬ್ರಹ್ಮೈಕ್ಯರಾದ ಬಳಿಕ ಗುರುನಾಥಾರೂಢರು ಕೊನೆಯವರೆಗೂ ಸಂಪೂರ್ಣ ಮೌನವಾಗಿದ್ದರು. ಇವರು ಕೂಡ ಬಂದ ಭಕ್ತರ ಕಷ್ಟಗಳನ್ನು ಪರಿಹರಿಸುತ್ತಿದ್ದರು. ಮೌನಕ್ಕೆ ಮತ್ತೊಂದು ಹೆಸರಿನಂತಿದ್ದ ಗುರುನಾಥಾರೂಢರು 1962 ಮೇ 13ರಂದು ಬ್ರಹ್ಮೈಕ್ಯರಾದರು. ಅಂದಿನಿಂದ ಶ್ರೀಗಳ ಸಮಾಧಿ ಬಳಿ ಆರೂಢ ಜ್ಯೋತಿಯನ್ನು ಹಚ್ಚಲಾಗಿದೆ. ಆ ದೀಪ ಕೂಡ ನಂದಾದೀಪದಂತೆ ಬೆಳಗುತ್ತಿದೆ.

"