Hef hubli ವಾಣಿಜ್ಯೋದ್ಯಮದಲ್ಲಿ ಭಾರತ ವಿಶ್ವನಾಯಕ

ಹುಬ್ಬಳ್ಳಿ: hef hubli ವ್ಯಾಪಾರ, ವಾಣಿಜ್ಯದಲ್ಲಿ ವಿಶ್ವನಾಯಕನಾಗಿ ಮೆರೆದ ಭಾರತ ಮತ್ತೆ ಅಂತಹ ವೈಭವ ಕಾಣಬೇಕಾದರೆ ಎಲ್ಲರೂ ಒಟ್ಟಾಗಿ ಹೆಜ್ಜೆ ಹಾಕಬೇಕಿದೆ. ಭಾವನಾತ್ಮಕವಾಗಿ ಬೆಸೆದುಕೊಂಡಿರುವ ಭಾರತದಲ್ಲಿ ಪರಸ್ಪರ ಸಹಕಾರದಿಂದ ಮುಂದೆ ಸಾಗಿ ದೇಶವನ್ನು ಮುಂಚೂಣಿಗೆ ತರಬಹುದು ಎಂದು ಧರ್ಮಸ್ಥಳ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆ ಅಭಿಪ್ರಾಯಪಟ್ಟರು.

ಇಲ್ಲಿಯ ಡೆನಿಸನ್ಸ್​ ಹೋಟೆಲ್​ನಲ್ಲಿ ಹಿಂದೂ ಎಕನಾಮಿಕ್​ ಫೋರಂ, ಎಚ್​ಇಎಫ್​ ಹುಬ್ಬಳ್ಳಿ ಧಾರವಾಡ ಶಾಖೆ ವತಿಯಿಂದ ವಿಜಯಾನಂದ ಟ್ರಾವೆಲ್ಸ್​ ಟೈಟಲ್​ ಸ್ಪಾನ್ಸರ್​ ಅಡಿಯಲ್ಲಿ ಶುಕ್ರವಾರ ಏರ್ಪಡಿಸಿದ್ದ ಎರಡು ದಿನಗಳ ರಾಷ್ಟ್ರೀಯ ಸಮಾವೇಶ ಉದ್ಘಾಟಿಸಿ ಅವರು ಮಾತನಾಡಿದರು.

ಹಿಂದೂ ಎಕನಾಮಿಕ್​ ಫೋರಂ ಸ್ಥಾಪನೆಯು ಅದ್ಭುತ ಆಲೋಚನೆಯಾಗಿದೆ. ಇದರ ಸಲಹೆ ಪಡೆದುಕೊಂಡು ಉದ್ಯಮ ಆರಂಭಿಸಬೇಕು. ಇದರ ಮೂಲಕ ಅದ್ಭುತ ಅಭಿವೃದ್ಧಿ ಸಾಧಿಸುವ ಎಲ್ಲ ಅವಕಾಶಗಳು ಇವೆ. ಸಹಕಾರ ಮನೋಭಾವನೆಯೊಂದಿಗೆ ಎಲ್ಲರೂ ಮುಂದಡಿ ಇಡಿ ಎಂದರು.

ಒಂದು ಟ್ರಕ್​ನಿಂದ ಬಿಜಿನೆಸ್​ ಆರಂಭಿಸಿದ ವಿಆರ್​ಎಲ್​ ಇಂದು 5 ಸಾವಿರ ಲಾರಿ, 500 ಬಸ್​ಗಳ ಮೂಲಕ ಸಾರಿಗೆ ಕ್ಷೇತ್ರದಲ್ಲಿ ಅದ್ವೀತಿಯ ಸಾಧನೆ ಮಾಡಿದೆ. ದೇಶದ ಎಲ್ಲ ರಾಜ್ಯಗಳಲ್ಲಿ ಸೇವೆ ನೀಡುತ್ತಿದೆ. ಇಂತಹ ಸಾಧನೆ ಮಾಡಿದ ಸಂಕೇಶ್ವರ ಅವರ ಕುಟುಂಬ ಇತರರಿಗೆ ಮಾದರಿಯಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ವಿಶ್ವ ಹಿಂದೂ ಎಕನಾಮಿಕ್​ ಫೋರಂ (ಡಬ್ಲೂಎಚ್​ಇಎಫ್​) ಸಂಸ್ಥಾಪಕರಾದ ಶ್ರೀ ಸ್ವಾಮಿ ವಿಗ್ಯಾನಾನಂದಜೀ ಮಾತನಾಡಿ, ನೂರಾರು ವರ್ಷಗಳಿಂದ ಬ್ಯಾಂಕ್​ ವ್ಯವಹಾರ ನಡೆಸುತ್ತಿರುವ ಭಾರತದಲ್ಲಿ ಒಂದೇ ಒಂದು ಬ್ಯಾಂಕ್​ ನಷ್ಟ ಆಗಿಲ್ಲ. ಆದರೆ, ಅಮೆರಿಕದಂತಹ ಮುಂದುವರಿದ ದೇಶಗಳಲ್ಲಿ ತಿಂಗಳಿಗೊಂದು ಬ್ಯಾಂಕ್​ ದಿವಾಳಿ ಎಂಬ ಸುದ್ದಿಗಳನ್ನು ಕೇಳುತ್ತೇವೆ. ಇದು ಭಾರತೀಯರ ಹಣಕಾಸಿನ ವ್ಯವಹಾರದ ವಿಶ್ವಾಸಾರ್ಹತೆಯನ್ನು ತೋರಿಸುತ್ತದೆ ಎಂದರು.

ಹಿಂದೂ ಬಿಜಿನೆಸ್​ಮೆನ್​ಗಳ ಮಧ್ಯೆ ಪರಸ್ಪರ ಸಹಕಾರ, ಒಪ್ಪಂದಗಳು ಏರ್ಪಡಬೇಕು. ಪೂರೈಕೆ ಸರಪಳಿ ನಿಯಂತ್ರಣಕ್ಕೆ ತೆಗೆದುಕೊಳ್ಳಬೇಕು. ವಿಶ್ವದ ಒಟ್ಟು ಅಭಿವೃದ್ಧಿ ಸೂಚ್ಯಂಕದಲ್ಲಿ ಭಾರತದ ಪಾಲು ಶೇ. 5ಕ್ಕೆ ಇಳಿದಿದೆ. ಇದನ್ನು ಸುಧಾರಣೆಯತ್ತ ಕೊಂಡೊಯ್ಯಲು ಪ್ರತಿಯೊಬ್ಬ ಹಿಂದೂ ಸಮಾಜಕ್ಕಾಗಿ, ಸಂಟನೆಗೆ ಸಮಯ ಕೊಡಬೇಕು. ನಾವೆಲ್ಲರೂ ದೇಶವಾಗಿ ಆಲೋಚನೆ ಮಾಡಬೇಕು ಎಂದರು.

ಜಾಗತಿಕ ಮಟ್ಟದಲ್ಲಿ ವ್ಯಾಪಾರ ವಹಿವಾಟು ಹೆಚ್ಚಿಸಲು ಗ್ರಾಮ ಮಟ್ಟದಲ್ಲಿ ಸಮಸ್ಯೆಗಳನ್ನು ಅರಿತುಕೊಂಡು ಅವುಗಳಿಗೆ ಪರಿಹಾರ ಕಂಡುಕೊಳ್ಳಬೇಕು. ಭಾರತದ ಆರ್ಥಿಕ ಮತ್ತು ವಾಣಿಜ್ಯ ಕ್ಷೇತ್ರವು ರಚನಾತ್ಮಕವಾಗಿ ಬೆಳೆದಿದೆ. ಹಿಂದೂ ನವೋದ್ಯಮಿಗಳು ಮತ್ತು ಸಣ್ಣ ವ್ಯವಹಾರ ಮಾಡುವವರನ್ನು ಬೆಳೆಸಲು ತರಬೇತಿ, ಆರ್ಥಿಕ ನೆರವು, ಸಲಹೆ ಜತೆ ಮೂಲಸೌಕರ್ಯ ಒದಗಿಸುವುದು ಫೋರಂನ ಮುಖ್ಯ ಉದ್ದೇಶವಾಗಿದೆ. ಇದೇ ಉದ್ದೇಶಕ್ಕಾಗಿ ಮಹಾಸಂಗಮ ಹುಟ್ಟಿಕೊಂಡಿದೆ ಎಂದರು.

ಪ್ರಧಾನ ಭಾಷಣ ಮಾಡಿದ ಆರ್ಥಿಕ ತಜ್ಞ ಡಾ. ಆರ್​. ವೈದ್ಯನಾಥನ್​, ಆರ್ಥಿಕ ಹಿಂಜರಿಕೆ ಅಥವಾ ಕುಸಿತದಂತ ಮಾತುಗಳು ಕೇವಲ ಅಮೆರಿಕ, ಜರ್ಮನಿ, ಇಂಗ್ಲಂಡನಂತಹ ಮುಂದುವರಿದ ದೇಶಗಳಿಗೆ ಸೀಮಿತವಾಗಿವೆ. ಭಾರತದಂತ ಸ್ವಯಂ ಶಿಸ್ತು, ಸುಸ್ಥಿರ ಆರ್ಥಿಕತೆ ಹೊಂದಿದ ದೇಶದಲ್ಲಿ ಅಭಿವೃದ್ಧಿ ನಿರಂತರವಾಗಿರುತ್ತದೆ. ಆವಿಷ್ಕಾರಕ್ಕಿಂತ ಹೊಸ ತಂತ್ರಜ್ಞಾನವನ್ನು ಅಳವಡಿಸಿಕೊಂಡು ಅಭಿವೃದ್ಧಿ ಸಾಧಿಸುವುದರಲ್ಲಿ ಭಾರತ ಮುಂಚೂಣಿಯಲ್ಲಿದೆ ಎಂದರು.

ವಿಆರ್​ಎಲ್​ ಸಮೂಹ ಸಂಸ್ಥೆಗಳ ವ್ಯವಸ್ಥಾಪಕ ನಿರ್ದೇಶಕರಾದ ಡಾ. ಆನಂದ ಸಂಕೇಶ್ವರ ಅವರು ಮಾತನಾಡಿ, ಒಂದು ಕಾಲದಲ್ಲಿ ಜಾಗತಿಕ ಆರ್ಥಿಕತೆಯಲ್ಲಿ ಶೇ. 33ರಷ್ಟಿದ್ದ ಭಾರತದ ಪಾಲು ಈಗ ಶೇ. 5ಕ್ಕೆ ಇಳಿದಿರುವುದು ನಮಗೆಲ್ಲ ಒಂದು ಎಚ್ಚರಿಕೆ ಗಂಟೆಯಾಗಿದೆ. ಆಯುರ್ವೇದ, ಯೋಗ ಮುಂತಾದ ಭಾರತೀಯ ಪರಂಪರೆಯನ್ನು ಇನ್ನಷ್ಟು ಉತ್ಕರ್ಷಕ್ಕೆ ಕೊಂಡೊಯ್ದು ಭಾರತ ಮತ್ತೆ ಜಾಗತಿಕವಾಗಿ ಗುರುತಿಸಿಕೊಳ್ಳಲು ನೆರವಾಗಬೇಕಿದೆ ಎಂದರು.

ಭಾರತೀಯರಲ್ಲಿ ಉದ್ಯಮಶೀಲತೆ ಗುಣ ಇದೆ, ಅದನ್ನು ಹಿಂದೂವಾಗಿ ಹೊರ ಜಗತ್ತಿಗೆ ತೋರಿಸಬೇಕು. ಹಿಂದೂ ಆರ್ಥಿಕ ಮಹಾಸಂಗಮದ ಮೂಲಕ ಸಂಘಟಿತರಾಗುತ್ತಿರುವುದರಿಂದ ಅನೇಕ ಪ್ರಯೋಜನಗಳು ಇವೆ. ಮುಖ್ಯವಾಗಿ ಸರ್ಕಾರಗಳು ನೀತಿ, ನಿರ್ಧಾರಗಳನ್ನು ಕೈಗೊಳ್ಳುವಾಗ ಹಿಂದೂಗಳ ಬಗ್ಗೆ ಆಲೋಚನೆ ಮಾಡಲು ಉತ್ತೇಜಿಸಲಿದೆ ಎಂದರು.

ಮಜೇಥಿಯಾ ಫೌಂಡೇಷನ್​ ಚೇರ್ಮನ್​ ಜಿತೇಂದ್ರ ಮಜೇಥಿಯಾ ಮಾತನಾಡಿ, ಹಿಂದೂ ಹೆಸರು ಸಾರ್ಥಕವಾಗಬೇಕಾದರೆ ಕೌಟುಂಬಿಕ ಸಾಮರಸ್ಯವೂ ಅಗತ್ಯವಾಗಿದೆ. ಹಿಂದೂ ಕುಟುಂಬಗಳು ಒಡೆಯಬಾರದು. ಇಂತಹ ಸಂಘಟನೆಗಳು ಯಶಸ್ವಿಯಾಗಬೇಕಾದರೆ ತನು ಮನ ಧನದಿಂದ ಪಾಲ್ಗೊಳ್ಳಬೇಕಿದೆ ಎಂದರು.

ಹಿಂದೂ ಆರ್ಥಿಕ ಫೋರಂ ಕಾರ್ಯದರ್ಶಿ ಟಿ.ಆರ್​. ಶಿವಪ್ರಸಾದ ಮಾತನಾಡಿ, ಹಿಂದೂಗಳು ನಿದ್ದೆಗೆ ಜಾರಿದರೆ ಮಹಾಸಂಕಷ್ಟ ಎದುರಾಗಲಿದೆ. ಸ್ವಾತಂತ್ರಕ್ಕಾಗಿ ಹೋರಾಡಿದ ಹಿಂದೂಗಳು ಈಗ ಆರ್ಥಿಕ ಸ್ವಾತಂತ್ರಕ್ಕಾಗಿ ಮುನ್ನುಗ್ಗಬೇಕಿದೆ. ಎಲ್ಲರೂ ಒಗ್ಗಟ್ಟಿನ ಮಂತ್ರ ಜಪಿಸಬೇಕು ಎಂದರು.

ಸೊಸೈಟಿ ಲೋಕಾರ್ಪಣೆ:

ಹು-ಧಾ ಶಾಖೆ ಅಧ್ಯಕ್ಷ ವಿಜೇಶ್​ ಸೈಗಲ್​ ಮಾತನಾಡಿ, ಹಿಂದೂಗಳಲ್ಲಿ ಉದ್ಯಮಶೀಲತೆ ಬೆಳೆಸುವ ಸಲುವಾಗಿ ಆರ್ಥಿಕ ಸಹಕಾರಕ್ಕಾಗಿ ಸಹಕಾರ ಸಂಘ ಸ್ಥಾಪಿಸಲಾಗಿದೆ. ಸುವರ್ಣ ಶಕ್ತಿ ಸೌಹಾರ್ದ ಕೋಆಪರೇಟಿವ್​ ಸೊಸೈಟಿ ಹೆಸರಿನ ಸಂಸ್ಥೆಯು ಹಿಂದೂಗಳಲ್ಲಿ ಒಗ್ಗಟ್ಟು ತರುವಲ್ಲಿ ಮುಂದಿನ ದಿನಗಳಲ್ಲಿ ಮಹತ್ವದ ಪಾತ್ರ ವಹಿಸಲಿದೆ ಎಂದರು.

ಹು-ಧಾ ಶಾಖೆ ಸಂಚಾಲಕ ಅರ್ಜುನ ಮಹಾಜನ್​, ನಿತಿನ್​ ಶರ್ಮಾ, ಕಾರ್ಯದರ್ಶಿ ಗಿರೀಶ ಮಾನೆ, ಉಪಾಧ್ಯಕ್ಷ ಗೌತಮ ಬಾಫಣಾ, ಖಜಾಂಚಿ ಮುಖೇಶ ಪಾಂಚಾಲ, ಸ್ವರ್ಣ ಗ್ರುಪ್​ನ ವ್ಯವಸ್ಥಾಪಕ

ನಿರ್ದೇಶಕ ಡಾ. ವಿ.ಎಸ್​.ವಿ. ಪ್ರಸಾದ, ಉದ್ಯಮಿ ನಂದಕುಮಾರ, ಸದಸ್ಯರು, ದೇಶದ ವಿವಿಧೆಡೆಯಿಂದ ಪ್ರತಿನಿಧಿಗಳು ಪಾಲ್ಗೊಂಡಿದ್ದರು.