holi celebration ಗ್ರಾಮೀಣ ಭಾಗದಲ್ಲೂ ಸಂಭ್ರಮದ ರಂಗೋತ್ಸವ

ಮಂಗಳವಾರ ರಾತ್ರಿ ಗ್ರಾಮಸ್ಥರು ಉಪ್ಪಿನಬೆಟಗೇರಿ ಗ್ರಾಮದ ದ್ಯಾಮವ್ವನ ಗುಡಿ ಬಳಿಯ ಬಡಿಗೇರ ಅವರ ಮನೆಯಿಂದ ಕಾಮಣ್ಣನ ಮೂರ್ತಿಗಳನ್ನು ತಮಟೆ ವಾದ್ಯ ಬಾರಿಸುತ್ತ ತೆಗೆದುಕೊಂಡು ಹೋಗಿ ತಮ್ಮ ಓಣಿಗಳಲ್ಲಿ ಪ್ರತಿಷ್ಠಾಪಿಸಿದ್ದರು. ಮಹಿಳೆಯರು ಕಾಮಣ್ಣನ ಮೂರ್ತಿಗೆ ಪೂಜೆ ಸಲ್ಲಿಸಿ, ನೈವೇದ್ಯ ಅರ್ಪಿಸಿದರು. ಬುಧವಾರ ನಸುಕಿನಲ್ಲಿ ಆಯಾ ಓಣಿಗಳಲ್ಲಿ ಪ್ರತಿಷ್ಠಾಪಿಸಿದ್ದ ಕಾಮಣ್ಣ ಮೂರ್ತಿಗಳನ್ನು ದಹನ ಮಾಡಲಾಯಿತು. ಉಪ್ಪಿನಬೆಟಗೇರಿ ಗ್ರಾಮದ ಶ್ರೀ ಆಂಜನೇಯ ದೇವಸ್ಥಾನದ ಮುಂದೆ ಪ್ರತಿಷ್ಠಾಪಿಸಿದ್ದ ಸರ್ಕಾರಿ ಚಾವಡಿ ಕಾಮಣ್ಣನಿಗೆ ಭಕ್ತರು ವಿಶೇಷ ಪೂಜೆ ಸಲ್ಲಿಸಿದರು. ನಂತರ ಮಧ್ಯಾಹ್ಹ 12ಕ್ಕೆ ಗರಗ ಆರಕ್ಷಕ ಠಾಣೆಯವರು ಹಾಗೂ ಸ್ಥಳೀಯ ಬಾಬದಾರರು ಸೇರಿ ದಹನ ಮಾಡಿದರು. ನಂತರ ಗ್ರಾಮದ ಹಿಂದು-ಮುಸ್ಲಿಂ ಬಾಂಧವರು ಸೇರಿ ಎಲ್ಲ ಓಣಿಗಳಲ್ಲಿ ಸಂಚರಿಸಿ ಬಂಧು-ಮಿತ್ರರಿಗೆ ಬಣ್ಣ ಹಚ್ಚಿ ಸಂಭ್ರಮಿಸಿದರು.

ಗ್ರಾಪಂ ಮಾಜಿ ಅಧ್ಯಕ್ಷ ಬಸೀರಅಹ್ಮದ ಮಾಳಗಿಮನಿ, ಮಂಜುನಾಥ ಸಂಕಣ್ಣವರ, ವೀರಣ್ಣಾ ಪರಾಂಡೆ, ರಾಮಲಿಂಗಪ್ಪ ನವಲಗುಂದ, ಅಶೋಕ ಮಸೂತಿ, ಬಾಬಾ ಮೊಯಿನುದ್ದೀನ್ ಚೌಧರಿ, ಕಲ್ಲಪ್ಪ ಪುಡಕಲಕಟ್ಟಿ, ಮಲ್ಲಣ್ಣ ಅಷ್ಟಗಿ, ಶಿವಪ್ಪ ವಿಜಾಪೂರ, ರವೀಂದ್ರ ಯಲಿಗಾರ, ಗರಗ ಪಿಎಸ್‌ಐ ಸಿದ್ರಾಮಪ್ಪ ಉನ್ನದ, ಎಫ್.ಎಂ. ಮಂಟೂರ, ಗ್ರಾಮಸ್ಥರು ಪಾಲ್ಗೊಂಡಿದ್ದರು.

ಆಂಜನೇಯ ದೇವಸ್ಥಾನದ ಶ್ರೀರಾಮನಗರ ಯುವಕ ಮಂಡಳದವರು ಏರ್ಪಡಿಸಿದ್ದ ರೇನ್ ಡಾನ್ಸ್ನಲ್ಲಿ ಯುವಕರು, ಮಹಿಳೆಯರು ಮತ್ತು ಮಕ್ಕಳು ಪಾಲ್ಗೊಂಡು ಸಾಮೂಹಿಕ ನೃತ್ಯ ಮಾಡಿ ಗಮನ ಸೆಳೆದರು. ಗ್ರಾಮದ ಶ್ರೀ ಮಲ್ಲಿಕಾರ್ಜುನ ದೇವಸ್ಥಾನ ಯುವಕ ಮಂಡಳದವರು ಹೋಳಿ ಅಂಗವಾಗಿ ಗಡಿಗೆ ಒಡೆಯುವ ಸ್ಪರ್ಧೆ ಏರ್ಪಡಿಸಿದ್ದರು.