ಹಿಂಗಾರಿ ಬೆಳೆಗಳಲ್ಲಿ ಎಡೆಕುಂಟೆ ಭರಾಟೆ cultivation work

ಹಿಂಗಾರಿನ ಕಡಲೆ, ಜೋಳ, ಗೋಧಿ, ಕುಸುಬೆ ಬಹುತೇಕ ಬೆಳೆಗಳು ಹವಾಮಾನ ಆಧಾರಿತವಾಗಿವೆ. ಕೆಲ ದಿನಗಳಿಂದ ಬಿಡುತ್ತಿರುವ ಶೀತಮಯ ವಾತಾವರಣ ಬೆಳೆಗಳಿಗೆ ಪೂರಕವಾಗಿದ್ದು, ಬೆಳೆಗಳು ದಿನದಿಂದ ದಿನಕ್ಕೆ ಬದಲಾವಣೆ ಕಂಡುಬರುತ್ತಿವೆ. ಟ್ರ್ಯಾಕ್ಟರ್ ಹಾಗೂ ಜೋಡೆತ್ತುಗಳ ಮೂಲಕ ಎಡೆಕುಂಟೆ ಹೊಡೆಯುವ ಕೆಲಸ ಜೋರಾಗಿದೆ.

ಕಳೆದ ವರ್ಷ 2 ಸಾವಿರ ರೂಪಾಯಿ ಇದ್ದ ಎತ್ತಿನ ದಿನದ ಬಾಡಿಗೆ, ಈ ಬಾರಿ 2500 ರೂ.ಗೆ ಏರಿಕೆ ಕಂಡಿದೆ. ಕಾರ್ಮಿಕರಿಗೆ 400 ರೂ. ದಿನಗೂಲಿ ಇದೆ. ನಾಲ್ಕು ಜನ ಸೇರಿ ದಿನವೊಂದಕ್ಕೆ ಎತ್ತಿನ ಗಳೆಯಿಂದ 4 ಎಕರೆ ಎಡೆಕುಂಟೆ ಹೊಡೆಯಬಹುದಾಗಿದೆ. ಟ್ರ್ಯಾಕ್ಟರ್ ಮೂಲಕ ಎಡೆಕುಂಟೆಗೆ ಹೊಡೆಯಲು ವೆಚ್ಚ ಕಡಿಮೆ ಇದ್ದರೂ, ಬೆಳೆಗಳಿಗೆ ಹಾನಿ ಆಗುತ್ತಿರುವ ಕಾರಣ ರೈತರು ಜೋಡೆತ್ತುಗಳಿಗೆ ಆದ್ಯತೆ ನೀಡುವಂತಾಗಿದೆ. ಇದು ಹೊಲ ಜಾಸ್ತಿ ಇರುವ ರೈತರಿಗೆ ಅನುಕೂಲ ಆಗಿದ್ದರೂ ಸಣ್ಣ ಹಿಡುವಳಿದಾರರಿಗೆ ಇದು ಹೊರೆಯಾಗಿ ಪರಿಣಮಿಸಿದೆ.

ಪರ್ಯಾಯ ಮಾರ್ಗ: ಎತ್ತು, ಟ್ರಾೃಕ್ಟರ್‌ಗಳಿಂದ ಎಡೆಕುಂಟೆ ಸಾಧ್ಯವಾಗದ ಸಣ್ಣ ರೈತರು ಇದೀಗ ಸಣ್ಣ ಯಂತ್ರದ ಮೊರೆ ಹೋಗಿದ್ದಾರೆ. ಸೈಕಲ್ ಗಾಲಿ ಬಳಸಿ ಮಾಡಿದ ಹಾಗೂ ಸಣ್ಣ ಕಬ್ಬಿನ ಪಟ್ಟಿ ಹಾಗೂ ಸರಳುಗಳಿಂದ ಮಾಡಿದ ಉಪಕರಣವನ್ನು ಎಡೆಕುಂಟೆಯಾಗಿ ಬಳಸುತ್ತಿದ್ದಾರೆ. ಕಡಿಮೆ ವೆಚ್ಚದ ಈ ಸಲಕರಣೆಗಳಿಂದ ರೈತರ ಕೆಲಸವು ಸರಳವಾಗಿದೆ. ರೈತರು ಇಷ್ಟಪಟ್ಟು ದಿನವೀಡಿ ಕೆಲಸ ಮಾಡುವಂತಾಗಿದೆ.