handicraft ಇಂಡಿಯನ್​ ದಸ್ತಕಾರ್​ ಹಾಟ್​ ಉದ್ಘಾಟನೆ

ವಿಜಯವಾಣಿ ಸಹಯೋಗದಲ್ಲಿ ಆಯೋಜನೆಗೊಂಡಿರುವ ಇಂಡಿಯನ್​ ದಸ್ತಕಾರ್​ ಹ್ಯಾಂಡ್​ಲೂಮ್​ ಮತ್ತು ಹ್ಯಾಂಡಿಕ್ರಾಫ್ಟ್ ಹಾಟ್​ ಅತ್ಯಂತ ಜನಪ್ರಿಯ ವಸ್ತು ಪ್ರದರ್ಶನವು ಸಾರ್ವಜನಿಕರ ಗಮನ ಸೆಳೆಯುತ್ತಿದೆ.

ರಾಜ್ಯದ ವಿವಿಧ ಕಡೆಗಳಲ್ಲಿ ಹಲವಾರು ಪ್ರದರ್ಶನಗಳನ್ನು ನೀಡಿರುವ ಸಂಘಟಕರು ಇದೀಗ ಮೊದಲ ಬಾರಿ ಹುಬ್ಬಳ್ಳಿಗೆ ಮೇಳ ತಂದಿದ್ದಾರೆ. ದೇಶದ ವಿವಿಧೆಡೆಯಿಂದ 120ಕ್ಕೂ ಹೆಚ್ಚು ಮಳಿಗೆಗಳು ಮತ್ತು ಕುಶಲಕರ್ಮಿಗಳು ಪ್ರದರ್ಶನ ನೀಡುತ್ತಿದ್ದಾರೆ.

ಈ ಅದ್ಭುತ ಪ್ರದರ್ಶನ ಮತ್ತು ಮಾರಾಟ ಮೇಳವು ಜುಲೈ 25ರಿಂದ ಆಗಸ್ಟ್​ 30ರವರೆಗೆ ನಡೆಯಲಿದ್ದು, ಬೆಳಗ್ಗೆ 10.30ರಿಂದ ರಾತ್ರಿ 9.30ರ ವರೆಗೆ ತೆರೆದಿರುತ್ತದೆ ಎಂದು ಸಂಘಟಕ ಅಹ್ಮದ್​ ಖಾನ್​ ತಿಳಿಸಿದರು.

ಪ್ರದರ್ಶನ ಮೇಳ ಉದ್ಘಾಟಿಸಿದ ಶಾಸಕ ಮಹೇಶ ಟೆಂಗಿನಕಾಯಿ ಅವರು, ಇದೊಂದು ಕುಟುಂಬ ಸಮೇತರಾಗಿ ಬಂದು ನೋಡುವ ಮೇಳವಾಗಿದೆ. ದೇಶದ ವಿವಿಧ ಕಡೆಗಳಿಂದ ನಮ್ಮ ಕಲೆ, ಸಂಸ್ಕೃತಿ ಬಿಂಬಿಸುವ ಅಲಂಕಾರಿಕ ವಸ್ತುಗಳು ಇಲ್ಲಿವೆ. ಹೊಸ ಲೋಕವನ್ನೆ ಕಣ್ಮುಂದೆ ತರುವಂತಿದೆ. ಅವಳಿನಗರ ಹಾಗೂ ಸುತ್ತಲಿನ ಜನರಿಗೆ ಇದು ಆಕರ್ಷಕವಾಗಿದೆ. ಕಾಶ್ಮೀರದಿಂದ ಕನ್ಯಾಕುಮಾರಿ ವರೆಗಿನ ಎಲ್ಲ ವಿಶೇಷತೆಗಳು ಒಂದೇ ಸೂರಿನಡಿ ನೋಡಲು ಹಾಗೂ ಖರೀದಿಸಲು ಸಿಗುತ್ತಿವೆ ಎಂಬುದು ವಿಶೇಷ ಎಂದರು.

ಅತಿಥಿಯಾಗಿದ್ದ ಮೇಯರ್​ ದುರ್ಗಮ್ಮ ಬಿಜವಾಡ ಅವರು, ಬಹಳ ಉತ್ತಮ ಪ್ರದರ್ಶನವಾಗಿದೆ. ಕಲಾಕೃತಿಗಳು ಗಮನ ಸೆಳೆಯುತ್ತವೆ. ನಮ್ಮ ದೇಶಿ ಸಂಸ್ಕೃತಿ ನೋಡುವುದರಿಂದ ಮನಕ್ಕೆ ಉಲ್ಲಾಸ ಸಿಗುತ್ತದೆ. ಜನರು ಇಲ್ಲಿಗೆ ಪರಿವಾರದೊಂದಿಗೆ ಭೇಟಿ ನೀಡುವಂತಹ ಸ್ಥಳವಾಗಿದೆ ಎಂದರು.