ಅರಿತು ಬೋಧಿಸಿದರೆ ಮಕ್ಕಳ ಕಲಿಕೆ ಅರ್ಥಪೂರ್ಣ

ಧಾರವಾಡ: ಶಿಕ್ಷಕರು ಪ್ರತೀ ತರಗತಿಯ ಪಠ್ಯಕ್ರಮದ ವಿಷಯಗಳನ್ನು ಅರಿತು ಬೋಽಸಿದರೆ ಮಕ್ಕಳ ಕಲಿಕೆ ಅರ್ಥಪೂರ್ಣವಾಗುತ್ತದೆ ಎಂದು ತಾಲೂಕಿನ ಅಮ್ಮಿನಬಾವಿ ಸಂಸ್ಥಾನ ಪಂಚಗೃಹ ಹಿರೇಮಠದ ಕಿರಿಯ ಶ್ರೀ ಅಭಿನವ ಶಾಂತಲಿಂಗ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.

ಅವರು ಶನಿವಾರ ಶ್ರೀಮಠದ ಸುಶೀಲಾತಾಯಿ ಹಿರೇಮಠ ಕನ್ನಡ ಪ್ರಾಥಮಿಕ ಶಾಲೆಯಲ್ಲಿ ಹುಬ್ಬಳ್ಳಿಯ ದೇಶಪಾಂಡೆ ಪ್ರತಿಷ್ಠಾನದ ಅರ್ಲಿಸ್ಪಾರ್ಕ್ ಯೋಜನೆಯಡಿ ಖಾಸಗಿ ಪ್ರಾಥಮಿಕ ಶಾಲಾ ಶಿಕ್ಷಕರಿಗಾಗಿ ಹಮ್ಮಿಕೊಂಡಿದ್ದ `ಆಂಗ್ಲಭಾಷಾ ಬೋಧನೆಯ ಉಚಿತ ಸರಣಿ ತರಬೇತಿ ಶಿಬಿರ'ಗಳನ್ನು ಉದ್ಘಾಟಿಸಿ ಮಾತನಾಡಿದರು.

ಶಾಲಾ ತರಗತಿಗಳಲ್ಲಿ ದೇಶದ ಭವಿಷ್ಯ ನಿರ್ಮಾಣವಾಗುತ್ತದೆ. ಶಿಕ್ಷಕರ ನಿಜವಾದ ಯಶಸ್ಸು ವಿದ್ಯಾರ್ಥಿಯ ಅಂಕಗಳಲ್ಲಿ ಅಲ್ಲ, ಅವನ ವ್ಯಕ್ತಿತ್ವ ಮತ್ತು ಜೀವನದ ಸಾಧನೆಯಲ್ಲಿ ಎದ್ದು ಕಾಣುತ್ತದೆ ಎಂದರು.

ಅತಿಥಿಯಾಗಿ ಆಗಮಿಸಿದ್ದ ಚಿಕ್ಕಮಗಳೂರು ಜಿಲ್ಲೆ ಬೇರುಗಂಡಿ ಬೃಹನ್ಮಠದ ಶ್ರೀ ರೇಣುಕ ಮಹಾಂತ ಶಿವಾಚಾರ್ಯರು ಮಾತನಾಡಿ, ಬೋಧನೆ ಎಂದರೆ ಕೇವಲ ಪಾಠ ಹೇಳುವುದಲ್ಲ, ವಿದ್ಯಾರ್ಥಿಗಳಿಗೆ ಕಲಿಕಾ ವಿಷಯಗಳನ್ನು ಅರ್ಥ ಮಾಡಿಸುವುದು. ಮಕ್ಕಳು ಮುಕ್ತವಾಗಿ ಪ್ರಶ್ನೆ ಕೇಳಿ ಆಸಕ್ತಿಯಿಂದ ಕಲಿಯುವಂತೆ ಶಿಕ್ಷಕರ ಬೋಧನೆ ಹಿತವಾಗಿರಬೇಕು ಎಂದರು.

ಹವ್ಯಾಸಿ ಪತ್ರಕರ್ತ ಗುರುಮೂರ್ತಿ ಯರಗಂಬಳಿಮಠ ಮಾತನಾಡಿದರು. ದೇಶಪಾಂಡೆ ಪ್ರತಿಷ್ಠಾನದ ತರಬೇತುದಾರರಾದ ಪುಷ್ಪಲತಾ ಕುರಗೋಡ, ದಾನಮ್ಮ ಕರ್ಲವಾಡ ತರಬೇತಿ ನೀಡಿದರು. ಶಾಲೆಯ ಮುಖ್ಯ ಶಿಕ್ಷಕಿ ಮಂಜುಳಾ ದೊಡಮನಿ, ವಿವಿಧ ವಿಷಯಗಳ ಶಿಕ್ಷಕರಾದ ಟಿ.ಎಂ. ದೇಸಾಯಿ ಎಂ.ಎನ್. ಆಲದಕಟ್ಟಿ, ಎಂ.ಆಂಜನೇಯ, ವಿನಾಯಕ ಹಿರೇಮಠ, ಲೀಲಾವತಿ ಅಣ್ಣಿಗೇರಿ, ಮಹೇಶ್ವರಿ ಚಿಕ್ಕಮಠ, ಜ್ಯೋತಿ ವಿಠ್ಠೋಜಿ, ಸರಿತಾ ಸುಣಗಾರ, ಆರತಿ ಹರಿಜನ, ರಕ್ಷಿತಾ ಶಿರಗುಪ್ಪಿ, ಸವಿತಾ ಅಕ್ಕೋಜಿ, ಪವಿತ್ರಾ ಯರಗಂಬಳಿಮಠ ಇದ್ದರು.