bsnl ಹಳ್ಳಿಯಲ್ಲೂ ಉತ್ತಮ ನೆಟ್ ವರ್ಕ್

ಹುಬ್ಬಳ್ಳಿ: bsnl ಗ್ರಾಮೀಣ ಮತ್ತು ನಗರ ಪ್ರದೇಶಗಳ ನಡುವಿನ ಡಿಜಿಟಲ್​ ಅಂತರ ಕಡಿಮೆ ಮಾಡುವುದು, ಸಮಗ್ರ ಸಾಮಾಜಿಕ- ಆರ್ಥಿಕ ಅಭಿವೃದ್ಧಿ ಉತ್ತೇಜಿಸುವ ಸಲುವಾಗಿ ಭಾರತ್​ ನೆಟ್​ ಉದ್ಯಮಿ ಯೋಜನೆಯನ್ನು ಜಾರಿಗೆ ತರಲಾಗಿದೆ ಎಂದು ಬಿಎಸ್​ಎನ್​ಎಲ್​ ಹಿರಿಯ ಪ್ರಧಾನ ವ್ಯವಸ್ಥಾಪಕ ಧನಂಜಯಕುಮಾರ ತ್ರಿಪಾಟಿ ತಿಳಿಸಿದರು.

ದೇಶದ ಎಲ್ಲ ಗ್ರಾಮ ಪಂಚಾಯಿತಿಗಳು, ಹಳ್ಳಿಗಳು ಇದರ ಪ್ರಯೋಜನ ಪಡೆಯಬಹುದು. ಭಾರತ ಸರ್ಕಾರವು ಗ್ರಾಪಂ, ಗ್ರಾಮಗಳಲ್ಲಿ ಎ್​ಟಿಟಿಎಚ್​ ಹೈ ಸ್ಪೀಡ್​ ಬ್ರಾಡಬ್ಯಾಂಡ್​ ಸಂಪರ್ಕಗಳನ್ನು ಒದಗಿಸುವ ಪ್ರಮುಖ ಯೋಜನೆ ರೂಪಿಸಿದೆ. ಗ್ರಾಹಕರು ಫ್ರಾಂಚೈಸಿ ಪಡೆದುಕೊಳ್ಳಬಹುದು. ನಿರುದ್ಯೋಗಿ ಯುವಕರಿಗೆ ಇದೊಂದು ಒಳ್ಳೆಯ ಅವಕಾಶ, ಉತ್ತಮ ಆದಾಯ ಗಳಿಸಬಹುದು ಎಂದರು.

ಮೊಡೆಮ್​, ಶೂನ್ಯ ಆಪ್ಟಿಕಲ್​ ಫೈಬರ್​ ಕೇಬಲ್​ ಕಾಸ್ಟ್​ ಮತ್ತು ಶೂನ್ಯ ಇನ್​ಸ್ಟಾಲ್ಲಿಂಗ್​ ಶುಲ್ಕದ ಪ್ರಯೋಜನ ಸಹ ನೀಡಲಾಗುತ್ತಿದೆ. ಧಾರವಾಡ, ಹಾವೇರಿ, ಗದಗ ಒಳಗೊಂಡ ಬಿಎಸ್​ಎನ್​ಎಲ್​ ವಲಯದಲ್ಲಿ 502 ಗ್ರಾಮ ಪಂಚಾಯಿತಿಗಳಿದ್ದು, 360 ಗ್ರಾಪಂ ವ್ಯಾಪ್ತಿಯಲ್ಲಿ ನೆಟ್​ವರ್ಕ್​ ಕಾರ್ಯಾಚರಣೆಯಲ್ಲಿದೆ.

ಇದರಲ್ಲಿ 200 ಗ್ರಾಪಂನಲ್ಲಿ ಫ್ರಾಂಚೈಸಿ ಪಡೆಯಲು ಅವಕಾಶ ಇದೆ. ನೆಟ್​ವರ್ಕ್​ ಇಲ್ಲದ ಯಾವುದಾದರೂ ಊರು ಇದ್ದರೆ ಕಚೇರಿಗೆ ತಿಳಿಸಿದರೆ ಸಂಸದರ ಶಿಫಾರಸಿನೊಂದಿಗೆ ಗ್ರಾಮಕ್ಕೆ ಸಂಪರ್ಕ ಸೇವೆ ಕಲ್ಪಿಸಲಾಗುವುದು ಎಂದು ಸುದ್ದಿಗೋಷ್ಠಿಯಲ್ಲಿ ಹೇಳಿದರು.

ಡಿಜಿಎಂ ರಾಜಕುಮಾರ ಆಸಂಗಿ ಮಾತನಾಡಿ, ಬಿಎಸ್​ಎನ್​ಎಲ್​ ಗ್ರಾಹಕರಿಗೆ 5ಜಿ ಸೇವೆ ನೀಡುವ ಕುರಿತು ಟೆಸ್ಟಿಂಗ್​ ನಡೆಯುತ್ತಿದೆ. ಅಪ್​ಗ್ರೇಡ್​ ಆಗಲಿದೆ. ಜತೆಗೆ ಟಿವಿ ಚಾನಲ್​ಗಳನ್ನು ಕಡಿಮೆ ಬೆಲೆಯಲ್ಲಿ ನೀಡಲು ಉದ್ದೇಶಿಸಲಾಗಿದೆ. ಫ್ರಾಂಚೈಸಿ ಪಡೆದುಕೊಂಡವರಿಗೆ ಅನುಕೂಲಗಳನ್ನು ಒದಗಿಸಿ ಆದಾಯವೂ ಸಿಗುವಂತಹ ಯೋಜನೆ ಇದಾಗಿದೆ ಎಂದರು.

ಮೊಬೈಲ್​ ಸಂಪರ್ಕ ವಿಭಾಗದ ಡಿಜಿಎಂ ಆರ್​.ಎಸ್​. ಕದಂ ಮಾತನಾಡಿ, ಕೇಬಲ್​ ಮೂಲಕ ಸಂಪರ್ಕ ಇರುವುದರಿಂದ ನೆಟ್​ವರ್ಕ್​ ಸ್ಪೀಡ್​ನಲ್ಲಿ ವ್ಯತ್ಯಾಸವಾಗುವುದಿಲ್ಲ. ಗ್ರಾಹಕರು, ಗ್ರಾಮಸ್ಥರು ಆಯ್ಕೆ ಮಾಡಿದ ಯೋಜನೆ ಪ್ರಕಾರ ಮಾಸಿಕ ಬಿಲ್​ ಮಾತ್ರ ಪಾವತಿಸಬೇಕು ಎಂದರು.